Yohanes 10 - Porjanjian Boharu Torjomahan Baso Dilakng Soari-ari

Yesus Pongombolo inyo boi'

¹ Yesus ija' bopandir, “Pondinga'an bobondarcam, la'apo inyo Ku pandiran ni'in: Aman ado urakng inyo tamo ko dalapm kandakan domba, apo io kinyo molalu'i lawakng kandakan nantai, umpamonyo io mansu' monoi' doi'dindikng damo noi' doi' tompat bukai, urakng ubo nian urakng pongolit huatan porampok.

² Apo urakng inyo mansu' molalu'i lawakng kandakan, sobondarnyo io nianam pongombolo boko domba nantai.

³ Ponjago kandakan mombuka' lawakng pakai' pongombolo nantai. Boko domba mondinga'an saro pongombolo nantai. Io moningkau boko dombanyo agatn damo sia' siku'-monyiku'. Io moirikan sia' ko luar.

⁴ Lopas jadi pongombolo nantai mombaba' somuo domba umputnnyo ko luar doi' kandakan nantai, io bojalatn di pohadapan boko dombanyo. Boko domba nantai tuyut io obai boko dombanyo nantai mongonal saronyo.

⁵ Boko dombanyo nantai co paca'an tuyut urakng bukai. Sia' paca'an rari doi' urakng nian obai sia' co mongonal saronyo.”

⁶ Yesus mongisahan poumpamoan nantai ko boko urakng Farisi, apo sia' co mongoroti la'apo inyo dimasud-Nyo.

⁷ Obai nantai Yesus bopandir agi', “Pondinga'an bobondarcam inyo Ku pandiran ni'in: Aku ninam samo agatn lawakng kandakan pakai' domba nantai.

⁸ Somuo urakng inyo datakng sobolupm Aku, sia' nam pongolit ongko porampok. Apo boko domba co mondinga'an saro sia'.

⁹ Aku ninam lawakngnyo. Sotiap urakng inyo mansu' molalu'i Aku, io paca'an solamant. Io paca'an koluar-mansu', monomuan padakng rumput.

¹⁰ Pongolit datakng ongkah bayo honda' mongolitam, mombunuh, mombonasoannam. Apo Aku datakng pakai' moonji'i hidup, ia'an hidup inyo sonang-nyaman.

¹¹ Aku ninam pongombolo inyo boi'. Pongombolo inyo boi' monyorahan hidupnyo pakai' monyolamant'an boko dombanyo.

¹² Urakng upahan, io nian bukainyo urakng pongombolo. Io bukainyo umputn boko domba nantai. Aman io moniant payau datakng, io rari moninggalan boko dombanyo. Lalu payau nantai monorokam huatan boko domba nantai botomboburan.

¹³ Urakng nantai rari obai io bayo urakng upahan. Io co poduli agatn boko domba nantai.

^14-15 Apo Aku ninam pongombolo inyo boi'. Samo agatn Allah Bopai mongonal Aku huatan Aku mongonal Bopai, ubo nian jam Aku mongonal boko domba-Ku huatan sia' mongonal Aku. Aku monyorahan hidup-Ku pakai' monyolamant'an sia'.

¹⁶ Apo ado jam boko domba bukai inyo bukainyo doi' kabatn domba ni'in inyo umputn-Ku. Aku gola' mombaba' sia' jam. Sia' paca'an mondinga'an saro-Ku. Somuo domba-Ku paca'an monjadi sokabatn agatn siku' pongombolo.

¹⁷ Ninam sobabnyo Bopai mongasihi Aku: Obai Aku monyorahan hidup-Ku pakai' monorima'nyo agi'.

¹⁸ Conyiant siku' urakng pan inyo ulih mombunuhKu. Apo Aku monyorahan hidup-Ku monurut kohonda'-Ku siku'. Aku ado kuaso pakai' moijitan urakng mombunuh-Ku. Aku pan ado kuaso pakai' hidup agi'. Nianam porintah inyo Aku torima' doi' Bopai-Ku.”

¹⁹ Obai Yesus bopandir ubo nantai boko urakng Yahudi ado potikakan.

²⁰ Banya' doi' sia' inyo bopandir, “Sio nian gogilo obai korasu'an sitatn! Jangan kaitn mondinga'an Sio!”

