Wahyu 2 - Porjanjian Boharu Torjomahan Baso Dilakng Soari-ari

Pomandiran Yesus ko jomaat di kota Efesus

¹ “Tuliscam pomandiran ni'in ko molekat inyo monjago jomaat di Efesus: Pomandiran ni'in doi' Sio, inyo monjujut kotujuh bintakng nantai di jari kanan-Nyo; doi' Sio inyo bojalatn di sapat kotujuh tihakng tompat molota'an pompolitoan nantai inyo dipulah doi' omas.

² Aku tohu somuo inyo kaitn labuhan, ia'an kaitn bojuakng, kaitn botahatn mohadapi ajab sonsaro. Aku tohu obai kaitn molawatn boko urakng jahat. Kaitn udah mouji boko urakng inyo mongaku' dirinyo rasul, padohal bukainyo. Kaitn udah sadar sia' tumbukan.

³ Kaitn sabar, botahatn mohadapi ajab sonsaro obai damo-Ku. Kaitn co putus asa.

⁴ Apo, Aku moolikan kaitn mongona'i hal ni'in: Kaitn conyiant ado kasih agi' sama'an komai watu kaitn hoyu' pocayo ko aku.

⁵ Jadi, ingant cam kotakan jouham kaitn udah jatu'. Tongga'an cam boko dosa kaitn ongko labuhancam la'apo inyo kaitn labuhan sama'an somulonyo. Aman cado, nononyo Aku paca'an datakng ko kaitn lalu monguti' tihakng pompolitoan kaitn doi' tompatnyo.

⁶ Apo ado hal boi' inyo kaitn labuhan, ia'an nantai: Kaitn bonci'an boko porbuatan boko urakng inyo monuruti ajaran Nikolaus. Aku pan mombonci' jam boko kolaku'an inyo jahat nian.

⁷ Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moijitan sia' makatn doi' kayu inyo moonji'i kohidupan inyo ado di kobutn Allah.”

Pomandiran Yesus ko jomaat di kota Smirna

⁸ “Tuliscam pomandiran ni'in ko molekat inyo monjago jomaat di Smirna: Pomandiran ni'in doi' Sio, inyo Potamo ongko inyo Toahir, Sio udah mati apo hidup agi'.

⁹ Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!

¹⁰ Jangan gola' biar pan co manah agi' kaitn paca'an ajab sonsaro. Porotiancam, Rajo Sitatn paca'an moncubo mombulah sobagi'an doi' kaitn oca' co pocayo ko aku agi'. Kaitn paca'an ditikapan ko dalapm ponjara lalu didorako'i sopuluh ari manahnyo. Apo kaitn gola' sotia ko aku, biar pan sampai mati. Lalu, Aku paca'an moonji'i ko kaitn kohidupan kokal di sorugo.

¹¹ Sopo pan inyo ulih mondinga', kohonda'nyo io borotian somuo pomandiran Roh Allah ko boko jomaat. Boko urakng inyo monang co paca'an sonsaro komatian koduo, ia'an nantai hukupan somanah-manahnyo.”

Pomandiran Yesus ko jomaat di kota Pergamus

¹² “Tuliscam pomandiran ni'in ko molekat inyo monjago jomaat di Pergamus: Pomandiran ni'in doi' Sio, inyo monjujut podakng tajapm inyo bomato duo.

¹³ Aku tohu obai kota kaitn ia'an tompat tahta Rajo Sitatn. Apo kaitn totap sotia ko aku. Somadikan Antipas momboritoan mongona'i Aku agatn sotia. Sio dibunuh di kota kaitn, ia'an nantai kota tompat kodiapan Rajo Sitatn. Biar pan ubo nantai, watu nantai kaitn totap moaku'i obai kaitn pocayo ko Aku.

¹⁴ Apo, Aku moolikan kaitn obai boboropo hal ni'in: Ado boboropo urakng di antaro kaitn inyo tuyut ajaran salah samo sama'an ajaran Bileam joman komai. Bileam mongajar Balak pakai' bulah urakng Israel jatu' ko dalapm dosa, ia'an oca' sia' bopua' dagikng doi' bonatakng inyo diposombahan ko songiang-duato, ongko oca' sia' bulah dosa bomporajoan.

