Wahyu 8 - Porjanjian Boharu Torjomahan Baso Dilakng Soari-ari

Ana' Domba mombuka' segel inyo kotujuh

¹ Lopas nian, Ana' Domba mombuka' segel inyo kotujuh. Watu nantai, sorugo monjadi kotakng langunt somanah sotongah japm.

Boko molekat moniup ompat doi' tujuh trompet inyo moumuman boko boncana

² Lopas nian, aku moniant kotujuh molekat inyo bodiritn di hadapan Allah. Sia' dionji'i tujuh trompet.

³ Siku' urakng molekat bukai datakng mombaba' sobuah mangku' inyo dipulah doi' omas, husus pakai' moncucul rabutn. Molekat nantai botula' bodiritn dampikng mesbah. Io dionji'i banya' monyan dalapm mangku' nantai pakai' diposombahan bosamo-samo agatn doa somuo urakng inyo pocayo. Io momposombahan nantai di pucu' mesbah omas inyo di hadapan tahta nantai.

⁴ Ansap komonyan nantai noi' doi' mangku' dohupodi longan molekat nantai. Ansap nantai noi' bosamo-samo agatn doa boko urakng pocayo ko hadapan Allah.

⁵ Lalu, molekat nantai monguti' ongko moisi'i mangku' nantai agatn baro api doi' mesbah nantai. Io monikapannyo ko bumi. Ongko ado saro guntur solitar, huatan gompa bumi.

⁶ Lopas nantai, kotujuh molekat inyo monjujut kotujuh trompet bososiap pakai' moniup trompet sia'.

⁷ Molekat inyo potamo moniup trompetnyo. Watu nantai, hujatn es agatn hujatn api, bocampur darah jatu' ko bumi. Ongko, soportigo bumi habis kocuculan, soportigo doi' boko tontanaman huatan somuo rumput hijau habis kocuculan jam.

⁸ Molekat inyo koduo moniup trompetnyo. Watu nantai, ado lou' sama'an gunung bosar inyo bonyalo agatn api. Gunung nantai ditikapan ko dalapm lout. Soportigo lout nantai monjadi darah.

⁹ Soportigo lou' inyo hidup di lout bomatian. Soportigo somuo kapal monjadi hancur.

¹⁰ Molekat inyo kotigo moniup trompetnyo. Watu nantai, ado bintakng bosar inyo bonyalo sama'an obor. Bintakng nantai jatu' doi' langit, moninggakng soportigo doi' somuo sungai huatan mato ara'i.

¹¹ Jadi, soportigo doi' somuo ara'i nantai monjadi pohit. Banya' urakng mati obai ara'i pohit nantai. (Damo bintakng nantai ia'an “Pohit”).

¹² Molekat inyo koompat moniup trompetnyo. Watu nantai, ado lou' inyo moninggakng morusa' soportigo matoari, soportigo bulatn agatn soportigo boko bintakng huatan soportigonyo monjadi potakng. Soportigo siakng arinyo monjadi potakng. Ubo nian jam, somanah soportigo malapm arinyo monjadi potakng.

¹³ Lopas nian, aku moniant siku' burukng holakng trobakng tinggi di langit. Aku mondinga' io bopandir agatn saro borakng, “Bonaso! Bonaso! Bonasoam boko sia' inyo hidup di bumi. Obai ija' ado tigo molekat inyo paca'an moniup trompet sia'.”