Yakobus 3 - Porjanjian Boharu Torjomahan Baso Dilakng Soari-ari

Jagocam pomandiran kolai

¹ Boko somadikanku, kaitn udah tohu obai Allah paca'an mohakipi somuo urakng. Apo, boko guru inyo mongajar mongona'i Allah paca'an dihakipi agatn ukuran inyo lobih borat daripado urakng bukai. Obai nianam, jangan banya' doi' antaro kaitn inyo honda' monjadi guru.

² Obai, kito somuo molabuhan somuo macapm kosalahan. Apo soandainyo ado urakng inyo co mombulah kosalahan agatn pomandirannyo, io nam urakng inyo sompurna inyo ulih mongondalian bukakng-tubuhnyo.

³ Pikiranbo mongona'i caro kito bulah siku' kuda monurut kohonda' kito. Kito ongkah-bayo moirukngnyo. Lalu, kito ulih moarahan soluruh bukakngnyo!

⁴ Damo pikiran jam mongona'i caro pongomudi mongomudian kapal. Kapal nantai kotakan bosar huatan dibaba' angin bonakau. Apo pongomudi nantai ulih moarahan soluruh kapal nantai agatn komudi inyo kotakan kocit.

⁵ Lidah kito kocit sama'an nantai jam. Apo kito momakai lidah pakai' monyombokan diri mongona'i boko hal bosar inyo kito labuhan. Porotiannam sotitik api. Api inyo kocit ulih moloburan hutatn inyo bosar.

⁶ Lidah kito ulih bosipat morusa'an samo sama'an api jam. Lidah kito inyo kotakng jahat doi' somuo bagian bukakng-tubuh inyo bukai. Pomandiran kito ulih monyebaran kojahatan ko soluruh kohidupan kito. Kojahatan nantai morusa'an soluruh kohidupan kito samo sama'an api morusa'an soluruh hutatn nantai. Api nantai memang api doi' noraka.

⁷ Monsio sanggup monggina'an somuo macapm jonis bonatakng; ia'an boko bonatakng hohutatn, boko burukng, boko bonatakng morayap, boko bonatakng lout. Monsio udah monggina'an boko bonatakng sama'an nantai.

⁸ Apo conyiant ado monsio inyo ulih monggina'an lidahnyo. Lidah kito ganas huatan jahat. Lidah kito bobohayo samo sama'an todukng inyo momati'i.

⁹ Agatn lidah, kito momuji Allah, Tuhatn huatan Bopai kito. Apo agatn lidah, kito pan moncolakoan urakng bukai. Padohal Allah mombulah sia' sorupo agatn Sio.

¹⁰ Jadi, boko somadikan, jangan molabuhan lou' sama'an nian. Kito culih momuji huatan moncolakoan agatn lidah kito.

¹¹ Samo sama'an ara'i taba'i ongko ara'i mancitn culih koluar doi' mato ara'i inyo samo.

¹² Damo agatn gambaran bukai, boko somadikan. Kayu ara culih mohasilan buah Jaitun. Kondukng anggur culih mohasilan buah ara. Mato ara'i mancitn culih mohasilan ara'i taba'i.

Caro hidup urakng inyo bobondar ado hikmat doi' Allah

¹³ Aman kaitn bopikir kaitn ado hikmat huatan pongotohuan, kaitn gola' monunju'annyo agatn caro hidup kaitn. Kaitn gola' molabuhan porbuatan inyo boi' agatn boi' hati. Obai, boi' hati datakngnyo doi' hikmat inyo bondar.

¹⁴ Apo aman kaitn tungi hati huatan ado kohonda' dalapm hati pakai' monjadi lobih hebat daripado urakng bukai, jangan kaitn buhau huatan jangan momutarbali'an borito inyo bondar doi' Allah.

¹⁵ ‘Hikmat’ sia' nantai bukainyo hikmat doi' Allah. ‘Hikmat’ sia' nantai doi' dunia, doi' napsu monsio huatan doi' roh jahat.

¹⁶ Nantai udah jolas obai aman boko urakng tungi hati huatan ado kohonda' pakai' monjadi lobih hebat daripado urakng bukai, boko urakng sama'an nian hala boparakng mulut agatn urakng bukai. Sia' bulah bomacapm porbuatan jahat.

¹⁷ Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

¹⁸ Boko urakng inyo mombaba' damai paca'an bulah urakng bukai damai jam. Jadi ado hasil inyo boi', ia'an lobih banya' urakng hidup bondar di hadapan Allah.