Wahyu 12 - Porjanjian Boharu Torjomahan Baso Dilakng Soari-ari

Sikuꞌ Nago molawatn Siku' Botina' huatan Ana'nyo Botina' huatan Ana'nyo disolamant'an (12:1-6)

¹ Lopas nian, tando luar biaso ni'in kotiat'an di langit: Ado siku' urakng botina' inyo mongona'an matoari sobagai pakai'annyo. Io bodiritn dipucu' bulatn. Dikopala'nyo ado mahkota inyo todiri doi' duo bolas bintakng.

² Botina' nantai tongahan buntikan, sonsaro honda' boana'. Io mondongkakng-mondorah obai mooso podih nantai.

³ Lalu ado tando bukai inyo kotiat'an di langit: Wah, ado siku' nago mirah inyo bosar bondar. Nago nantai bokopala' tujuh huatan botandu' sopuluh. Di sotiap kopala'nyo ado mahkota kocit.

⁴ Agatn iku'nyo, nago nantai monari' soportigo boko bintakng doi' langit, lalu monikapan ko bumi. Nago bodiritn di pohadapan botina' inyo honda' boana' nantai. Nago honda' lansukng monolatn Ana' nantai pas Sio dilahiran.

⁵ Botina' nantai molahiran sikuꞌ urakng Ana' lolaki inyo paca'an momorintah somuo banso agatn tungkah bosi. Nago co ulih monolatn-Nyo, obai Ana' nantai lansukng dikuti', dibaba' ko Allah huatan tahta-Nyo.

⁶ Botina' nantai rari ko padakng pasir, ko sobuah tompat inyo udah Allah siap'an pakai'nyo. Io rari ko tompat nantai oca' io ulih dikobolo di su'utn somanah soribu duo ratus onam puluh ari.

Nago dikalahan (12:7-12)

⁷ Lopas nian, ado poparakan di sorugo. Molekat Mikhael huatan boko molekat inyo bosamo agatn io boparakng molawatn nago nantai. Nago nantai huatan somuo molekat inyo bosamo io boparakng molawatn Mikhael huatan boko molekatnyo.

⁸ Apo nago nantai dikalahan! Nago huatan boko molekatnyo culih bodiapm di sorugo agi'.

⁹ (Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

¹⁰ Lalu, aku mondinga' saro inyo borakng di sorugo. Katonyo, “Ninam watunyo Allah monyolamant'an umat-Nyo! Ninam watunyo Allah monunju'an kuaso-Nyo. Ninam watunyo Allah kito moninjakan Korajaan-Nyo. Ninam watunyo Rajo Inyo Dijanjian Allah momorintah agatn kuaso-Nyo. Obai, Rajo Sitatn udah ditikapan doi' sorugo. Sio culih agi' monuntut boko somadikan kito siakng huatan malapm di hadapan Allah kito.

¹¹ Boko somadikan kito udah mongalahannyo agatn darah Ana' Domba nantai, huatan agatn borito inyo bondar doi' Allah inyo sia' boritoan. Sia' sanggup mongurbatan diri sia' sampai mati.

¹² Obai nantai, sonang-asau cam sorugo huatan kaitn bodiapm di dalapmnyo! Apo bonasoam kaitn di bumi huatan lout! Obai Rajo Sitatn udah turutn ko kaitn. Io kotakan godi obai io tohu co manah agi' io kinyo paca'an bokuaso di dunia.”

Nago monyorakng boko koturutan botina' nantai (12:13-18)

¹³ Pas nago nantai sadar obai io udah ditikapan ko bumi, ongko io monyasah pakai' monyakiti botina' inyo molahiran Ana' lolaki nantai.

¹⁴ Apo botina' nantai dionji'i duo sayap burukng holakng inyo bosar oca' io ulih trobakng ko padakng pasir, ko tompat inyo udah Allah siap'an pakai'nyo. Sio ulih dikobolo di su'utn somanah tigo tohutn sotongah, jouh doi' nago nantai.

¹⁵ Lalu, nago nantai monyomburan ara'i doi' nyaonyo ko arah botina' nantai. Ara'inyo bosar sama'an ara'i pasakng. Nago nantai honda' oca' sungai nantai mohanyutan botina' nantai.

¹⁶ Apo bumi monulukng botina' nantai huatan sopongirap bumi bongango monolatn ara'i inyo koluar doi' nyao nago nantai.

¹⁷ Ongko, nago nantai monjadi kotakng godi ko botina' nantai. Io botula' boparakng molawatn koturutannyo inyo bukai, ia'an sia' inyo monaati boko porintah Allah huatan pocayo agatn kuat ko somuo inyo Yesus pandiran.

¹⁸ Lalu nago nantai bodiritn di pantai lout.