Wahyu 21 - Porjanjian Boharu Torjomahan Baso Dilakng Soari-ari

Langit boharu agatn bumi boharu

¹ Lopas nian aku moniant ado langit inyo boharu ongko bumi inyo boharu. Obai langit potamo ongko bumi potamo udah lonyap am. Lout pan conyiant.

² Aku pan moniant kota inyo kudus, ia'an Yerusalem inyo boharu. Kota nantai turutn doi' sorugo, doi' Allah. Kota nantai boi' bondar samo sama'an pongantitn botina' inyo borias siap bosandikng agatn pongantitn lolaki.

³ Lalu aku mondinga' saro inyo borakng doi' tahta nantai. Katonyo, “Tiatcam! Kodiapan Allah ado di tongah-tongah monsio. Sio paca'an bodiapm bosamo agatn sia'. Sia' paca'an monjadi umat-Nyo. Sio siku' paca'an monyoroto'i sia', monjadi Allah sia'.

⁴ Sio paca'an mohapus somuo ara'i mato doi' mato sia'. Boko urakng kinyo paca'an mati agi', kinyo paca'an bulikng agi', kinyo paca'an monangis agi', kinyo paca'an mooso kompodihan agi'. Obai, boko hal inyo manah nantai udah dihilakanam.”

⁵ Allah inyo dudu' di pucu' tahta nantai bopandir, “Tiatcam! Aku bulah somuo hal monjadi boharu!” Sio pan bopandir ko aku, “Tuliscam ni'inan, obai somuo pomandiran ni'in bondar huatan ulih dipocayo.”

⁶ Sio pan bopandir ko aku, “Somuonyo udah jadiam! Aku ninam Alpa ongko Omega, inyo Potamo huatan inyo Toahir. Somuo urakng inyo korahakan, Aku paca'an moonji'i modas ko sia' minum doi' mato ara'i inyo moonji'i kohidupan.

⁷ Sotiap urakng inyo monang paca'an monorima' somuonyo nantai. Aku paca'an monjadi Allahnyo. Sio paca'an monjadi ana'-Ku.

⁸ Apo boko urakng ponggola'an, boko urakng inyo kinyo pocayo, boko urakng inyo jahat, boko urakng pombunuh, boko urakng inyo bodosa pombotina', boko tukakng sihir, boko urakng inyo monyombah lompatukng, boko urakng tumbukan, somuo sia' paca'an ditikapan ko dalapm loutan api inyo tongahan bonyalo agatn bolerang. Nantai damonyo komatian koduo, ia'an mati pakai' somanah-manahnyo.”

Yerusalem boharu

⁹ Lopas nian, ado salah siku' doi' kotujuh molekat inyo monjujut mangku' inyo bisi agatn kotujuh malopotako toahir nantai. Sio datakng ko aku, lalu bopandir, “Mara! Aku paca'an monunju'an ko kolai Pongantitn Botina', bini Ana' Domba.”

¹⁰ Jadi, Roh Allah monguaso'iku lalu molekat nantai mombaba' aku ko pucu' gunung inyo bosar huatan kotakan tinggi. Sio monunju'an ko aku kota inyo kudus nantai, ia'an Yerusalem inyo boharu. Kota nantai turutn doi' sorugo, doi' Allah.

¹¹ Kota nantai bisi agatn komulia'an Allah. Randainyo samo sama'an batu pormato inyo kotakng boi', sama'an yaspis, putih torus samo sama'an kristal.

^12-13 Ado dindikng bosar huatan tinggi inyo mongoliliki kota nantai. Ado duo bolas pintu gerbakng di dindikngnyo, tigo di sopia' timur, tigo di sopia' utara, tigo di sopia' solatatn, tigo di sopia' barat. Ado jam duo bolas molekat, siku' di sotiap pintu gerbakng nantai. Di sotiap pintu gerbakng totulis damo doi' koduo bolas suku banso Israel.

¹⁴ Dindikng kota nantai jam ado duo bolas batu pondasi. Di sotiap batu nantai totulis damo doi' koduo bolas rasul Ana' Domba nantai.

¹⁵ Molekat inyo bopandir ko aku nantai ado tungkah poukur inyo dipulah doi' omas. Tungkah nantai dipakai pakai' moukur kota nantai agatn dindikngnyo ongko boko pintu gerbakngnyo.

¹⁶ Kota nantai bobontu' segi ompat, panjakngnyo samo agatn luarnyo. Molekat nantai moukur kota agatn tungkah nantaiam, panjakngnyo duo ribu ompat ratus pal, luar ongko tingginyo pan samo.

¹⁷ Sio pan moukur dindikngnyo, tingginyo onam puluh meter. Ukuran inyo dipakai molekat nantai ia'an ukuran biaso inyo dipakai monsio.

¹⁸ Dindikng nantai dipulah doi' batu pormato yaspis. Sodakan kota nantai dipulah doi' omas murni, samo sama'an kaco inyo putih torus.

¹⁹ Boko batu pondasi dindikng kota nantai dihiasi agatn somuo macapm batu pormato. Dasar inyo potamo agatn batu mirah inyo disobut batu yaspis, dasar koduo agatn batu biru tuho inyo disobut batu nilam, inyo kotigo agatn batu hijau muda' inyo disobut batu yakut, inyo koompat batu hijau tuho inyo disobut batu jamrud,

²⁰ inyo kolima' batu mirah inyo disobut batu baiduri sepah, inyo koonam batu mirah tuho inyo disobut batu delima, inyo kotujuh batu kuning inyo disobut batu ratna cempaka, inyo kodolapatn batu biru inyo disobut batu beril, inyo kosombilatn batu kuning inyo disobut batu krisolit, inyo kosopuluh batu inyo disobut batu krisopras, inyo kosobolas batu jingga inyo disobut batu lazuardi huatan inyo koduo bolas batu ungu inyo disobut batu kocubukng.

²¹ Koduo bolas lawakng gerbakngnyo todiri doi' duo bolas mutiara inyo kotakan bosar. Masikng-masikng lawakng dipulah doi' sobigi' mutiara mo! Boko jalatn di kota nantai dipulah doi' omas murni, samo sama'an kaco inyo putih torus.

²² Aku co moniant Rumah Allah di dalapm kota nantai. Obai, Tuhatn Allah inyo Maho Kuaso ongko Ana' Domba nantai am Rumah Allah pakai' kota nantai.

²³ Kota nantai kinyo momontikan matoari damo bulatn pakai' monorakinyo. Obai, cohayo doi' komulia'an Allah monorakinyo. Ana' Domba nantai pan monjadi samo sama'an lampu pakai' kota nantai.

²⁴ Boko banso paca'an bojalatn di dalapm cohayonyo. Boko rajo di dunia paca'an mombaba' kodampuan sia' ko dalapm kota nantai.

²⁵ Boko lawakng gerbakng kota nantai paca'an tobuka' sari tumbas; cokalo ditutup, obai conyiant ado malapmnyo di santai.

²⁶ Kodampuan huatan kohormatan doi' somuo banso paca'an dibaba' ko dalapm kota nantai.

²⁷ Apo somuo inyo campah culih dibaba' mansu' ko dalapm kota nantai. Ubo nian jam boko urakng inyo molabuhan kojahatan huatan tumbukan. Inyo ulih mansu' bayo sia' inyo damonyo totulis dalapm buku Ana' Domba nantai, ia'an Buku Kohidupan.