Wahyu 9 - Porjanjian Boharu Torjomahan Baso Dilakng Soari-ari

Trompet inyo kolima'

¹ Lopas nantai, molekat inyo kolima' moniup trompetnyo. Pas nian, aku moniant sobuah bintakng jatu' doi' langit ko bumi. Bintakng nantai dionji'i kunci Jurakng Maut.

² Sio mombuka' lawakng lubakng jurakng maut nantai. Lalu, ansap noi' doi' lubakng nantai sama'an ansap doi' podopuran api inyo bosar. Ansap inyo koluar doi' lubakng nantai kotakng tobal sampai matoari huatan langit monjadi potakng.

³ Doi' ansap nantai, ado banya' bunta' inyo koluar turutn ko bumi. Boko bunta' nantai dionji'i kuaso pakai' monjonti' sama'an kalo.

⁴ Boko bunta' nantai dirarakng oca' jangan morusa' rumput, tontanaman, huatan boko kayu. Sia' ongkah ulih monyakiti boko urakng inyo conyiant tando Allah di koning.

⁵ Boko bunta' nantai co diijitan mombunuh boko urakng nantai, bayo monyonsaro'i sia' somanah lima' bulatn. Boko bunta' nantai mombulah boko urakng nantai kotakng ajab sonsaro samo sama'an aman dijonti' kalo.

⁶ Somanah lima' bulatn nantai, boko urakng paca'an bogoyap pomati, apo co ulih mati. Sia' paca'an bogonangan pomati, apo culih.

⁷ Rupo boko bunta' nantai sama'an boko kuda inyo udah siap pakai' boparakng. Sia' ado lou' sama'an mahkota omas di pucu' kopala' sia'. Mato muho sia' samo sama'an mato-muho monsio.

⁸ Rambut sia' sama'an rambut botina'. Gigi sia' sama'an gigi singa.

⁹ Dado sia' ditutupi agatn lou' sama'an baju bosi. Bunyi doi' sayap sia' sama'an bunyi doi' banya' koreta ditari' boko kuda inyo tongahan ngidi'an ko tompat poparakan.

¹⁰ Iku' boko bunta' nantai ado butuhnyo sama'an butuh kalo. Jadi, kuaso sia' pakai' monyonsaro'i boko urakng somanah lima' bulatn nantai ado di dalapm iku' sia'.

¹¹ Rajo inyo momorintah sia' ia'an molekat Jurakng Maut. Damonyo dalapm baso Ibrani ia'an ‘Abadon’, dalapm baso Yunani ia'an ‘Apolion’. Rotinyo ‘urakng inyo mombonasoan.’

¹² Nantaiam boncana inyo potamo inyo diumuman ulih burukng holakng nantai. Apo lopas nantai, ija' ado duo boncana agi' inyo paca'an tojadi.

Trompet inyo koonam

¹³ Lopas nantai, molekat inyo koonam moniup trompetnyo. Lopas nantai, aku mondinga' ado saro. Saro nantai datakng doi' koompat tandu' inyo ado di sotiap buncu mesbah omas inyo di hadapan Allah.

¹⁴ Saro nantai bopandir ko molekat koonam inyo monjujut trompet nantai. Katonyo, “Kulo gola' molopasan koompat molekat inyo dikobat di sungai Efrat inyo bosar nantai!”

¹⁵ Jadi, koompat molekat nantai dilopasan. Sia' udah disiapan pakai' watu inyo udah ditontuan, ia'an japmnyo, arinyo, bulatnnyo, tohutnnyo. Sia' disiapan pakai' mombunuh soportigo doi' somuo urakng di dunia.

¹⁶ Aku mondinga' jumlah tontara nantai ia'an duo ratus juta' tontara inyo noi' kuda.

¹⁷ Aku moniant boko kuda nantai dalapm poniant'anku. Aku pan moniant boko urakng inyo monunggakngnyo. Sia' momakai baju bosi inyo bowarna mirah sama'an api, biru sama'an batu nilam, huatan kuning sama'an bolerang. Boko kuda nantai bokopala' sama'an kopala' singa. Ado api, ansap huatan bolerang inyo koluar doi' nyao boko kuda nantai.

¹⁸ Soportigo somuo urakng di dunia dibunuh obai kotigo boncana nantai, ia'an api, ansap huatan bolerang inyo koluar doi' nyao boko kuda nantai.

¹⁹ Obai kuaso boko kuda nantai ado di dalapm nyaonyo. Apo sia' pan ado kuaso di iku' sia'. Obai iku' sia' sama'an ular inyo bokopala'. Agatn nantai, sia' mondorako'i urakng.

²⁰ Apo boko urakng bukai, inyo co mati ulih boncana nantai, sia' totap co honda' botongga' monyombah boko lompatukng inyo sia' pulah agatn jarinyo sikuꞌ. Sia' totap monyombah boko roh jahat huatan boko berhala inyo dipulah doi' omas, pira', tombago, batu, kayu; ia'an boko berhala inyo co ulih moniant huatan mondinga' huatan bojalatn.

²¹ Sia' pan co honda' moninggalan boko dosa sia' inyo bukai, ia'an mombunuh, momakai ilmu sihir, bulah dosa bomporajoan, huatan mongolit.