Yakobus 5 - Porjanjian Boharu Torjomahan Baso Dilakng Soari-ari

Poringant'an ko urakng dampu

¹ Pondinga'an ni'in, boko urakng dampu. Kaitn gola' monangis huatan monyosal. Obai nononyo, kaitn paca'an sonsaro.

² Boko kodampuan kaitn paca'an lolo. Pakai'an inyo kaitn kona'an paca'an dipua'i gogat.

³ Omas ongko pira' umputn kaitn paca'an botogar. Nianam mombutian obai kaitn tama'. Jadi, Allah paca'an mombonasoan kaitn, samo sama'an api inyo moloburan isi kaitn. Kaitn hala mongumpulan kodampuan pakai' hobu-lusonyo. Apo sobondarnyo joman ni'in nam ari toahir kaitn.

⁴ Pikirancam mongona'i porbuatan kaitn. Ado boko urakng inyo bokorojo mohanyi di boko lakau kaitn. Apo kaitn co mombayar upah sia'. Jadi, sia' mongoluh minto potulukan doi' Tuhatn inyo Maho Kuaso. Sio mondinga' sia' huatan siap mohukupm kaitn.

⁵ Kaitn hidup socaro bokolobihan di dunia ni'in. Kaitn hidup ongkah pakai' monyonangan diri siku'. Apo co manah kaitn paca'an dihukupm. Jadi, kaitn samo sama'an bonatakng inyo monjadi gomu' co manah bonatakng nantai disombolih.

⁶ Kaitn udah mohukupm huatan mombunuh urakng inyo co bosalah huatan urakng nantai kinyo molawatn kaitn.

Biar pan dalapm kosusahan gola' bosabar

⁷ Jadi, boko somadikan gola' sabar botahatn sampai Tuhatn datakng agi'. Cubo pikiran mongona'i boko potani. Sia' gola' sabar monantian hujatn inyo turutn watu musipm monanam. Sia' pan gola' sabar monantian hujatn inyo turutn lansukng sobolupm musipm bohanyi. Hoyu' lakaunyo mohasilan inyo boi' huatan borogo.

⁸ Kaitn gola' sabar sama'an nianam. Kaitn gola' totap pocayo ko Tuhatn bobondar obai co manah agi' Tuhatn paca'an datakng agi'.

⁹ Boko somadikan, aman kaitn hala bosungunt huatan hala monyalahan, jadi kaitn paca'an dihukupm. Jadi, jangannam molabuhannyo nantai. Jangan sampai tongkolupatn, Sio inyo monjadi Hakipm somuo monsio paca'an oca' datakng.

¹⁰ Boko somadikan, turuticam toladatn boko nabi. Tuhatn moutus sia' pakai' momadahan boko posatn-Nyo. Sia' sonsaro obai molabuhan tugas nantai. Apo, sia' totap sabar botahatn.

¹¹ Porotian bo ni'in: Boko urakng inyo totap kuat mohadapi pondorita'an, sia' nam inyo kito anggap bobondar sonang. Ingantcam mongona'i Ayub. Sio botahatn mohadapi pondorita'an. Ahirnyo, Tuhatn momborokati Ayub. Jadi, kito tohu obai Tuhatn boi' hati huatan monunju'an kasih-Nyo ko kito.

Bopandir cam bobondar

¹² Boko somadikan, hal ni'in kotakng pontikng: Watu kolai bojanji, jangan cubo bosumpah pakai' monguat'an janji nantai agatn namo lapopan di sorugo damo di bumi. Aman kolai bopandir, “Au, aku paca'an molabuhan nantai.” Lalu, labuhancam nantai. Aman kolai bopandir, “Cado, aku co paca'an molabuhan nantai.” Lalu, jangan molabuhan nantai Labuhancam la'apo ja' inyo kolai janjian. Aman cado, nononyo Allah paca'an mohukupm kolai.

Gola' hala mondoa'an

¹³ Aman ado di antaro kaitn inyo sonsaro, io gola' bodoa minto potulukan Tuhatn. Aman ado di antaro kaitn inyo hidupnyo sonang, io gola' bonyanyi momuji Tuhatn.

¹⁴ Aman ado di antaro kaitn inyo sakit, io gola' moningkau boko ponotua' jomaat oca' bodoa pakai' io. Sia' gola' momalitan minya' jaitun kapikng bodoa dalapm damo ongko kuaso Tuhatn.

¹⁵ Aman sia' bobondar pocayo, jadi Tuhatn paca'an monyamanan urakng sakit nantai. Biar pan io udah bulah dosa, Tuhatn paca'an moamputinyo.

¹⁶ Obai nianam, kaitn gola' hala moaku'i dosa agatn siku'-monyiku' huatan hala mondoa'an oca' kaitn dinyamani. Urakng inyo hidup bondar di hadapan Allah, doanyo kotakan bokuaso huatan boguno.

¹⁷ Contohnyo nabi Elia timpu joman komai. Sio nam urakng biaso samo sama'an kito. Apo, io bodoa bondar-bondar oca' kinyo hujatn huatan memang tojadi kinyo hujatn somanah tigo tohutn sotongah.

¹⁸ Lopas nian, io bodoa agi' oca' ado hujatn. Memang nantai tojadi jam. Hujatn turutn lalu boko tontanaman di lakau botumbuh agi'.

¹⁹ Boko somadikan inyo ku kasihi, mungkitn ado di antaro kaitn inyo kinyo moninggalan ajaran inyo bondar. Apo lopas nian ado urakng inyo momimpitn io agi' monuruti Tuhatn.

²⁰ Urakng inyo mombimbikng io nantai, gola' mongotohu'i ni'in: Aman urakng bodosa nantai bobali' monuruti ajaran inyo bondar, jadi jiwa urakng nantai paca'an disolamant'an doi' noraka huatan banya' dosa jam paca'an diamputi.