Wahyu 13 - Porjanjian Boharu Torjomahan Baso Dilakng Soari-ari

Bonatakng inyo koluar doi' dalapm lout

¹ Lopas nian, aku moniant siku' bonatakng koluar doi' dalapm lout. Io botandu' sopuluh huatan bokopala' tujuh. Di sotiap tandu'nyo ado mahkota kocit. Di sotiap kopala'nyo totulis boko damo inyo mohanyam Allah.

² Bonatakng inyo ku tiat nantai mirip agatn macatn tutul, apo kakinyo sama'an kaki boruakng. Nyaonyo sama'an nyao singa. Nago nantai moonji'i ko bonatakng nantai kokuatannyo, hak pakai' momorintah, agatn kokuasa'annyo inyo bosar.

³ Suti' doi' kotujuh kopala' bonatakng nantai kotiat'annyo sama'an kalo kona' luko. Luko nantai cukup parah pakai' mombulah io mati, apo nyatonyo udah nyamanam. Jadi, somuo urakng di dunia hiratn, lalu tuyut bonatakng nantai.

⁴ Sia' monyombah nago nantai, obai io inyo moonji'i kuaso ko bonatakng nantai. Sia' pan monyombah bonatakng nantai. Kato sia', “Sopo inyo bokuaso samo agatn bonatakng ni'in? Sopo inyo ulih boparakng molawatn io?”

⁵ Bonatakng nantai dibiaran pakai' monyombokan dirinyo huatan mohanyam Allah. Bonatakng nantai pan dionji'i kuaso pakai' momorintah somanah ompat puluh duo bulatn.

⁶ Io mula'i mohanyam Allah, damo-Nyo, Rumah-Nyo, huatan somuo sia' inyo tinggal di sorugo.

⁷ Bonatakng nantai dionji'i jamijitn pakai' boparakng molawatn boko urakng inyo pocayo, lalu mongalahan sia'. Io dionji'i jam kuaso atas sotiap suku, sotiap negara, sotiap baso, sotiap banso.

⁸ Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.

⁹ Sopo inyo ulih mondinga', kohonda'nyo io pondinga'an somuo pomandiran ni'in:

¹⁰ Sotiap urakng inyo ditontuan Allah pakai' monjadi tawatan, pasti paca'an monjadi tawatan. Sotiap urakng inyo ditontuan pakai' dibunuh agatn podakng, pasti paca'an dibunuh agatn podakng. Jadi, boko urakng inyo pocayo gola' botahatn mohadapi nantai. Sia' gola' pocayo ko Yesus agatn sotia.

Bonatakng inyo koluar doi' dalapm tanah

¹¹ Lopas nian, aku moniant siku' bonatakng bukai koluar doi' dalapm tanah. Io botandu' duo sama'an tandu' siku' ana' domba. Io bopandir sama'an siku' nago.

¹² Io bodapat somuo kuaso doi' bonatakng inyo potamo huatan momakai kuasonyo nantai di pohadapan bonatakng inyo potamo nantai. Io mombulah somuo urakng di bumi pakai' monyombah bonatakng potamo, bonatakng nantai inyo udah nyamanam doi' luko parahnyo.

¹³ Bonatakng inyo koduo mombulah boko tando inyo bosar, lopasnyo io mombulah api turutn doi' langit ko bumi di pohadapan mato somuo urakng.

¹⁴ Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

¹⁵ Io pan dionji'i kuaso pakai' mombulah lompatukng nantai monjadi hidup. Jadi, lompatukng bonatakng nantai suba' bopandir huatan mombunuh somuo urakng inyo co monyombahnyo.

¹⁶ Bonatakng inyo koduo nantai momoso somuo urakng monorima' tando bonatakng potamo dilongan kanan damo ko koning sia'. Io momoso somuo urakng, ia'an urakng pontikng damo urakng co pontikng, urakng dampu damo urakng jaro, hulutn damo urakng bebas.

¹⁷ Kinyo ado urakng inyo suba' momboli damo monjual la'apo pan aman io co ado tando nantai, ia'an damo bonatakng potamo nantai damo angka' inyo molambakan damo bonatakng nantai.

¹⁸ Mongona'i hal ni'in gola' ado hikmat. Urakng inyo pintar-corodi' ulih morotian masud doi' angka' nantai, obai angka' nantai ia'an damo siku' urakng. Angka'nyo ia'an 666.