Wahyu 5 - Porjanjian Boharu Torjomahan Baso Dilakng Soari-ariAna' Domba inyo cucu' mombuka' gulukan buku mongona'i hajat Allah ( 5:1-14 ) 1 Lopas nian aku moniant sobuah gulukan buku di jari kanan Sio inyo dudu' di pucu' tahta nantai. Gulukan nantai ado tulisan di sopia' luar ongko sopia' dalapm, apo ditutup agatn tujuh segel lilitn. 2 Aku moniant jam siku' molekat inyo kotakan kuat. Molekat nantai mondongkakng-mondorah kotakan borakng. Katonyo, “Sopo inyo cucu' molopasan boko segel lalu mombuka' gulukan buku nian?” 3 Apo conyiant ado urakng di sorugo, di bumi, damo di babah bumi, inyo cucu' mombuka' gulukan buku nantai lalu mombaco tulisan di dalapmnyo. 4 Jadi aku monangis kotakan salu', obai conyiant ado siku' pan inyo dianggap cucu' pakai' mombuka' gulukan buku nantai lalu mombaco tulisan di dalapmnyo. 5 Apo salah siku' doi' koduo puluh ompat pomimpitn nantai bopandir ko aku, “Jangan monangis! Porotian! Ado Urakng inyo bokuaso inyo disobut Singa doi' suku Yehuda. Sio nam Koturutan doi' Rajo Daud. Sio udah monang. Jadi, Sio inyo cucu' molopasan kotujuh segel lalu mombuka' gulukan Buku nantai!” 6 Lalu, aku moniant siku' Ana' Domba inyo kotiat'annyo samo sama'an udah disombolih. Sio bodiritn di tongah-tongah tahta, koompat mahluk, ongko koduo puluh ompat pomimpitn nantai. Sio ado tujuh tandu' ongko tujuh mato. Nantai ia'an tujuh Roh Allah inyo diutus ko soluruh dunia. 7 Ana' Domba nantai datakng, monorima' gulukan buku nantai doi' jari kanan Sio inyo dudu' di pucu' tahta nantai. 8 Pas Sio monguti' gulukan buku nantai, koompat mahluk ongko koduo puluh ompat pomimpitn nantai lansukng tundu' monyungkapan di hadapan Ana' Domba nantai. Sia' siku'-monyiku' monjujut kocapi. Somuo sia' pan ado cangkir omas inyo boisi komonyan. Nantaiam somuo doa urakng inyo pocayo. 9 Sia' monyanyian nyanyian boharu pakai' momuji Ana' Domba nantai. Kato sia', “Duatn inyo cucu' monorima' gulukan buku nian lalu molopasan boko segelnyo. Obai, Duatn udah disombolih; Agatn darah Duatn siku', Duatn udah mombayar hukupan dosa boko urakng doi' sotiap suku, sotiap baso, sotiap banso, sotiap negara. Duatn molabuhan nantai pakai' bulah sia' monjadi umant umputn Allah. 10 Duatn udah mombulah sia' monjadi Koraja'an Allah, huatan mombulah sia' monjadi boko imam inyo molayati Allah. Sia' paca'an momorintah sobagai rajo di bumi.” 11 Lalu, dalapm poniant'an nantai, aku mondinga' saro banya' molekat di sokolilikng tahta, boko mahluk, ongko boko pomimpitn nantai. Ado boribu-ribu molekat nantai, malahan jutaan. 12 Sia' somuo bonyanyi agatn saro borakng, “Ana' Domba inyo disombolih nantai, Sio cucu' pakai' monorima' kuaso, kodampuan, hikmat, kokuatan. Sio cucu' dihormati, ditinggian, dipuji!” 13 Lopas nian, aku mondinga' somuo mahluk di sorugo, di bumi, di babah bumi, di lout huatan somuo inyo ado di dalapmnyo, bonyanyi, “Pakai' Sio inyo dudu' di pucu' tahta ongko bagi Ana' Domba, puji, hormat, komulia'an ongko kuaso sampai somanah-manahnyo!” 14 Koompat mahluk nantai bopandir, “Amin!” Boko pomimpitn nantai pan tundu' monyungkapan ongko monyombah. |
LAI 2021
Indonesian Bible Society