Wahyu 22 - Porjanjian Boharu Torjomahan Baso Dilakng Soari-ari

¹ Lalu, molekat nantai monunju'an ko aku sungai inyo ara'inyo moonji'i kohidupan. Sungai nantai joronih bondar tontu sama'an kristal, huatan mongalir doi' tahta Allah ongko doi' Ana' Domba nantai.

² Di tongah-tongah jalatn kota nantai, ia'an di soborakng-nyoborakng sungai nantai, ado kayu sumber kohidupan. Kayu nantai bobuah duo bolas kali sotohutn, ia'an sokali sobulatn. Boko doutn doi' kayu nantai digunoan pakai' monyamani boko banso.

³ Di dalapm kota nantai, co nyiant inyo kona' tulahdoi' Allah. Tahta Allah agatn Ana' Domba nantai paca'an ada'an di dalapm kota nantai. Boko urakng inyo molayati Sio paca'an monyombah-Nyo,

⁴ paca'an moniant mato-muho-Nyo. Damo-Nyo paca'an totulis di koning sia'.

⁵ Conyiant malapm agi' di siatn tai. Sia' co momontikan cohayo doi' lampu damo matoari, obai Tuhatn Allah siku'mo paca'an monoraki sia'. Sia' paca'an momorintah ubo rajo sampai somanah-manahnyo.

Kodatakan Tuhatn Yesus

⁶ Lopas nian, molekat nantai bopandir ko aku, “Boko pomandiran ni'in bondar huatan ulih dipocayo'i. Tuhatn Allah inyo moonju' Roh-Nyo ko boko nabi. Sio udah moutus molekat-Nyo pakai' monunju'an ko boko urakng inyo molayati Sio mongona'i boko hal inyo gola' paca'an tojadi.”

⁷ Yesus bopandir, “Porotiancam! Aku paca'an oca' mo datakng. Sonang-nyamancam somuo urakng inyo monuruti boko posatn doi' Allah dalapm buku ni'in!”

⁸ Aku, Yohanes, udah mondinga' huatan moniant somuonyo nantai. Lopas jadi aku mondinga' huatan moniantnyo, aku lansukng tokosungkapm di pohadapan kaki molekat inyo udah monunju'an somuonyo nantai ko aku. Aku bomasud pakai' monyombah io.

⁹ Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai ongko boko somadikan kolai boko nabi ongko somuo urakng inyo monuruti somuo posatn dalapm buku ni'in. Sombah Allah aja'am.”

¹⁰ Lalu io bopandir ko aku, “Jangan kolai morahasiaan boko posatn doi' Allah dalapm buku ni'in. Obai kinyo manah agi' somuonyo ni'in tajahan tojadi.

¹¹ Oca' urakng inyo jahat hala bulah kojahatan. Oca' urakng inyo bodosa, hala bulah hal inyo buru'. Apo oca' urakng inyo hidup bondar di hadapan Allah, hala bulah inyo bondar. Oca' urakng inyo hidup kudus, torus hidup agatn caro inyo kudus.”

¹² Yesus bopandir, “Porotiancam! Aku paca'an oca'mo datakng. Aku mombaba' upah pakai' mombalas sotiap urakng sosuai agatn porbuatannyo.

¹³ Aku ninam Alpa ongko Omega, inyo Potamo ongko inyo Toahir, inyo ada'an doi' mulo watu dunia dipulah sampai dunia lonyap.”

¹⁴ Sonang nyamanam cam somuo urakng inyo monopasi jubah sia'. Sia' paca'an dapat hak pakai' bopua' buah doi' kayu inyo moonji'i kohidupan. Sia' paca'an ulih mansu' ko dalapm kota nantai molalu'i boko pintu gerbakngnyo.

¹⁵ Apo somuo urakng bukai paca'an tinggal di luar. Ia'an somuo urakng inyo jahat samo sama'an kudu', boko tukakng sihir, boko urakng inyo bodosa bomporajoan, boko urakng inyo mombunuh, boko urakng inyo monyombah lompatukng, boko urakng inyo gala' bulah kotumbukan huatan molabuhannyo.

¹⁶ Yesus bopandir, “Aku udah moutus molekat-Ku pakai' momadahannyo ko kaitn mongona'i somuonyo ni'in. Nantai pakai' kopontikan boko jomaat. Aku ninam Koturutan doi' Rajo Daud. Aku ia'an Bintakng Timur inyo torakng nantai.”

¹⁷ Roh Allah huatan Pongantitn botina' bopandir, “Hincapm, datakngcam!” Oca' somuo urakng inyo mondinga'nyo nantai bopandir, “Hincapm, datakngcam!” Oca' somuo urakng inyo korahakan, somuo urakng inyo honda' minum, datakng jam. Sia' ulih monguti' modas ara'i inyo moonji'i kohidupan.

¹⁸ Aku, Yohanes, moonju' poringant'an ni'in ko somuo urakng inyo mondinga'an boko posatn doi' Allah dalapm buku ni'in: “Aman ado urakng inyo monambahan suti' pan ko pomandiran dalapm buku ni'in, jadi Allah paca'an monambahan hukupan ko io. Ia'an nantai io paca'an dihukupm agatn boko malopotako inyo totulis dalapm buku ni'in.

¹⁹ Ubo nian jam aman ado urakng inyo monguraki suti' pan boko posatn doi' Allah dalapm buku ni'in. Jadi, Allah paca'an monguti' doi' io somuo borokat inyo totulis dalapm buku ni'in. Ia'an nantai Allah paca'an monguti' haknyo pakai' bopua' doi' kayu inyo moonji'i kohidupan. Io culih diapm di dalapm kota kudus nantai.”

²⁰ Yesus inyo momadahan somuo borito ni'in. Sio bopandir, “Au! Aku paca'an oca'mo datakng!” Amin! Datakngcam Yesus, Tuhatn.

²¹ Aku bodoa oca' Tuhatn Yesus monunju'an koboi'an-Nyo ko kaitn somuo. Amin!