Wahyu 14 - Porjanjian Boharu Torjomahan Baso Dilakng Soari-ari

Ana' Domba huatan pongikut-Nyo

¹ Lopas nian, aku moniant, wah, Ana' Domba bodiritn di bukit Sion. Bosamo agatn Sio ado soratus ompat puluh ompat ribu urakng. Di koning boko urakng nantai ado totulis damo Ana' Domba huatan damo Bopai-Nyo.

² Aku mondinga' ado saro doi' langit sama'an gonggo ara'i bah. Saro nantai borakng sama'an bunyi guntur. Saro inyo kudinga' nantai sama'an bunyi boko kocapi inyo dibunyian boko urakng.

³ Sia' monyanyian suatu nyanyian boharu di pohadapan tahta huatan koompat mahluk ongko boko pomimpitn nantai. Conyiant urakng bukai inyo ulih mompolajari nyanyian nantai kocuali soratus ompat puluh ompat ribu urakng nantai. Ia'an sia' inyo Yesus udah bebasan doi' bumi.

⁴ Sia' ia'an boko urakng inyo murni sama'an botina'-daro. Obai, sia' co momporajoan agatn boko botina'. Sia' ia'an boko urakng inyo jumpat Ana' Domba nantai ko mono pan Sio botula'. Jadi, sia' nanam inyo udah ditobus inyo monjadi bagian potamo inyo diposombahan ko Allah huatan Ana' Domba nantai.

⁵ Sia' co kalo tumbukan. Sia' murni co nyiant cacat colo.

Tigo molekat monyampaian posatn ko boko urakng di bumi

⁶ Lopas nian aku moniant siku' urakng molekat bukai inyo trobakng tinggi di langit. Molekat nantai mombaba' Kabar Boi' inyo bolaku pakai' somanah-manahnyo. Io momboritoan Kabar Boi' nantai ko somuo urakng inyo bodiapm di bumi, ia'an boko urakng doi' sotiap banso, sotiap suku, sotiap baso, sotiap negara.

⁷ Molekat nantai bopandir agatn saro borakng. Katonyo, “Hormaticam Allah. Pujicam Sio! Obai, sampaiam watunyo pakai' Allah mohakipi somuo urakng. Sombahcam Sio inyo mombulah langit, bumi, lout huatan somuo mato ara'i.”

⁸ Lalu, ado molekat agi' inyo mombodapan inyo potamo. Molekat koduo nantai bopandir, “Kota Babel udah dihukupm Allah. Kota bosar nantai udah rontapam! Kota nantai udah mombulah somuo banso bukai jumpat bodosa momuasan kohonda' pakai' momporajoan.”

⁹ Lalu, ado molekat agi' inyo mombodapan koduo molekat sobolupmnyo. Molekat kotigo nantai bopandir agatn saro borakng. Katonyo, “Somuo urakng inyo monyombah bonatakng huatan lompatukngnyo nantai, inyo monorima' tando bonatakng nantai di koning huatan longannyo,

¹⁰ somuo urakng nantai paca'an dihukupm borat kinyo kurakng. Samo sama'an sia' minum anggur inyo molambakan ponggodi Allah. Anggur nantai kotakng koras, co dicampur agatn ara'i dalapm cangkir Allah. Sia' paca'an disiksa dalapm api huatan bolerang di pohadapan mato boko molekat Allah huatan di pohadapan mato Ana' Domba.

¹¹ Ansap doi' api inyo monyonsaro'i sia' nantai paca'an noi' ko pucu' somanah-manahnyo. Sia' disiksa siakng-malapm kinyo botongga'-boronti. Sama'an nianam ajab sonsaro inyo paca'an tojadi pakai' sia' inyo monyombah bonatakng huatan lompatukngnyo nantai, boko urakng inyo monorima' tando damo bonatakng nantai.”

¹² Jadi boko urakng doi' umant Allah, ia'an boko urakng inyo monaati boko porintah Allah, boko urakng inyo pocayo ko Yesus agatn sotia, sia' gola' botahatn.

¹³ Lalu aku mondinga' saro doi' sorugo bopandir ko aku. Katonyo, “Tuliscam pomandiran ni'in: Mula'i watu ni'in, diborokatiam boko urakng inyo mati dalapm koadaan sotia pocayo ko Tuhatn Yesus.” Roh Allah pan sotuju. Kato-Nyo, “Au, bondar nantai. Sia' mati oca' sia' ulih torahat doi' jorih-uyuh pokoroja'an sia'. Sia' diborokati obai somuo porbuatan boi' sia' mombulah sia' cucu' mondapat'an upah di sorugo.”

Watunyo Yesus mohakipi boko urakng di dunia

¹⁴ Lopas nian, aku moniant, ih, ado awatn putih. Inyo dudu' di pucu' awatn putih nantai ia'an siku' urakng sama'an ‘Ana' Monsio’. Sio ado mahkota omas di kopala'-Nyo huatan sobilah sabit inyo tajapm di jari-Nyo.

¹⁵ Lalu ado molekat bukai inyo koluar doi' Rumah Allah. Sio bopandir agatn saro borakng ko Sio inyo dudu' di pucu' awatn nantai. Kato molekat nantai, “Tota'cam agatn sabit kolai pakai' mohanyi di bumi. Obai udah watunyo pakai' mongumpulan hasil hanyian doi' bumi. Hasil nantai udah mansa'am.”

¹⁶ Lalu, Sio inyo dudu' di pucu' awatn nantai monota' agatn sabit-Nyo. Jadi hasil di bumi dihanyi.

¹⁷ Lopas nian, siku' molekat bukai koluar doi' Rumah Allah di sorugo. Molekat nantai ado sobilah sabit inyo tajapm jam.

¹⁸ Siku' molekat inyo bukai agi' datakng doi' mesbah. Molekat nantai bokuaso ko api. Sio bopandir agatn saro borakng ko molekat inyo monjujut sabit tajapm nantai. Katonyo, “Pakaicam sabit kolai pakai' monota' somuo buah doi' batakng anggur di bumi. Obai buah anggur nantai udah mansa'am.”

¹⁹ Jadi, molekat nantai momakai sabitnyo pakai' monota' boko buah anggur doi' batakngnyo. Lalu, io monikapan boko buah nantai ko dalapm tompat inyo bosar pakai' momoyah anggur, ia'an tompat inyo molambakan ponggodi Allah.

²⁰ Boko buah anggur nantai dipoyah di luar kota. Huatan, darah mongalir doi' tompat nantai sama'an sungai, dalapmnyo duo meter, jouhnyo tigo ratus pal.