Yakobus 4 - Porjanjian Boharu Torjomahan Baso Dilakng Soari-ari

Jangan monuruti boko kohonda' sikuꞌ, apo gola' monuruti kohonda' Allah

¹ Hibo kaitn hala bokolohi huatan hala botikakng agatn siku'-monyiku'? Nantai obai kaitn ado hawa napsu. Kaitn co honda' molabuhan boko hal inyo Allah kohonda'i. Jadi, sama'an ado poparakan dalapm diri kaitn.

² Kaitn kotakan honda' sosuatu, apo co mondapat'annyo. Kaitn monjadi tungi. Jadi, kaitn bokolohi, botikakng sampai mombunuhpakai' mondapat'annyo. Apo sobondarnyo kaitn co mondapatnyo obai kaitn co momintonyo ko Allah.

³ Huatan biar kaitn udah momintonyo ko Allah, kaitn totap co mondapatnyo. Obai tujuan kaitn momintonyo salah. La'apo inyo kaitn minto, nantai bayo pakai' momuasan kohonda' diri kaitn siku'.

⁴ Kaitn co sotia ko Allah samo sama'an siku' urakng inyo bomporajoan rotinyo co sotia ko pasakannyo. Kaitn gola' mongotohu'i ni'in: Boko urakng inyo moncintai kosonangan di dunia ni'in, sia' monjadi musuh Allah. Jadi, aman kaitn moncintai kosonangan di dunia ni'in, rotinyo kaitn monjadi musuh Allah.

⁵ Hal nian sosuai agatn tulisan ni'in dalapm Buku Suci, “Allah mombulah Roh-Nyo bodiapm di dalapm diri kito. Roh Allah nantai monulukng oca' kito moncintai Sio lobih doi' kito moncintai boko hal bukai. Jangan kaitn bopikir tulisan nian co nyiant ado rotinyo.”

⁶ Apo Allah udah monunju'an koboi'an-Nyo ko kito. Hal nantai sosuai agatn tulisan ni'in dalapm Buku Suci, “Allah bonci' agatn urakng inyo buhau. Apo Sio monunju'an koboi'an-Nyo ko urakng inyo rondah hati.”

⁷ Obai nianam, turuti kohonda' Allah huatan lawatncam kohonda' Rajo Sitatn, lalu io paca'an botongga' moncubo bulah kaitn bodosa.

⁸ Jalitncam hubukan inyo boi' agatn Allah, lalu Sio paca'an boi' agatn kaitn. Oi boko urakng inyo bodosa! Jangan bulah dosa agi'. Oi boko urakng inyo bocabakng hati! Borosihicam hati kaitn!

⁹ Boko dosa kaitn soharusnyo mombulah kaitn salu', sampai monangis. Jangan sonang. Jangan sonang-nyamanam. Soharusnyo kaitn salu' huatan monyosali dosa kaitn.

¹⁰ Jangan buhau di hadapan Tuhatn, jadi Sio paca'an mombulah kaitn tohormat.

Jangan mongatoan boko hal inyo jahat mongona'i urakng bukai

¹¹ Boko somadikan, jangan mongatoan boko hal inyo jahat mongona'i sosamo kaitn urakng pocayo. Jangan hala mohakipi. Aman kaitn molabuhan nantai, rotinyo kaitn co monaati porintah pakai' hala mongasihi inyo ado dalapm Hukupm Torat. Nantai samo sama'an kaitn mongatoan porintah nantai salah huatan kinyo boi'. Jadi, bukainyo monaati porintah, kaitn botindak samo sama'an kaitn monjadi boko hakipm inyo bohak monilai porintah nantai.

¹² Apo ongkah ado siku'am inyo bohak moonji'i hukupm. Ongkah ado siku' Hakipmmo. Ia'an, Tuhatn inyo bokuaso monyolamant'an damo mombonasoan urakng. Jadi, jangan bopikir kaitn bohak mohakipi urakng bukai!

Jangan ngolupatan Tuhatn inyo bohak moatur hidup kaitn nononyo

¹³ Dinga'anbo ni'in, kaitn inyo bopandir sama'an ni'in, “Sari ni'in damo hobu', koi paca'an bojalatn ko kota si'itn damo ko kota su'utan. Lalu, koi paca'an bodagakng somanah sotohutn. Koi paca'an dapat duit banya'.”

¹⁴ Padohal kaitn co tohu la'apo inyo paca'an tojadi hobu'. Hidup kaitn di dunia ni'in somontaromo. Samo sama'an ansap inyo ditiat sobontarmo, lalu lansukng hilakng.

¹⁵ Jadi, soharusnyo kaitn bopandir sama'an ni'inan, “Aman Tuhatn moijitan, koi paca'an hidup huatan koi ulih molabuhan ni'in damo nianan.”

¹⁶ Apo kaitn buhau huatan mombulah hajat kinyo bopikir mongona'i kohonda' Tuhatn. Somuo kobuhauan sama'an nantai jahat.

¹⁷ Kaitn udah mongotohu'i la'apo inyo boi'. Jadi, urakng inyo udah mongotohu'i nantai, apo co molabuhannyo, urakng ubo nian bodosa.