Yohanes 1 - Porjanjian Boharu Torjomahan Baso Dilakng Soari-ari

Yesus nam Pandir Allah ongko Torakng Dunia

¹ Mulonyo, sobolupm la'apo pan dipulah, ado Sio inyo disobut ‘Pandir Allah’. Pandir nantai bosamo agatn Allah. Pandir nantai jam samo agatn Allah.

² Doi' somulonyo, Sio bosamo Allah.

³ Allah mombulah somuo la'apo pan molalu'i Sio. Conyiant Sio, conyiant ado la'apo pan inyo ulih dipulah.

⁴ Sio nam sumber kohidupan. Kohidupan inyo Sio onju' nantai am Torakng pakai' monsio.

⁵ Torakng nantai bocohayo di dalapm kogolapan. Potakng kinyo ulih monutupinyo.

⁶ Watu inyo udah ditotapan Allah, Allah moutus sikuꞌ urakng inyo bodamoan Yohanes.

⁷ Yohanes datakng pakai' momboritoan mongona'i Torakng nantai. Oca' obai io somuo urakng monjadi pocayo ko Torakng nantai.

⁸ Yohanes siku' bukatnnyo Torakng nantai, apo bayo momboritoan mongona'i Torakng nantai.

⁹ Torakng inyo bondar, Torakng inyo tongahan datakng ko dunia huatan monoraki somuo urakng.

¹⁰ Sio ado di dunia. Dunia dipulah molalu'i Sio. Apo, boko urakng di dunia kinyo mongonal Sio.

¹¹ Sio datakng ko banso-Nyo siku', ia'an banso Yahudi. Apo sia' kinyo pocayo agatn Sio.

¹² Apo ko somuo urakng inyo monorima'-Nyo, ia'an somuo urakng inyo pocayo ko Sio, Sio moonji'i hak ko sia' pakai' monjadi boko poana'an Allah.

¹³ Nantai kinyo tojadi socaro duniawi, samo sama'an boko urakng inyo dilahiran obai kohonda' damo hajat monsio. Sia' monjadi poana'an Allah obai Allah bulah somuo nantai memang tojadi.

¹⁴ Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

¹⁵ Yohanes momboritoan mongona'i Sio. Yohanes mondongkakng-mondorah, “Ninam Sio kujiku nantai, ‘Ado Urakng inyo paca'an datakng lopas aku nantai. Sio lobih pontikng doi' aku obai Sio udah ado ija' tangga'i mulonyo, jouh sobolupm aku dilahiran.’ ”

¹⁶ Obai Sio kotakng mongasihi kito, jadi kito hala monorima' borokat doi' Sio.

¹⁷ Allah moonju' porintah ongko poraturan-Nyo di buku Hukupm Torat molalu'i Musa. Apo Allah moonju' koboi'an-Nyo ongko kobondaran-Nyo molalu'i Yesus Kristus.

¹⁸ Co nyiant ado siku' urakng pan inyo kalo moniant Allah, kocuali Yesus, Ana' Tunggal-Nyo. Sio inyo ado hubukan kotakng dampikng agatn Allah Bopai. Sio inyo monyatoan Allah ko kito.

Yohanes Pombaptis momadahan mongona'i dirinyo siku'

¹⁹ Watu nantai urakng Yahudi doi' Yerusalem mongiripm boboropo imam ongko boko urakng doi' suku Lewi. Sia' disiuh botula' ko Yohanes pakai' botakutn, “Sopo kironyo duatn ni'in?” Huatan ni'in inyo dipadahan Yohanes ko sia'.

²⁰ Agatn torus torakng, Yohanes bopandir, “Aku bukainyo Rajo Inyo Dijanjian Allah inyo kito sobut Kristus!”

²¹ “Aman ubo nian,” sia' botakutn ko io, “Duatn sopo? Kata'an duatn Nabi Elia doi' joman komai inyo datakng agi'?” Timbas Yohanes, “Bukai! Kata'an duatn Nabi nantaiam nabi inyo koi tantian?” Timbas io, “Bukai!”

²² Jadi, sia' bopandir ko io, “Padahan ko koi sopo duatn oca' koi ulih momadahannyo ko sia' inyo monyiuh koi. La'apo kato duatn mongona'i diri duatn siku'?”

²³ Katonyo, “Watu joman komai Nabi Yesaya bopandir mongona'i urakng inyo tajahan datakng sobolupm Rajo Inyo Dijanjian Allah. Aku ninam urakng inyo mondorah di padakng pasir, ‘Bujurancam jalatn pakai' Tuhatn!’ ”

²⁴ (Huatan di antaro boko urakng inyo disiuh nantai ado boboropo doi' pomimpitn agama Yahudi doi' kolompok urakng Farisi).

²⁵ Sia' botakutn ko io, “Duatn momadahan duatn bukainyo Kristus, bukainyo Nabi Elia, bukainyo Nabi inyo koi tantian. Amannyo ubo nian, mapo duatn mombaptis boko urakng?”.

²⁶ Timbas Yohanes ko sia', “Aku ongkah mombaptis urakng agatn ara'i. Apo ado Urakng di tongah-tongah kaitn inyo kinyo kaitn konal sopo Sio sobondarnyo.

²⁷ Ia'an, Sio inyo datakng lopas aku. Aku sikuꞌ kinyo cucu' pakai' mombuka' tali sandal-Nyo.”

