Wahyu 17 - Porjanjian Boharu Torjomahan Baso Dilakng Soari-ari

Kota Babel dibandikan agatn siku' lahukng

¹ Lopas nian, datakam salah siku' doi' kotujuh molekat inyo monjujut tujuh mangku' nantai. Io bopandir ko aku, “Mara! Aku paca'an monunju'an ko kolai hukupan inyo paca'an tojadi ko lahukng tokonal inyo dudu' di tompat agatn banya' ara'i.

² Boko rajo di dunia udah bulah dosa pomporajoan agatn io. Huatan boko urakng di bumi komabu'an obai minum anggur pomporajoan.”

³ Jadi, dalapm poniant'anku inyo dionju' Roh Allah, molekat nantai mombaba' ku ko padakng pasir. Di santai, aku moniant siku' botina' dudu' di pucu' bonatakng inyo bowarna mirah tuho nantai. Dibonatakng nantai banya' tulisan inyo mongutu' Allah. Bonatakng nantai bokopala' tujuh huatan botandu' sopuluh.

⁴ Botina' nantai momakai pakai'an mahal inyo dipulah doi' koitn ungu ongko koitn mirah. Io momakai boko pohiasan doi' omas, mutiara, ongko boko batu pormato inyo bukai. Di jarinyo ado cangkir omas bisi agatn isi inyo molambakan porbuatannyo inyo jahat ongko boko dosa pomporajoan.

⁵ Di koningnyo totulis damo rahasia, ia'an: “Kota Babel inyo bosar. Indai doi' somuo lahukng. Indai somuo porbuatan inyo jahat di dunia.”

⁶ Aku moniant botina' nantai komabu'an obai minum darah boko urakng kudus, ia'an boko urakng inyo dibunuh obai sia' momboritoan mongona'i Yesus. Pas aku moniant botina' nantai, aku kotakan hiratn.

⁷ Apo molekat nantai bopandir ko aku, “Hibo kolai hiratn? Aku paca'an monjolasan ko kolai rotinyo doi' poniant'an nantai, ia'an poniant'an mongona'i botina' nantai ongko bonatakng inyo ditunggakinyo, bonatakng inyo bokopala' tujuh ongko botandu' sopuluh.

⁸ Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.

⁹ Aman honda' mongoroti, gola' bopikir agatn bijaksana. Kotujuh kopala' bonatakng nantaiam monggambaran tujuh bukit, ia'an boko bukit tompat botina' nantai dudu'.

¹⁰ Kotujuh kopala' nantai pan monggambaran tujuh rajo: Lima' rajo udah jatu'. Siku' ija' momorintah sampai watu ni'in. Lalu, siku' agi' bolupm datakng. Watu rajo inyo kotujuh nantai datakng, io bayo paca'an momorintah sobontar mo.

¹¹ Bonatakng nantai inyo kalo ado huatan hilakng, ionam salah siku' doi' kotujuh rajo nantai. Io jam paca'an koluar agi' sobagai rajo inyo kodolapatn. Apo io paca'an dibonasoan.

¹² Kosopuluh tandu' bonatakng nantai inyo kolai tiat monggambaran sopuluh rajo inyo bolupm mula'i momorintah. Nononyo sia' paca'an dionji'i kuaso pakai' momorintah bosamo-samo agatn bonatakng nantai. Apo, sia' bayo paca'an momorintah somanah so japm mo.

¹³ Kosopuluh rajo nantai paca'an bohoupm. Sia' somuonyo paca'an monyorahan kuaso ongko kokuatan sia' ko bonatakng nantai.

¹⁴ Sia' paca'an boparakng molawatn Ana' Domba. Apo Ana' Domba paca'an mongalahan sia', obai Sionam Tuhatn inyo bokuaso dipucu' boko tuhatn, Rajo di pucu' somuo rajo bukai. Boko urakng inyo bosamo agatn Ana' Domba paca'an monang, ia'an sia' inyo ditingkau, inyo dipilih, inyo sotia ko Sio.”

¹⁵ Lalu, molekat nantai bopandir ko aku, “Somuo ara'i, tompat lahukng nantai dudu', inyo kolai tiat, nantai monggambaran somuo banso, rayat, negara, ongko baso.

¹⁶ Kosopuluh tandu' inyo kolai tiat nantai bosamo agatn bonatakng nantai paca'an bonci' agatn lahukng nantai. Sia' paca'an morampas somuo hal inyo umputnnyo huatan mongolanjakinyo. Sia' paca'an momua'i isinyo, lalu mombonasoannyo agatn api.

¹⁷ Apo somuo nantai tojadi obai Allah monggora'an hati sia' oca' sia' molabuhan nantai. Nantai sosuai agatn hajat Allah. Sio bulah sia' bosatu sopikiran pakai' monyorahan kuaso sia' ko bonatakng nantai. Bonatakng nantai paca'an bokuaso sampai somuonyo tojadi sosuai agatn Pomandiran Allah.

¹⁸ Nah, botina' inyo kolai tiat nantai monggambaran kota bosar nantai inyo monguaso'i dipucu' boko rajo di dunia.”