¹⁵ Ubo nian jam, di antaro kaitn ado boko urakng inyo tuyut ajaran Nikolaus.

¹⁶ Jadi, tinggalan cam boko dosa nian. Aman cado, Aku paca'an copat datakng ko kaitn lalu monyorakng sia' nantai agatn podakng inyo ado di nyao-Ku.

¹⁷ Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moonju' doi' pomakatn bodamoan manna inyo kinyo kotohuan di mono tompatnyo. Aku pan paca'an moonji'i sobuah batu putih ko sia' siku'-monyiku'. Di batu nantai totulis damo boharu, inyo kinyo dikotohu'i urakng bukai. Bayo urakng inyo monorima' batu nantaiam paca'an mongotohu'i damo nantai.”

Pomandiran Yesus ko jomaat di kota Tiatira

¹⁸ “Tuliscam pomandiran ni'in ko molekat inyo monjago jomaat di Tiatira: Pomandiran ni'in doi' ana' Allah, inyo mato-Nyo sama'an api huatan kaki-Nyo sama'an tombago

¹⁹ Aku tohu somuo inyo kaitn labuhan, ia'an kaitn mongasihi urakng bukai, kaitn pocayo ko aku, kaitn bokorojo molayati Aku, kaitn botahatn mohadapi ajab sonsaro. Aku tohu kaitn molabuhan lobih banya' porbuatan boi' watu ni'in daripado komai watu kaitn hoyu' pocayo ko aku.

²⁰ Apo, Aku moolikan kaitn mongona'i hal ni'in: Kaitn mombiaran botina' nantai, Izebel, monyosat'an umant-Ku. Io mongaku' dirinyo nabi, apo io udah monipu boko hulutn-Ku. Io mongajar oca' sia' bulah dosa bomporajoan, ongko oca' sia' makatn dagikng doi' bonatakng inyo diposombahan ko songiang-duato.

²¹ Aku udah moonju' botina' nantai watu pakai' moninggalan boko dosanyo. Apo, io co honda' botongga' bulah dosa bomporajoan.

²² Porotiancam! Io paca'an toposo ongkah tomolantakng di kotidu'annyoam, obai Aku paca'an mohukupm io agatn ponyakit payah. Sama'an nian jam boko urakng inyo bulah dosa bomporajoan agatn io. Aman sia' co botongga' bulah dosa nantai, sia' nononyo kotakan mondorita'.

²³ Aku paca'an mombunuh boko urakng inyo tuyut ajaran botina' nantai. Agatn ubo nian, somuo jomaat paca'an mongotohu'i ni'in: Akunam inyo mouji pikiran ongko hati monsio. Akunam inyo mombalas kaitn siku'-monyiku' monurut porbuatan kaitn.

²⁴ Apo ko boko urakng bukai di Tiatira, kaitn inyo co tuyut ajaran jahat nantai, kaitn inyo monula' ajaran nantai inyo disobut pongotohuan doi' Rajo Sitatn, ko kaitn Aku bopandir: Aku cuku paca'an monambahi bobatn bukainyo ko kolai.

²⁵ Apo pas Aku datakng nononyo, honda'nyo kaitn totap moikuti la'apo inyo udah umputn kaitn.

²⁶ Ko boko urakng inyo monang, boko urakng inyo molabuhan kohonda'-Ku sampai ahir dunia, Aku paca'an moonju' ko sia' kuaso di pucu' boko banso.

²⁷ Sia' paca'an momorintah agatn longan bosi pakai' mohancuran somuo musuh samo sama'an poriu' tanah. Nianam kuaso samo sama'an Bopai-Ku onju' ko aku.

²⁸ Ko boko urakng inyo monang, Aku jam paca'an moonju' bintakng timur.

²⁹ Ko sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat.”