Wahyu 20 - Porjanjian Boharu Torjomahan Baso Dilakng Soari-ari

Poniant'an mongona'i Koraja'an Soribu Tohutn Rajo Sitatn ditangkap (20:1-3)

¹ Lopas nian, aku moniant siku' molekat turutn doi' sorugo. Di jarinyo, io monjujut kunci Jurakng Maut ongko rantai inyo kotakan bosar.

^2-3 Io monangkap nago nantai, ia'an ular nantai doi' joman komai, Si ular tuho, ia'an Si Iblis, Rajo Sitatn. Molekat nantai mongobat Rajo Sitatn, ditikapannyo ko dalapm Jurakng Maut, lalu mongunci lawakngnyo pakai' soribu tohutn manahnyo. Rajo Sitatn ditahatn disiatntai oca' culihnyo monipu somuo urakng di dunia sampai masa soribu tohutn nantai udah habis. (Lopas nian, io paca'an dilopasan agi', apo ongkah pakai' watu inyo kinyo manah).

Yesus momorintah bosamo agatn boko urakng inyo dibunuh obai sia' momboritoan mongona'i Sio (20:4-6)

⁴ Lalu, aku moniant boko tahta. Boko urakng inyo dudu' di pucu'nyo dionji'i kuaso pakai' mohakipi. Aku pan moniant boko jiwa sia' inyo diponggal kopala'nyo obai sia' bosasi mongona'i Yesus ongko momboritoan Pomandiran doi' Allah. Ia'an sia' inyo co monyombah bonatakng ongko lompatukng nantai, sia' inyo kinyo monorima' tando bonatakng nantai di koning huatan jarinyo. Sia' hidup agi' lalu momorintah sobagai rajo bosamo Kristus somanah soribu tohutn nantai.

⁵ Ninam potamo kalinyo boko urakng mati dihidupan agi'. (Apo boko urakng mati inyo bukainyo kinyo bobali' dihidupan agi' sampai masa soribu tohutn nantai udah habis.)

⁶ Sonang-nyaman boko urakng inyo bobali' hidup agi' watu tahap potamo ni'in. Sia' nianam boko urakng inyo husus umputn Allah. Sia' kinyo paca'an moalapi komatian koduo kalinyo, ia'an mati somanah-manahnyo. Apo sia' paca'an monjadi boko imam inyo molayati Allah ongko Kristus. Sia' paca'an momorintah bosamo Sio somanah soribu tohutn nantai.

Rajo Sitatn dikalahan pakai' somanah-manahnyo (20:7-10)

⁷ Lopas masa soribu tohutn nian udah habis, Rajo Sitatn paca'an dilopasan doi' ponjaranyo.

⁸ Io paca'an botula' ko soluruh dunia, monipu boko banso, ia'an Gog huatan Magog. Rajo Sitatn mongumpulan sia' pakai' boparakng molawatn boko urakng inyo pocayo. Jumlah sia' kotakan banya' sama'an pasir di lout.

⁹ Sia' botula' boponcar di soluruh dataran bumi, mongopukng kemah umant Allah huatan kota inyo dikasihi nantai. Apo api turutn doi' langit, momusnahan sia'.

¹⁰ Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

Boko urakng dihakipi

¹¹ Lopas nian, aku moniant tahta putih inyo bosar. Aku moniant Sio inyo dudu' di pucu'nyo. Soluruh langit ongko bumi lonyap doi' pohadapan-Nyo huatan kinyo ditomuan agi' tompatnyo.

¹² Aku moniant boko urakng mati bodiritn di pohadapan tahta nantai, ia'an boko urakng inyo pontikng ongko inyo kinyo pontikng. Boko buku dibuka' ongko buku inyo bukai, ia'an Buku Kohidupan pan dibuka'. Somuo urakng mati nantai dihakipi sosuai agatn tulisan inyo ado di dalapm boko buku nantai, ia'an somuo porbuatan sia' siku'-monyiku'.

¹³ Lalu lout monyorahan boko urakng mati inyo ado di dalapmnyo pakai' dihakipi. Ubo nian jam Maut ongko Koraja'an Maut monyorahan boko urakng mati inyo ado di dalapmnyo. Somuo sia' dihakipi sosuai agatn porbuatan sia' siku'-monyiku'.

^14-15 Sotiap urakng inyo damonyo kinyo totulis dalapm Buku Kohidupan nantai, io dibuakan ko dalapm loutan api nantai. Nantai inyo dimasud agatn komatian koduo, ia'an mati somanah-manahnyo. Maut ongko Koraja'an Maut dibuakan ko dalapm loutan api nantai jam.