Wahyu 19 - Porjanjian Boharu Torjomahan Baso Dilakng Soari-ari

Pujian di sorugo obai Allah udah mohukupm kota Babel nantai

¹ Lopas jadi nantai aku mondinga' bunyi lou' samo sama'an saro borakng doi' urakng banya' di sorugo. Kato sia', “Haleluya! Allah kito inyo monyolamant'an. Sio inyo mulia huatan bokuaso.

² Pujicam Sio obai Sio mohakipi agatn bondar huatan adil. Sio udah mohukupm kota inyo bosar nantai. Kota nantai samo sama'an lahukng inyo morusa'an dunia agatn dosa bomporajoan. Lahukng nantai jam mombunuh boko urakng inyo molayati Allah agatn jarinyo siku'. Apo, Allah udah mohukupm io pakai' mombalas porbuatan jahat nantai.”

³ Sokali agi' urakng banya' di sorugo bopandir, “Haleluya! Ansap api inyo mombonasoan kota nantai noi' ko pucu' kinyo tohu botongga'!”

⁴ Koduo puluh ompat pomimpitn huatan koompat mahluk nantai lansukng tundu' monyungkapan huatan monyombah Allah inyo dudu' di tahta nantai. Sia' bopandir, “Amin! Haleluya!”

⁵ Lalu ado saro doi' tahta nantai. Katonyo, “Pujicam Allah kito, oi somuo urakng inyo molayati Sio, somuo urakng inyo mohormati Sio, urakng pontikng huatan urakng inyo kinyo pontikng!”

Boko urakng pocayo digambaran ubo pongantitn Ana' Domba

⁶ Lopas jadi aku mondinga' bunyi sama'an saro borakng doi' banya' urakng. Saro nantai borakng sama'an bunyi guruh golumbakng lout, sama'an bunyi guntur solitar. Sia' bopandir, “Haleluya! Pujicam Tuhatn Allah kito inyo Maho Kuaso obai Sio udah momorintah.

⁷ Maracam kito bosonang-sonang huatan bonyanyi-bosair. Pujicam Sio obai ari kawitan Ana' Domba nantai udah watunyoam. Pongantitn-Nyo udah siap.

⁸ Pongantitn-Nyo dionji'i pakai'an doi' koitn lenan lombut, inyo putih borosih ongko mongkilap!” Koitn lenan nantai monggambaran boko porbuatan boi' inyo dilabuhan boko urakng umant umputn Allah.

⁹ Lalu, molekat nantai bopandir ko aku, “Tuliscam ni'in: Bahagiacam boko urakng inyo dihundakng ko pogai kawitn Ana' Domba nantai.” Molekat nantai jam bopandir ko aku, “Nantaiam boko pomandiran inyo bondar doi' Allah!”

¹⁰ Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Yesus mongalahan somuo inyo boparakng molawatn Sio

¹¹ Lopas nian, aku moniant sorugo tobuka', wah, ado siku' kuda putih. Urakng inyo monunggaki kuda nantai bodamoan “Inyo Sotia” huatan “Inyo Bondar”. Sio mohakipi huatan boparakng agatn adil.

¹² Mato-Nyo sama'an api tongahan bonyalo. Sio ado banya' mahkota di kopala'-Nyo. Ado damo totulis di Sio inyo kinyo dikotohu'i sopo pan, solaitn Sio siku'.

¹³ Sio momakai jubah inyo udah diconcah ko darah. Sio jam bodamoan “Pandir Doi' Allah”.

¹⁴ Somuo tontara sorugo tuyut Sio monunggakng kuda putih jam. Sia' momakai pakai'an doi' koitn lenan lombut inyo putih borosih.

¹⁵ Sio ado podakng tajapm inyo koluar doi' nyao-Nyo. Agatn podakng nantai, Sio paca'an mongalahan boko banso. Sio paca'an momorintah sia' agatn tungkah bosi. Sio inyo paca'an momoyah anggurnyo di dalapm tompat pomoyahan anggur nantai, ia'an tompat inyo molambakan ponggodi Allah Inyo Maho Kuaso.

¹⁶ Dijubah-Nyo huatan paho-Nyo totulis damo ni'in, “Rajo inyo bokuaso di pucu' boko rajo, Tuhatn di pucu' boko habakng.”

¹⁷ Lalu, aku moniant siku' molekat bodiritn di pucu' matoari. Sio moningkau kotakan borakng ko somuo burukng inyo trobakng tinggi di langit. Katonyo, “Maracam bokumpul pakai' makatn bosar inyo disiapan Allah!

¹⁸ Bopua' dagikng doi' somuo bangkai rajo, somuo komandatn tontara, somuo pahlawan, somuo kuda huatan boko urakng inyo monunggakngnyo. Bopua' dagikng doi' somuo urakng musuh-Nyo, inyo pacal huatan inyo merdeka, inyo pontikng huatan inyo kinyo pontikng!”

¹⁹ Lalu, aku moniant bonatakng nantai, boko rajo di bumi huatan boko tontara sia' bokumpul. Sia' somuo bokumpul pakai' boparakng molawatn Urakng inyo monunggakng kuda nantai huatan tontara-Nyo.

²⁰ Bonatakng nantai ditangkap bosamo-samo agatn nabi palsu nantai, ia'an io inyo bulah boko mujisat nantai di hadapan mato bonatakng nantai. Agatn boko mujisat nantai, io monipu boko urakng inyo ado tando bonatakng nantai, boko urakng inyo monyombah lompatukng bonatakng nantai. Jadi, bonatakng huatan nabi palsu nantai dibuakan hidup-hidup ko dalapm loutan api inyo tongahan bonyalo agatn bolerang.

²¹ Urakng inyo monunggakng kuda nantai mombunuh somuo musuh-Nyo inyo bukai agatn podakng, ia'an podakng inyo koluar doi' nyao-Nyo. Somuo burukng konyang momua'i dagikng doi' boko bangkai nantai.