Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Wahyu 15 - Porjanjian Boharu Torjomahan Baso Dilakng Soari-ari


Boko urakng pocayo bonyanyi momuji Allah sobolupm kotujuh malopotako toahir
( 15:1-8 )

1 Lopas nian, aku moniant somacapm tando bukai di langit. Tando nantai kotakan hebat huatan mohiratan. Ni'inan tandonyo: Ado tujuh molekat agatn tujuh malopotako toahir. Kotujuh malopotako nantai ia'an boko malopotako toahir obai lopas nantai ponggodi Allah paca'an boahir.

2 Lalu aku moniant lou' sama'an loutan kaco bocampur api. Aku moniant jam boko urakng inyo udah monang doi' bonatakng huatan patukngnyo ongko monang doi' urakng inyo damonyo dilambakan agatn angka'. Boko urakng nantai bodiritn di pinggir loutan kaco nantai. Sia' siku'-monyiku' ado kocapi inyo dionju' Allah ko sia'.

3 Sia' monyanyian nyanyian Musa, hulutn Allah, huatan nyanyian Ana' Domba, ubo ni'in bunyinyo: “Tuhatn Allah Inyo Maho Kuaso! Boko porbuatan Duatn kotakan hebat huatan mohiratan. Duatam Rajo di pucu' boko banso. Boko porbuatan Duatn adil huatan bondar.

4 Boko urakng somuonyo paca'an mohormati Duatn, Au Tuhatn! Boko urakng somuonyo paca'an momuji damo Duatn. Obai ongkah Duatam inyo suci. Somuo banso paca'an datakng monyombah Duatn, obai boko urakng udah moniant Duatn mohakipi agatn bondar”.

5 Lalu, aku moniant Rumah Allah, Kemah Suci, di sorugo tongahan tobuka'.

6 Kotujuh molekat agatn kotujuh malopotako koluar doi' Rumah Allah nantai. Sotiap sia' ado pakai'an doi' koitn lenan inyo putih borosih mongkilap. Sia' ado ikat pinggakng omas di dado sia'.

7 Siku' doi' koompat mahluk moonju' sotota' mangku' omas ko kotujuh molekat nantai siku'-monyiku'. Kotujuh mangku' nantai boisi agatn ponggodi Allah, Allah inyo hidup somanah-manahnyo.

8 Rumah Allah monjadi bisi agatn ansap doi' kuaso huatan komulia'an Allah. Jadi, conyiant ado urakng inyo ulih momansu'i Rumah Allah sobolupm kotujuh malopotako doi' kotujuh molekat nantai botongga'.

ကြှနျုပျတို့နောကျလိုကျပါ:



ကြော်ငြာတွေ