Wahyu 3 - Porjanjian Boharu Torjomahan Baso Dilakng Soari-ari

Pomandiran Yesus ko jomaat di kota Sardis

¹ “Tuliscam pomandiran ni'in ko molekat inyo monjago jomaat di Sardis: Pomandiran ni'in doi' Sio, inyo umputn kotujuh roh ongko kotujuh bintakng nantai. Aku tohu caro hidup kaitn. Uji urakng tai hidup kaitnbohubukan dampikng agatn Allah. Padohal, sobondarnyo kaitn topisah doi' Allah, kaitn samo sama'an udah mati.

² Jadi sadarcam! Kuatancam kopocaya'an kaitn inyo hampir mati. Obai, Aku mongotohu'i boko porbuatan kaitn kinyo sonunuh di hadapan Allah-Ku.

³ Jadi, ingantcam ajaran inyo kaitn dinga' ongko torima' komai. Taat'icam nantai. Tongga'ancam kaitn bulah boko dosa lalu hidup monyonangan hati Allah. Aman kaitn co bojojago, Aku paca'an datakng mohukupm kaitn. Kaitn nononyo co kalo mongotohu'i sombilo watunyo Aku datakng samo sama'an siku' urakng pongolit.

⁴ Apo ado boboropo urakng doi' jomaat di Sardis inyo hidup borosih doi' dosa. Sia' bopakaian putih huatan paca'an bojalatn bosamo-samo agatn Aku, obai sia' cucu' pakai' nantai.

⁵ Boko urakng inyo monang paca'an dikona'an pakai'an putih samo sama'an nantai. Aku co paca'an mohapus damo sia' doi' Buku Kohidupan. Aku paca'an moaku'i obai sia' nam umputn-Ku di hadapan Bopai-Ku ongko boko molekat-Nyo.

⁶ Sopo pan inyo ulih mondinga', kohonda'nyo io borotian somuo pomandiran Roh Allah ko jomaat.”

Yesus bopandir agatn jomaat di kota Filadelfia

⁷ “Tuliscam pandir ni'in ko molekat inyo monjago jomaat di Filadelfia: Pomandiran ni'in doi' Sio, Inyo Kudus, Inyo Bondar, inyo monjujut kunci Rajo Daud, ia'an kunci pakai' mansu' Koraja'an Allah. Aman Sio mombuka' lawakngnyo, conyiant ado siku' urakng pan inyo ulih monutupnyo. Aman Sio monutup lawakngnyo, conyiant ado siku' urakng pan inyo ulih mombuka'nyo.

⁸ Aku tohu somuo inyo kaitn labuhan. Aku tohu kaitn co tolalu kuat. Apo, kaitn totap monaati Pandir-Ku. Kaitn borani mongaku'i obai kaitn ia'an murid-Ku. Obai nantai, porhatiancam! Aku udah mombuka' lawakng pakai' kaitn. Conyiant ado siku' urakng pan ulih monutupnyo.

⁹ Porhatiancam! Boko urakng nantai doi' umant Rajo Sitatn, sia' monyobut dirinyo urakng Yahudi. Apo sobondarnyo sia' bukainyo anggota umant Allah. Sia' tumbukan! Aku paca'an bulah sia' datakng tundu' monyungkapan di pohadapan kaki kaitn. Lalu, sia' paca'an tohu obai Aku mongasihi kaitn.

¹⁰ Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.

¹¹ Aku paca'an oca'mo datakng! Totap sotia pocayo ko aku oca' co nyiant ado urakng inyo ulih morampas hadiah komonangan kaitn.

¹² Boko urakng inyo monang, Aku paca'an bulah sia' monjadi boko tihakng dalapm Rumah Allah-Ku. Sia' paca'an bodiapm di su'utan soumur hidupnyo. Aku pan paca'an monulis damo Allah-Ku dibukakng sia', damo kota Allah-Ku, ia'an nantai kota Yerusalem boharu inyo turutn doi' sorugo doi' Allah-Ku. Aku pan paca'an monulis damo-Ku inyo boharu di bukakng sia'.

¹³ Sopo pan inyo ulih mondinga', kohonda'nyo io momporhatian somuo pandir Roh Allah ko jomaat.”

Yesus pandiran agatn jomaat di kota Laodikia

¹⁴ “Tuliscam pomandiran ni'in ko molekat inyo monjago jomaat di Laodikia: Pomandiran ni'in doi' Aku, inyo disobut Amin inyo momadahan mongona'i Allah agatn sotia ongko agatn bondar. Aku nam sumber somuo la'apo pan dipulah Allah.

¹⁵ Aku tohu somuo inyo kaitn pulah. Kaitn co dingin co hangant. Soharusnyo kaitn dingin kata'an hangant!

¹⁶ Apo kaitn kosodakannyo mo, co dingin co hangant. Obai nantaiam, Aku paca'an momutahan kaitn doi' nyao-Ku.

¹⁷ Kaitn bopandir, ‘Koi cukup dampu. Koi udah mongumpulan banya' kodampuan. Koi conyiant ado kokurakan la'apo pan.’ Apo kaitn co sadar obai sobondarnyo socaro rohani kaitn conyiant ado aponyo. Kaitn molarat, sonsaro, jaro, buto, kolanjakng!

¹⁸ Obai nantai, Aku momadahi kaitn oca' momboli omas doi' Aku, omas inyo udah dimurnian dalapm api. Kaitn gola' molabuhan nantai oca' kaitn bondar-bondar monjadi dampu. Bolicam pakai'an putih doi' Aku oca' kaitn bopakaian, oca' monutupi koadaan kaitn kolanjakng inyo bulah kaitn malu. Bolicam ubat pakai' dipalitan ko mato kaitn oca' kaitn ulih moniant.

¹⁹ Akunam monogur ongko monertiban boko urakng inyo Ku kasihi. Jadi, bondar-bondar pocayocam ko aku. Tinggalancam boko dosa kaitn.

²⁰ Porhatiancam! Aku bodiritn di pohadapan lawakng ongko mongetok. Aman ado urakng inyo mondinga'an saro-Ku, lalu mombuka' lawakngnyo, jadi Aku paca'an mansu' rumahnyo. Aku paca'an makatn bosamo-samo agatn io. Io paca'an makatn bosamo-samo agatn Aku.

²¹ Boko urakng inyo monang, Aku paca'an moijitan sia' dudu' di tahta-Ku bosamo agatn Aku. Samo sama'an Aku siku' udah monang lalu dudu' di tahta Bopai-Ku momorintah bosamo agatn Sio.

²² Sopo pan inyo ulih mondinga', kohonda'nyo io momporhatian somuo pomandiran Roh Allah ko jomaat.”