Wahyu 18 - Porjanjian Boharu Torjomahan Baso Dilakng Soari-ari

Allah mohukupm kota Babel

¹ Lopas nantai, aku moniant siku' molekat inyo bukai turutn doi' sorugo. Io bokuaso bosar. Bumi monjadi torakng obai cohayo komulia'annyo.

² Molekat nantai mondongkakng-mondorah agatn saro kotakng borakng. Katonyo, “Kota Babel udah rontap! Kota bosar nantai udah rontap! Kota nantai udah monjadi sayakng pakai' boko roh jahat, tompat pontapuan boko roh campah tompat pontapuan somuo burukng campah huatan kobonci' urakng.

³ Obai, somuo banso udah minum anggur pomporajoannyo. Boko rajo di dunia udah bulah dosa bomporajoan agatn io. Boko podagakng di dunia monjadi dampu obai napsunyo kinyo tokondalian nantai.”

⁴ Lalu aku mondinga' saro doi' sorugo. Kato-Nyo, “Ui, umant-Ku! Kaitn gola' rari doi' io. Koluarcam, oca' kaitn co monjumpati boko dosanyo. Oca' kaitn co jumpat dihukupm agatn boko malopotakonyo.

⁵ Somuo dosanyo udah botumpu'-tumpu' sampai ko langit. Jadi, Allah moingant pakai' mohukupm io obai boko porbuatannyo inyo jahat.

⁶ Pulahcam ko io samo sama'an io pulah ko urakng bukai. Balascam io duo kali lipat pakai' somuo porbuatannyo inyo jahat. Isicam cangkirnyo agatn minuman inyo duo kali lipat lobih koras.

⁷ Io udah monikmati hidup inyo tohormat huatan mewah socaro luar biaso. Jadi watu ni'in, pulahcam io sonsaro huatan bulikng socaro luar biaso jam. Obai io bopandir dalapm hatinyo, ‘Aku ninam ratu inyo momorintah! Aku bukainyo balu. Aku co paca'an kalo mooso bulikng!’

⁸ Obai nantaiam, Tuhatn Allah mohakipi io. Somuo malopotako paca'an moninggakng io dalapm soari mo, ia'an io paca'an kona' poranggapan ongko bulikng huatan kolaparan. Io jam paca'an dibonasoan agatn api. Somuo nantai paca'an tojadi obai Tuhatn Allah inyo mohakipi io kotakng bokuaso.”

⁹ Boko rajo di dunia inyo udah bulah dosa bomporajoan agatn io, inyo udah hidup mewah agatn io, sia' paca'an moniant ansap api inyo mombonasoannyo. Watu nantai, sia' paca'an monangis huatan bulikng obai io.

¹⁰ Sia' paca'an bodiritn doi' jouh obai gola' kona' siksa'annyo jam. Kato sia', “Bonaso kota Babel inyo komai kuat! Bonaso kota bosar nantai! Obai, kolai paca'an oca' dihukupm, dalapm sojapm aja' hukupan kolai udah dilabuhan.”

¹¹ Boko podagakng di dunia pan monangis huatan bulikng obai io. Sia' bulikng obai conyiant ado urakng agi' inyo momboli bando barakng dagakan sia',

¹² ia'an barakng dipulah doi' omas, pira', mutiara ongko batu pormato inyo bukai; barakng doi' koitn lenan, koitn ungu, koitn sutra, ongko koitn mirah; somuo macapm barakng doi' kayu inyo harupm; barakng doi' gadikng, kayu mahal, tombago, bosi, pualam;

¹³ somuo macapm rorompahan, kayu manis, wangi-wangian, mur, huatan komonyan; anggur, minya', topukng dona' huatan gandupm; sapi, domba, kuda ongko koreta; pacal huatan nyao monsio.

¹⁴ Boko podagakng nantai paca'an bopandir, “Oh, Kota Babel! Udah hilakng somuo barakng mahal inyo hati kaitn kohonda'i. Somuo la'apo pan inyo mewah huatan boi' udah hilakng jam. Kolai co paca'an kalo monomuannyo agi'!”

¹⁵ Boko podagakng nantai inyo udah monjadi dampu obai bodagakng di kota nantai, sia' paca'an bodiritn doi' jouh obai gola' kona' siksa'annyo jam. Sia' paca'an monangis huatan bulikng.

¹⁶ Kato sia', “Bonaso, bonaso kota bosar nantai. Komai kolai momakai pakai'an mahal inyo dipulah doi' koitn lenan, koitn ungu, huatan koitn mirah. Komai kolai momakai boko pohiasan doi' omas, mutiara, ongko boko bomacapm pormato bukai. Apo kolai bonaso obai somuo kodampuan nantai udah hilakng dalapm so japm mo!”

¹⁷ Somuo pongomudi kapal, somuo urakng inyo jumpat kapal, somuo ana' buah kapal, huatan somuo urakng inyo bodagakng molalu'i lout, sia' somuo paca'an bodiritn doi' jouh jam.

¹⁸ Sia' paca'an moniant ansap api inyo mombonasoan kota nantai. Watu nantai, sia' paca'an mondongkakng-mondorah, “Co nyiant kota bukainyo inyo samo sama'an bosarnyo agatn kota bosar ni'in!”

¹⁹ Sia' monangis kapikan moabur habu di kopala' sia' sobagai tando bulikng. Kato sia', “Bonaso, bonaso kota bosar nantai. Komai somuo urakng inyo umputn kapal di lout monjadi dampu obai bodagakng barakng kolai inyo mahal. Apo kolai bonaso obai kolai udah paca'an dibonasoan dalapm so japm mo!”

²⁰ (Ui kaitn somuo di sorugo! Sonang-nyamancam! Ui kaitn boko urakng kudus, boko rasul, huatan boko nabi! Sonang-nyamancam! Obai, Allah udah mohukupm kota nantai sosuai agatn porbuatannyo inyo jahat agatn kaitn).

²¹ Lopas nian siku' molekat inyo kuat moangkat sobigi' batu inyo kotakan bosar, sobosar batu gilikan. Sio monikapannyo ko dalapm lout. Katonyo, “Agatn caro koras sama'an ninam, kota Babel inyo bosar nantai paca'an dibonasoan. Kota Babel, kolai co paca'an kotomuan agi'.

²² Bunyi musik co paca'an kalo kodinga'an agi' di dalapm kolai. Co paca'an ado bunyi agi' doi' boko ponyanyi, boko pomain kocapi, sulikng huatan trompet. Somuo urakng ahli dalapm somuo macapm pokoroja'an co paca'an kotomuan agi' di dalapm kolai. Bunyi doi' halu inyo monutu gandupm co paca'an kodinga'an agi' di dalapm kolai.

²³ Randai pompolitoan co paca'an borandai agi' di dalapm kolai. Saro rindakng-ramai doi' mompelai lolaki ongko pongantitn botina' co paca'an kodinga'an agi' di dalapm kolai. Obai boko podagakng kolai ia'an boko urakng pontikng di dunia. Kolai jam monipu somuo banso agatn ilmu sihir kolai.”

²⁴ (Kota nantai dihukupm obai io mombunuh boko nabi huatan boko urakng umant husus umputn Allah. Darah sia' huatan darah doi' somuo urakng inyo dibunuh di bumi kotomuan di dalapm io.)