Wahyu 6 - Porjanjian Boharu Torjomahan Baso Dilakng Soari-ari

Ana' Domba molopasan onam doi' kotujuh segel

¹ Lopas nian, aku moniant Ana' Domba nantai mombuka' segel potamo doi' kotujuh segel nantai. Watu nantai, aku mondinga' salah siku' doi' koompat mahluk hidup nantai bopandir agatn saro borakng samo sama'an bunyi guntur solitar. Katonyo, “Hincapm!”

² Jadi aku moniant, ih, ado siku' kuda putih inyo moncumul. Urakng inyo monunggaki kuda nantai monggintikng sobuti' panah. Io dionji'i sobuti' mahkota. Sobagai urakng inyo udah monang, io maju ko luar pakai' mongalahan somuo musuh.

³ Lopas nian, aku moniant Ana' Domba nantai mombuka' segel koduo. Watu nantai, aku mondinga' mahluk inyo koduo bopandir, “Hincapm!”

⁴ Lalu, siku' kuda inyo bukainyo koluar. Kuda nantai mirah sama'an api bonyalo. Urakng inyo monunggaki kuda nantai dionji'i kuaso pakai' mohilakan kodamaian doi' muka' bumi, oca' monsio hala bobunuhan. Io pan dionji'i podakng inyo bosar.

⁵ Lopas nian, Ana' Domba nantai mombuka' segel kotigo. Watu nantai, aku mondinga' mahluk inyo kotigo bopandir, “Hincapm!” Lalu aku moniant, ih, ado siku' kuda hitapm inyo moncumul. Urakng inyo monunggaki kuda nantai monjujut timbakan di jarinyo.

⁶ Aku mondinga' ubo ado bunyi saro di tongah-tongah koompat mahluk nian. Saro nantai bopandir, “Rogo sokilu topukng gandupm monjadi kotakng mahal, samo agatn upah soari ponuh. Rogo tigo kilu topukng sonjoli mudahmo monjadi sorogo upah soari ponuh. Apo jangannam morusa' kobutn buah Jaitun ongko kobutn anggur.”

⁷ Lopas nian, Ana' Domba nantai mombuka' segel koompat. Watu nantai, aku mondinga' saro mahluk inyo koompat bopandir, “Hincapm!”

⁸ Lalu aku moniant, ih, ado siku' kuda hijau kuning. Urakng inyo monunggaki kuda nantai bodamoan Maut huatan koraja'an maut tontuyutannyo. Sia' duo dionji'i kuaso pakai' mombunuh soporompat monsio di bumi. Ado inyo dibunuh agatn podakng, agatn kolaparan, doi' poranggapan, ongko molalu'i boko bonatakng ganas di bumi.

⁹ Lopas nian, Ana' Domba nantai mombuka' segel kolima'. Watu nantai, aku moniant banya' jiwa di babah mesbahAllah. Boko jiwa nantai ia'an boko urakng inyo udah dibunuh obai sia' momboritoan Pomandiran doi' Allah huatan obai sia' bosasi mongona'i Yesus.

¹⁰ Dalapm poniant'anku, sia' tongahan moningkau kotakan borakng, “Oh, Tuhatn Inyo Maho Kuaso, Inyo Kudus ongko Inyo Bondar! Ija' apo manahnyo sampai Duatn paca'an mohakipi ongko mohukupm boko urakng inyo mombunuh koi?”

¹¹ Boko urakng inyo dibunuh siku'-monyiku' dionji'i jubah putih. Sia' diboritohu pakai' torahat agatn sabar sotogal agi'. Obai ija' ado boko somadikan inyo molayati Yesus inyo paca'an dibunuh, samo sama'an sia'. Sia' gola' monanti sampai jumlah urakng nantai udah diponuhi.

¹² Lopasnyo, Ana' Domba nantai mombuka' segel koonam. Watu nian, aku moniant, ih, ado gompa bumi inyo bosar. Matoari monjadi hitapm hiru' sama'an pakai'an urakng tongahan bulikng. Bulatn monjadi mirah sama'an darah.

¹³ Boko bintakng di langit potaras jatu' ko bumi samo sama'an boko buah ara inyo ija' matah jatu' doi' batakngnyo pas dipuput angin bonakau.

¹⁴ Langit hilakng tontu sama'an korotas digulukng, huatan boko bukit ongko pulau pan diginsit doi' tompatnyo.

¹⁵ Somuo rajo di dunia, somuo urakng pontikng, somuo komandatn tontara, somuo urakng dampu, somuo urakng inyo bokuaso, somuo hulutn pacal, somuo urakng merdeka, sia' somuo morarian diri botapu' ko dalapm boko gua damo ko dalapm boko lubakng di gunung batu.

¹⁶ Sia' bopandir ko boko gunung ongko boko batu nantai, “Jatu'cam tinggakng koi. Ombakan cam koi doi' Sio inyo dudu' di pucu' tahta. Ombakan cam koi doi' ponggodi Ana' Domba nantai!

¹⁷ Ombakan koi cam obai Ari Ponghakipan Allah ongko Ana' Domba udah datakam. Conyiant inyo ulih botahatn!”