Yakobus 1 - Porjanjian Boharu Torjomahan Baso Dilakng Soari-ari

Salapm doi' Yakobus

¹ Pakai' somuo boko urakng inyo pocayo doi' koduo bolas suku umant Allah inyo tosebar di soluruh dunia. Salapm doi' ku, Yakobus, inyo molayati Allah ongko polayatn Yesus Kristus.

Biar pan dalapm kosusahan kito gola' mongoroti ko Allah huatan totap pocayo agatn Yesus

² Boko somadikan, watu kaitn mohadapi bomacapm poncoba'an, kaitn pan gola' mooso sonang-nyaman.

³ Kaitn ulih sonang-nyaman obai kaitn mongotohu'i ni'in: Kito moalapi poncoba'an inyo mouji kito apobai kito paca'an totap pocayo ko Yesus kata'an cado. Aman kito totap pocayo, jadi kito monjadi urakng inyo mongkitn ulih botahatn mohadapi poncoba'an.

⁴ Jadi oca' kokuatan kaitn pakai' botahatn mongkitn botambah. Labuhancam ubo nantai oca' kaitn monjadi dewasa socaro rohani huatan monjadi urakng sompurna, conyiant ado kokurakan apo bisi somuo sipat inyo Allah kohonda'i pakai' umant-Nyo.

⁵ Aman ado inyo kurakng pintar-corodi', io gola' minto doi' Allah. Lalu, Allah paca'an moonji'i pintar-corodi'. Obai, Allah gala' moonji'i ko somuo urakng. Sio co monyalahan urakng inyo minto.

⁶ Apo, watu io mominto, io bondar-bondar pocayo obai Allah honda' monulukng io. Kobola'i Sio culih gangga'-gua'an. Obai, urakng inyo gangga'-gua'an samo sama'an golumbakng lout. Kadakng angin moniup golumbakng nantai ko arah si'itn, kadakng ko arah su'utan.

^7-8 Urakng inyo gangga'-gua'an sama'an nantai, hala borubah pikirannyo. Jadi, jangan io bopikir io paca'an mondapat'an la'apo pan doi' Tuhatn Allah.

Nosihat ko urakng jaro ongko urakng dampu

⁹ Urakng jaro inyo pocayo gola' mooso sonang aman Allah moninggian io.

¹⁰ Urakng dampu inyo pocayo gola' mooso sonang aman Allah morendahannyo jam. Obai, io paca'an mati samo sama'an kombakng di padakng rumput.

¹¹ Pas matoari mongkitn tinggi di langit, podi'nyo bulah padakng rumput monjadi layu. Boko kombakng luruh. Kinyo boi' agi'. Ubo nian jam inyo paca'an tojadi ko urakng dampu. Io paca'an mati watu io tongahan camuh agatn usahanyo.

Bukatnnyo Allah bulah monsio bodosa

¹² Allah momborokati urakng inyo botahatn mohadapi poncoba'an. Aman io botahatn, lalu Allah paca'an moonji'i io kohidupan somanah-manahnyo di sorugo. Nianam upah inyo Allah udah janjian ko somuo urakng inyo mongasihi Sio.

¹³ Aman ado urakng inyo dicubo'i pakai' bulah dosa, jangannam urakng nantai mongatoan, “Allah inyo moncubo'i aku!” Obai, Allah kinyo mombulah sopo pan bulah dosa. Huatan, conyiant inyo ulih moncubo'i Allah.

¹⁴ Apo boko urakng dicubo'i ulih hawa napsu sia' siku', bukatnnyo doi' Allah. Hawa napsu sia' morubah porhatian sia' doi' Allah, lalu sia' bulah dosa.

¹⁵ Aman ado urakng inyo monuruti hawa napsunyo inyo jahat nantai, jadi io bulah dosa. Lalu, aman io hala bulah dosa, io paca'an topisah doi' Allah, akibatnyo io mati.

¹⁶ Boko somadikan inyo ku kasihi, jangan salah bopikir.

¹⁷ Allah inyo moonji'i somuo inyo boi' huatan sompurna. Sio inyo mombulah matoari, bulatn, huatan somuo bintakng di langit. Sio co kalo borubah sama'an kombayakng inyo bopindah-pindah. Sio hala boi'.

¹⁸ Sosuai agatn hajat Sio, Sio moonji'i kosompatan ko kito pakai' mondinga'an Kabar Boi' inyo bondar. Obai nantaiam kito pocayo, lalu kito monjadi boko poana'an Sio. Sio molabuhan nantai oca' kito monjadi boko urakng inyo doholu doi' antaro somuo inyo dipulah-Nyo. Samo sama'an boko buah inyo potamo doi' hasil hanyianinyo di onju' ko Allah obai husus umputn Sio.

Jangan bayo mondinga'an Pomandiran Allah, apo gola' molabuhannyo

¹⁹ Boko somadikan inyo ku kasihi, pohatiancam ni'in: Somuo kaitn gola' copat mondinga', apo jangan copat bopandir. Jangan ponggodian.

²⁰ Obai siku' urakng ponggodian, culih hidup bondar di hadapan Allah.

²¹ Jadi, kaitn gola' botongga' molabuhan boko hal inyo kotor huatan jahat. Lopas nian, jangan buhau. Apo torima'cam Pomandiran Allah agatn rondah hati. Allah udah monyimpatn Pomandiran-Nyo dalapm hati kaitn. Pomandiran-Nyo nantai ado kuaso pakai' monyolamant'an hidup kaitn.

²² Jadi, kaitn gola' monaati Pomandiran-Nyo. Jangan ongkah mondinga'annam, obai aman ubo nian kaitn monipu diri kaitn siku'.

²³ Urakng inyo mondinga'an Pomandiran Allah apo tongkolupatn monaati-Nyo, nantai sama'an urakng bocoromin moniant mato muhonyo.

²⁴ Apo kali io botula' io lansukng tongkolupatn rupo muhonyo.

²⁵ Apo Allah momborokati urakng inyo mondinga'an Pandir Allah ongko monaatinyo. Urakng ubo nantai momporhatian Hukupm inyo sompurna, ia'an ajaran inyo mombebasan. Io hala ingant molabuhannyo huatan co kalo mongolupatannyo.

²⁶ Aman ado urakng inyo bopikir io rajitn sombayakng apo io co mongondalian lidahnyo, io bayo monipu dirinyo siku'. Sobondarnyo, io molayati Allah kinyo bobondar.

²⁷ Apo ninam sombayakng inyo monyonangan Allah Bopai kito. Ia'an io borotian pondorita'an boko bobia' kumang ongko boko urakng balu janda, lalu monulukng sia'. Io pan monjago diri oca' boko hal jahat di dunia ni'in kinyo mompongaruhi io.