Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Wahyu 7 - Porjanjian Boharu Torjomahan Baso Dilakng Soari-ari


Boko urakng umant Allah ditando'i pakai' molindukinyo
( 7:1-8 )

1 Lopas nian, aku moniant ompat molekat bodiritn di koompat ponjuru bumi. Sia' monahan koompat angin bumi oca' jangan ado angin momuput di darat, damo di lout, huatan diboko kayu.

2 Koompat molekat nantai udah dionji'i kuaso pakai' morusa'an bumi ongko lout. Apo aku moniant ado siku' urakng molekat inyo bukai inyo koluar doi' sopia' timur. Io mombaba' cap doi' Allah inyo hidup. Sio bopandir ko koompat molekat nantai agatn saro kotakan borakng.

3 Katonyo, “Jangan morusa' bumi damo lout damo boko kayu. Tanti holu'ai sampai koi monando'i koning boko urakng inyo molayati Allah kito.”

4 Aku mondinga' jumlah sia' inyo ditando'i agatn cap nantai ia'an soratus ompat puluh ompat ribu urakng. Sia' boasal doi' somuo suku banso Israel.

5 Ado duo bolas ribu urakng doi' suku Yehuda inyo ditando'i. Ado duo bolas ribu urakng doi' suku Ruben. Ado duo bolas ribu urakng doi' suku Gad.

6 Ado duo bolas ribu urakng doi' suku Asyer. Ado duo bolas ribu urakng doi' suku Naftali. Ado duo bolas ribu urakng doi' suku Manasye.

7 Ado duo bolas ribu urakng doi' suku Simeon. Ado duo bolas ribu urakng doi' suku Lewi. Ado duo bolas ribu urakng doi' suku Isakhar.

8 Ado duo bolas ribu urakng doi' suku Zebulon. Ado duo bolas ribu urakng doi' suku Yusuf. Ado duo bolas ribu urakng doi' suku Benyamin.


Urakng banya' inyo monyombah Allah
( 7:9-17 )

9 Lopas nantai aku moniant, ih, ado kumpulan urakng inyo kotakan banya', kinyo tohitukng jumlahnyo. Sia' doi' sotiap banso, sotiap suku, sotiap negara, sotiap baso. Sia' bodiritn di hadapan tahta ongko di hadapan Ana' Domba. Sia' momakai jubah putih ongko monjujut boko dahatn kayu palem di jari sia'.

10 Sia' mondongkakng-mondorah, “Topujicam Allah koi. Koi disolamant'an ulih Sio inyo dudu' di tahta ongko ulih Ana' Domba!”

11 Somuo molekat bodiritn mongoliliki tahta, koompat mahluk, ongko boko pomimpitn nantai. Somuo molekat nantai tundu' monyungkapan di pohadapan tahta nantai, monyombah Allah.

12 Kato sia', “Amin! Pujicam Allah kito inyo mulia. Sio hala bijaksana, kuat ongko bokuaso. Sio cucu' dionji'i sukur ongko hormat sampai somanah-manahnyo! Amin!”

13 Lalu, siku' urakng doi' boko pomimpitn nantai bopandir ko aku, “Sopo kironyo sia' inyo momakai jubah putih nantai? Doi' mono kiro sia' datakng?”

14 Aku bopandir ko io, “Aku cuku tohu, habakng. Duatn mongotohu'inyo.” Jadi io bopandir ko aku, “Sia' ni'inam boko urakng inyo koluar doi' masa ajab sonsaro inyo bosar. Sia' udah bulah jubah sia' monjadi putih, monopasinyo agatn darah Ana' Domba.

15 Nantai sobabnyo sia' bodiritn di pohadapan tahta Allah, hala molayati Sio siakng-malapm di Rumah Allah. Sio inyo dudu' di tahta nantai paca'an monyoroto'i ongko molinduki sia'.

16 Sia' co paca'an kalo kolaparan damo korahakan agi'. Podi' cokalo monyusahan sia' agi'.

17 Nianam koadaan sia' obai Ana' Domba inyo di tongah tahta nantai inyo monjago'i sia' samo sama'an siku' gombala. Sio paca'an moirikan sia' ko sumber ara'i inyo moonji'i kohidupan. Allah paca'an mohapus somuo ara'i mato doi' mato sia'.”

ကြှနျုပျတို့နောကျလိုကျပါ:



ကြော်ငြာတွေ