²¹ Apo inyo bukai bopandir, “Pomandiran nantai bukainyo doi' urakng inyo korasu'an sitatn! Co mungkitn sitatn ulih bulah urakng buto sampai ulih moniant!”

Banya' urakng Yahudi kinyo honda' monorima' Yesus

²² Lopas nian, di Yerusalem ado Ari Rayo Pontabisan Rumah Allah. Watu nantai musipm dingin.

²³ Yesus tongahan bojalatn di polantaran Salomo di Rumah Allah.

²⁴ Ado boko urakng Yahudi datakng bokumpul di sokolilikng Yesus. Kato sia' ko Sio, “Boropo manah agi' Duatn mombiaran koi gangga'-gua'an! Aman Duatn memang Kristus, Rajo Inyo Dijanjian Allah, padahancam agatn torus torakng ko koi.”

²⁵ Timbas Yesus ko sia', “Aku udah momadahannyo ko kaitn, apo kaitn co pocayo. Aku molabuhan boko pokoroja'an dalapm damo Bopai-Ku. Boko pokoroja'an nantai mombutian mongona'i Aku.

²⁶ Apo kaitn co pocayo obai kaitn bukainyo boko domba-Ku.

²⁷ Boko domba-Ku mondinga'an saro-Ku. Aku mongonal sia' huatan sia' tuyut Aku.

²⁸ Aku moonji'i sia' hidup inyo somanah-manahnyo. Sia' cokalo bonaso sampai somanah-manahnyo. Conyiant ado siku' urakng pan inyo ulih morobut sia' doi' jari-Ku.

²⁹ Bopai-Ku inyo moonju' sia' ko aku. Sio lobih bokuaso daripado sopo pan. Jadi, conyiant siku' urakng pan inyo ulih morobut sia' doi' jari-Nyo.

³⁰ Aku huatan Bopai-Ku siku'mo.”

³¹ Pas boko urakng Yahudi mondinga' pandir Yesus bunyi nantai, sokali agi' boko urakng Yahudi ngopil boko batu pakai' monikapm Yesus.

³² Apo Yesus bopandir ko sia', “Kaitn udah moniant Aku molabuhan banya' pokoroja'an boi' doi' Bopai-Ku. Doi' somuo pokoroja'an nantai, inyo buai mono bulah kaitn honda' monikapm Aku agatn batu?”

³³ Kato sia', “Koi honda' monikapm Duatn agatn batu bukainyo obai pokoroja'an boi' inyo Duatn labuhan, apo obai Duatn mohayam Allah. Duatn bayo monsio mo, apo Duatn monyamoan diri Duatn agatn Allah!”

³⁴ Timbas Yesus ko sia', “Dalapm Hukupm Torat kaitn ditulis obai Allah bopandir, ‘Kaitn nam allah’?

³⁵ Kito tohu obai la'apo inyo totulis dalapm Buku Suci nantai culih dibalakan. Jadi, aman sia' inyo monorima' pomandiran Allah nantai disobut boko allah,

³⁶ hibo kaitn mongatoan Aku mohayam Allah aman Aku mongatoan Aku ninam Ana' Allah? Obai, Allah Bopai-Ku momilih Aku huatan moutus Aku ko dunia.

³⁷ Soandainyo Aku co molabuhan boko pokoroja'an Bopai-Ku, kaitn jangan pocayo ko aku.

³⁸ Apo memang Aku molabuhan boko pokoroja'an Bopai-Ku. Biar pan kaitn co pocayo agatn Aku, palikng cado honda'nyo kaitn pocayo agatn boko pokoroja'an nantai. Agatn ubo nian, kaitn paca'an tohu huatan mongoroti obai Bopai bosatu agatn Aku, huatan Aku bosatu agatn Bopai.”

³⁹ Lopas jadi Yesus mongatoan nantai, sia' bousaha agi' monangkap Sio. Apo Sio lopas doi' jari sia'.

Boko urakng pocayo agatn Yesus di doerah Sungai Yordan

⁴⁰ Lopas nian Yesus bojalatn agi' ko soborakng sungai Yordan, tompat Yohanes komainyo mombaptis urakng. Sio diapm di siatn tai.

⁴¹ Boko urakng datakng ko Sio. Kato sia', “Yohanes co bulah sobuti' pan mujisat. Apo, somuo inyo Yohanes pandiran mongona'i Urakng ni'in memang bondar.”

⁴² Boko urakng di santai pocayo agatn Yesus.