²⁸ (Kisah antaro Yohanes agatn sia' nantai tojadi di Betania di soborakng Sungai Yordan, tompat Yohanes mombaptis boko urakng.)

Yohanes Pombaptis mongisahan mongona'i Yesus

²⁹ Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

³⁰ Ninam Sio ujiku inyo ku pandiran watu, ‘Ado Urakng inyo paca'an datakng lopas aku nantai. Sio lobih pontikng doi' aku obai Sio udah ado doi' mulonyo, jouh sobolupm aku dilahiran.’

³¹ Sobolupmnyo, aku co tohu sopo Sio nantai. Padohal aku datakng mombaptis agatn ara'i oca' urakng Israel mongonal Sio.”

³² Yohanes pan mongisahan, katonyo, “Aku udah moniant Roh Allah turutn doi' langit samo sama'an burukng daro. Roh Allah nantai mohinggap di pucu' Yesus.

³³ Watu nantai, aku co tohu sopo Sio. Apo Allah inyo moutus aku pakai' mombaptis agatn ara'i, udah bopandir ko aku, ‘Aman kolai moniant Roh Allah turutn ko pucu' siku' urakng, lalu mohinggap di pucu'-Nyo, jadi urakng nantaiam Urakng inyo paca'an mombaptis agatn Roh Allah.’

³⁴ Huatan watu ni'in, aku udah moniant nantai tojadi. Aku moonji'i kosasian, ‘Urakng ninam Ana' Allah!’ ”

Boko murid Yesus inyo potamo

³⁵ Kohobu'annyo, Yohanes bodiritn agi' di tompat nantai. Bosamo agatn duo muridnyo.

³⁶ Pas io moniant Yesus lalu, io bopandir, “Tiat! Nantaiam Sio, Ana' Domba Allah!”

³⁷ Koduo murid nantai mondinga' pandir Yohanes. Lalu, sia' tuyut Yesus.

³⁸ Yesus mongilikng ko bolikat, moniant sia' tuyut Sio. Kato-Nyo ko sia', “Kaitn bogoyap la'apo?” Kato sia' ko Sio, “Rabi, Duatn diapm di mono?” ‘Rabi’ rotinyo ‘Guru’.

³⁹ Kato-Nyo ko sia', “Hincapm, lalu kaitn paca'an moniant!” Jadi, sia' botula', lalu moniant tompat Sio bodiapm. Nantai tojadi kiro-kiro japm ompat babahari. Ari nantai, sia' diapm bosamo-samo agatn Sio.

⁴⁰ Andreas ia'an salah siku' doi' koduo murid nantai inyo mondinga' pandir Yohanes lalu io tuyut Yesus. Andreas nam somadikan bondar Simon Petrus.

⁴¹ Jadi, watu nantai, Andreas kotakng hagar monomu'i Simon. Katonyo ko somadikannyo nantai, “Udah kotomuan koi am Mesias!” (‘Mesias’ rotinyo ‘Kristus’, ia'an Rajo Inyo Dijanjian Allah.)

⁴² Andreas mombaba' Simon ko Yesus. Yesus moncorona'i ko arah Simon. Kato-Nyo, “Kolai ninam Simon, ana' Yohanes. Apo kolai paca'an ditingkau Kefas!” (damo ‘Kefas’ samo agatn ‘Petrus’. Rotinyo, ‘batu ndampar’.)

⁴³ Kohobu'annyo, Yesus momutusan pakai' botula' ko doerah Galilea. Sio botomu agatn Filipus. Kato-Nyo ko Filipus, “Hincapm monjadi murid-Ku!”

⁴⁴ (Filipus nantai boasal doi' kota Betsaida, samo sama'an Andreas agatn Petrus.)

⁴⁵ Filipus botomu agatn Natanael. Katonyo ko io, “Koi udah monomuan Sio inyo doi' joman komai udah Musa sobut di dalapm Buku Torat, Sio inyo udah boko nabi sobut'an dalapm boko buku sia' jam. Ia'an, Yesus ana' Yusuf. Sio doi' laman Nazaret.”

⁴⁶ Kato Natanael ko io, “Ah! co mungkitn lou' inyo boi' boasal doi' laman Nazaret.”

⁴⁷ Kato Filipus ko io, “Hincapm! Tiatcam numbo!” Watu Yesus moniant Natanael datakng, Sio bopandir mongona'i Natanael. Kato-Nyo, “Tiat! urakng ni'in asli urakng Israel! Kinyo ado kopalsuan dalapm dirinyo.”

⁴⁸ Natanael botakutn, “Sama'an apo Duatn tohu agatn aku?” Timbas Yesus, “Sobolupm Filipus moningkau kolai, Aku udah moniant kolai di babah kayu ara nantai.”

⁴⁹ Kato Natanael ko Sio, “Wah, Guru! Pasti, Duatn ninam Ana' Allah! Duatn ninam Rajo urakng Israel!”

⁵⁰ Yesus bopandir, “Kolai mondinga' Aku bopandir obai Aku moniant kolai di babah kayu ara nantai. Kata'an obai nantaiam kolai monjadi pocayo ko aku ni'in? Kolai paca'an moniant boko hal inyo lobih bosar doi' boko nantai!”

⁵¹ Lalu Yesus bopandir, “Bondar-bondar pocayo cam! Kaitn paca'an moniant langit tobuka', lalu boko molekat Allah turutn noi' ko ‘Ana' Monsio.’ ”