Wahyu 16 - Porjanjian Boharu Torjomahan Baso Dilakng Soari-ari

Kotujuh mangku' ni'in molambakan kotujuh malopotako toahir

¹ Lopas nian, aku mondinga' saro borakng doi' Rumah Allah inyo bopandir ko kotujuh molekat nantai. Katonyo, “Botula'cam, tumpahancam kotujuh mangku' ponggodi Allah nantai ko pucu' bumi!”

² Jadi, molekat potamo botula' monumpahan mangku'nyo ko pucu' bumi. Lalu, somuo urakng inyo ado tando bonatakng nantai, boko urakng inyo monyombah patukngnyo, somuo sia' hontapm boko bongka' inyo kotakng buru' huatan podih.

³ Molekat koduo monumpahan mangku'nyo ko pucu' lout. Lalu, ara'inyo monjadi darah, samo sama'an darah urakng mati. Somuo la'apo pan inyo hidup di lout monjadi mati.

⁴ Molekat kotigo monumpahan mangku'nyo ko pucu' somuo sungai huatan mato ara'i. Lalu, somuo ara'i nantai monjadi darah jam.

⁵ Aku mondinga' molekat inyo bokuaso dipucu' ara'i bopandir, “Oi Duatn inyo ado watu ni'in huatan inyo udah ado doi' komai. Duatn inyo kudus. Duatn mohukupm boko urakng ni'in agatn kotakng adil.

⁶ Obai sia' inyo udah mombunuh boko urakng umant Allah huatan boko nabi. Jadi, ni'in Duatn momoso sia' minum darah. Cucu' sia' dihukupm sama'an nantai.”

⁷ Lalu aku mondinga' saro doi' mesbah bopandir, “Oi, Tuhatn Allah inyo Maho Kuaso. Duatn mohakipi urakng agatn bondar huatan adil.”

⁸ Molekat koompat monumpahan mangku'nyo ko pucu' matoari. Lalu, matoari dionji'i kuaso pakai' moloburan monsio agatn api.

⁹ Jadi, hangant inyo luar biaso doi' api nantai moloburan monsio. Apo sia' totap mohanyam damo Allah, inyo bokuaso di pucu' boko malopotako nantai. Sia' kinyo botongga' bodosa lalu momuji Sio.

¹⁰ Molekat kolima' monumpahan mangku'nyo ko pucu' tahta bonatakng nantai. Jadi, koraja'an bonatakng nantai monjadi potakng. Boko urakng mongotap lidah sia' obai mooso kompodihan.

¹¹ Sia' mohanyam Allah di sorugo obai kompodihan hontapm boko bongka'. Apo sia' totap kinyo honda' botongga' bulah kojahatan.

¹² Molekat koonam monumpahan mangku'nyo ko pucu' sungai Efrat inyo bosar nantai. Lalu sungai nantai monjadi rangkai oca' boko rajo doi' timur bosamo boko tontara sia' ulih maju monyorakng.

¹³ Lalu aku moniant tigo roh jahat inyo monyorupo'i gonjau. Siku' koluar doi' nyao nago, siku' doi' nyao bonatakng potamo, huatan siku' doi' nyao nabi palsu nantai.

¹⁴ Sia' ia'an kotigo roh jahat nantai inyo mombulah boko bomacapm tando ajaib. Sia' botula' mongumpulan somuo rajo di somuo dunia pakai' boparakng watu Ari Bosar, ia'an Ari Allah Inyo Maho Kuaso mongalahan somuo la'apo pan inyo molawatn Sio.

^15-16 Boko roh jahat mongumpulan sia' di sobuah tompat. Dalapm baso Ibrani tompat nantai disobut Harmagedon. Apo Tuhatn bopandir, “Pondinga'ancam! Aku datakng samo sama'an urakng pongolit. Sonang-nyamancam urakng inyo hala siap huatan borotian pakai'annyo, oca' io co bojalatn agatn kolanjakng lalu monjadi malu di muka' umum.”

¹⁷ Molekat kotujuh monumpahan mangku'nyo ko awakng-awakng. Lalu ado saro borakng doi' dalapm Rumah Allah, doi' tahta nantai. Kato-Nyo, “Somuonyo udah jadiam!”

¹⁸ Lalu ado kilat momanjah, bunyi guntur inyo borakng, huatan gompa bumi inyo luar biaso. Doi' mulo monsio ado di bumi, co kalo ado gompa bumi inyo sama'an nantai. Gompa bumi nantai kotakng luar biaso.

¹⁹ Lalu tobolaham kota bosar nantai monjadi tigo bagian huatan loloam somuo kota banso-banso inyo kinyo mongonal Allah. Jadi koingatan Allaham agatn Babel inyo bosar nantai pakai' moonji'i ko io cangkir inyo bisi anggur ponggodi-Nyo.

²⁰ Somuo pulau hilakng tonggolapm. Somuo gunung hancur diratoan, co kotiat'an agi'am.

²¹ Hujatn es bosar jatu' doi' langit moninggakng monsio. Sotiap batu es nantai hampir lima' puluh kilu. Jadi, monsio mongutu' Allah obai malopotako hujatn es nantai kotakan nontu.