Yakobus 2 - Porjanjian Boharu Torjomahan Baso Dilakng Soari-ari

Jangan bopihak ko urakng dampu daripado urakng jaro

¹ Boko somadikan, kaitn udah pocayo ko Yesus Kristus, Tuhatn inyo luar biaso. Obai nianam jangan moniant mato-muho.

² Soandainyo, ado siku' urakng dampu inyo mansu' ko dalapm tompat kaitn bokumpul. Io momakai cincipm omas huatan pakai'an boi'. Ado jam siku' urakng jaro inyo mansu'. Io momakai pakai'an inyo jaha'i.

³ Lalu, kaitn lobih mohormati urakng inyo bopakaian boi'. Kaitn bopandir ko io, “Sihai dudu' di tompat inyo boi' ni'in.” Apo kaitn monyiuh urakng jaro nantai, “Bodiritn ja'am di sopia' nanam”, damo “Dudu' di lantai dampikng kakiku”.

⁴ Aman kaitn molabuhan lou' sama'an nian, rotinyo kaitn bopikir boko urakng totontu lobih boi' daripado urakng bukai. Kaitn monjadi samo sama'an boko hakipm inyo momakai pikiran jahat pakai' monilai urakng.

⁵ Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

⁶ Apo kaitn malahan mohayam urakng jaro. Cubo porotian porbuatan boko urakng dampu. Obai sia' nanam inyo mondorako'i kaitn agatn mondudus kaitn ko tompat pongadilan.

⁷ Kaitn monjadi umputn Yesus. Apo sia' nam inyo bojahat damo boi' Yesus.

⁸ Jangan tongkolupatn, dalapm Buku Suci ado porintah ni'in, “Kasihicam sosamo kolai ubo kolai mongasihi diri kolai siku'.” Aman kaitn monaati porintah nian, kaitn monyonangan hati Allah.

⁹ Apo aman kaitn moniant mato-muho boroti kaitn molanggar porintah nantai. Kaitn bodosa. Kaitn monjadi boko urakng inyo molanggar somuo porintah Allah.

¹⁰ Soandainyo ado urakng inyo monaati hampir somuo porintah Allah. Urakng nian bayo molanggar sobuti' porintah-Nyo. Rotinyo, io totap salah samo sama'an io molanggar somuo porintah nantai.

¹¹ Obai Allah inyo moonji'i sotiap porintah nantai. Allah inyo moonji'i porintah “Jangan bomporajoan.” Sio jam inyo moonji'i porintah “Jangan mombunuh.” Jadi, soandainyo, kolai co bomporajoan, apo kolai mombunuh siku' urakng. Rotinyo, kolai totap monjadi urakng inyo molanggar porintah Allah.

¹² Jadi boko somadikan, watu kaitn mongatoan la'apo pan damo molabuhan la'apo pan, jangan sampai tongkolupatn ni'in: Nononyo kaitn paca'an dihakipi sosuai agatn hukupm inyo mombebasan.

¹³ Watu ari ponghakipan Allah co paca'an monunju'an koboi'an ko urakng inyo co monunju'an koboi'an. Apo, boko urakng inyo monunju'an koboi'an, sia' co gola' dihukupm.

Hubukan antaro pocayo agatn porbuatan

¹⁴ Boko somadikan, aman ado urakng inyo mongatoan, “Io pocayo ko Yesus”, apo io kinyo molabuhan porbuatan inyo boi', pasti urakng sama'an nian kinyo paca'an disolamant'an. Sio mongatoan io pocayo, apo pomandirannyo nian kinyo boguno?

¹⁵ Umpamonyo, ado somadikan kaitn inyo kokurakan pomakatn agatn pakai'an soari-ari.

¹⁶ Lalu, ado di antaro kaitn inyo ongkah mongatoan ko io, “Solamant jalatn! Aku boharap kolai co kodinginan huatan co kolaparan.” Pomandiran kolai kinyo boguno aman kolai co monulukng urakng nian agatn kopontikannyo.

¹⁷ Ubo nian jam aman ado urakng inyo pocayo apo hal nantai co bulah io pakai' molabuhan porbuatan inyo boi'. Kopocaya'an sama'an nian kinyo boguno.

¹⁸ Apo mungkitn ado urakng inyo co sotuju huatan bopandir, “Ado urakng inyo moandalan kopocaya'annyo, huatan ado inyo bukai moandalan porbuatannyo.” Apo aku paca'an monimbas, “Aman kolai co molabuhan porbuatan inyo boi', co mungkitn kolai monunju'an ko aku obai kolai bondar-bondar pocayo! Apo porbuatanku monunju'an ko kolai obai aku bondar-bondar pocayo!”

¹⁹ Kolai mongatoan obai kolai pocayo ongkah ado siku' Allaham. Nian boi'! Apo cubo bopikir. Boko roh jahat pan pocayo sama'an kolai jam! Huatan hal nian bulah boko roh jahat nantai bogogora'.

²⁰ Jangan budu! Aman ado urakng inyo mongatoan io pocayo ko Yesus, apo io co molabuhan porbuatan inyo monyonangan hati Allah, kopocaya'an urakng nantai conyiant gunonyo. Ado buti

²¹ doi' kohidupan angki-bayatn kito Abrahapm. Io monaati Allah watu io siap momposombahan ana'nyo, Ishak. Io molota'an Ishak di pucu' mesbah. Obai io molabuhan nian, jadi io monjadi bondar dihadapan Allah.

²² Jadi, udah jolas Abrahapm bukatn bayo pocayo ko Allah, apo molabuhan porbuatan inyo monyonangan Allah jam. Porbuatan Abrahapm monunju'an obai io bondar-bondar pocayo.

²³ Kojadian ubo nian pakai' mombutian obai la'apo inyo ditulis mongona'i Abrahapm memang bondar. Di Buku Suci ditulis, “Abrahapm pocayo ko Allah. Obai nianam, io monjadi bondar di hadapan Allah.” Jadi, io disobut “Kawal Allah.”

²⁴ Doi' contoh Abrahapm, udah jolas caronyo urakng monjadi bondar di hadapan Allah. Urakng co monjadi bondar aman io ongkah pocayoam. Io monjadi bondar aman io molabuhan porbuatan inyo monunju'an obai io bondar-bondar pocayo.

²⁵ Ado contoh bukai doi' joman komai, ia'an Rahab. Io nam lahukng. Apo io monulukng mato-mato Israel inyo datakng pakai' momoriso'i nogori nantai. Io monapu'an sia' dalapm rumahnyo, lalu monulukng sia' morarian diri molalu'i jalatn bukai. Obai nianam porbuatan io nantai, lalu io monjadi bondar di hadapan Allah.

²⁶ Jadi, aman ado urakng inyo pocayo apo hal nantai kinyo mombulah io molabuhan porbuatan inyo monyonangan hati Allah, urakng sama'an nian kinyo bondar-bondar pocayo. Samo sama'an bukakng inyo pasti paca'an mati aman co bokosih di dalapmnyo.