Wahyu 11 - Porjanjian Boharu Torjomahan Baso Dilakng Soari-ari

Duo urakng inyo monyampaian Pomandiran Allah

¹ Lopas nian, aku dionji'i sotota' kayu sama'an tungkah inyo digunoan pakai' moukur. Aku disiuh, “Botula'cam moukur Rumah Allah ongko mesbah. Ongko hitukngcam boropo banya' urakng inyo sombayakng di su'utn.

² Apo jangan moukur tongahlamanan Rumah Allah inyo di sopia' luar. Obai, tongahlamanan nantai udah dionju' ko boko banso bukai. Sia' paca'an monguaso'i Kota Inyo Suci nantai somanah ompat puluh duo bulatn.

³ Apo, paca'an ado duo urakng inyo bosasi mongona'i Aku. Sia' duo paca'an momakai pakai'an bulikng. Aku paca'an moonji'i kuaso ko sia' pakai' monyampaian posatn doi' Aku somanah soribu duo ratus onam puluh ari.”

⁴ Koduo urakng nantai ia'an koduo kayu jaitun huatan koduo tihakng tompat molota'an pompolitoan. Sia' bodiritn di hadapan Tuhatn inyo bokuaso di pucu' sogolintaran alapm.

⁵ Aman ado urakng inyo honda' mondorako'i sia', ado api inyo koluar doi' nyao sia' pakai' mombonasoan boko musuh nantai. Boko urakng inyo honda' mondorako'i sia' paca'an dibunuh agatn caro nantai.

⁶ Sia' duo ado kuaso pakai' monutup langit oca' hujatn co turutn somanah sia' monyampaian posatn doi' Allah. Sia' pan ado kuaso pakai' bulah somuo ara'i monjadi darah. Sia' pan ado kuaso pakai' bulah somuo macapm boncana moninggakng bumi, sombilopan sia' honda' molabuhannyo.

⁷ Lopas sia' jadi monyampaian posatn doi' Allah, paca'an ado bonatakng inyo monjongal doi' Jurakng Maut. Bonatakng nantai paca'an monyorakng sia', mongalahan sia', lopasnyo mombunuh sia'.

⁸ Bangkai sia' ditinggalan ja'am di jalatn rayo kota bosar, ia'an kota di mono Tuhatn sia' disaliban. (Socaro rohani, kota bosar nantai disobut Sodom ongko Mesir.)

⁹ Somanah tigo sotongah ari, boko urakng doi' somuo negara, suku, baso, huatan banso paca'an moniant bangkai sia' duo nantai. Boko urakng nantai kinyo moijitan bangkai sia' nantai dipasar.

¹⁰ Somanah koduo nabi nantai ija' hidup, sia' duo bulah boko urakng di bumi kotakng ajab sonsaro. Obai nantai, boko urakng di bumi kotakng rindakng obai komatian sia'. Boko urakng bopogai, huatan sosamo bokiripm hadiah pakai' morayaan poristiwa nantai.

¹¹ Apo lopas tigo ari sotongah, Allah bulah koduo nabi nantai bobali' hidup agatn kosih-Nyo. Sia' huas bodiritn. Somuo urakng inyo moniant sia' monjadi kotakng gola'.

¹² Pas, koduo nabi nantai mondinga' suatu saro inyo borakng doi' sorugo bopandir ko sia', “Huncapm, noi' ko si'itn!” Jadi, kapikng somuo musuh sia' moniant, koduo nabi nantai noi' ko sorugo dalapm awatn.

¹³ Watu nantai pan ado gompa bumi inyo bosar. Soporsopuluh doi' kota nantai robah. Tujuh ribu urakng mati. Somuo urakng bukai monjadi kotakng gola' lalu momuji Allah di sorugo.

¹⁴ Nantaiam boncana inyo koduo inyo diumuman burukng holakng tontai. Apo boncana kotigo paca'an hagar datakng.

Trompet inyo kotujuh

¹⁵ Lopas nian, molekat inyo kotujuh moniup trompetnyo. Watu nantai, ado boko saro borakng di sorugo bopandir, “Koraja'an di dunia ni'in udah dikuaso'i Tuhatn Allah huatan Rajo Inyo Dijanjian-Nyo, ia'an Kristus. Sio paca'an momorintah somanah-manahnyo!”

¹⁶ Koduo puluh ompat pomimpitn inyo dudu' di tahta sia' di hadapan Allah, sia' tundu' monyungkapan monyombah Allah.

¹⁷ Kato sia', “Tuhatn Allah inyo Maho Kuaso, inyo ado ni'in huatan inyo udah ado doi' komainyo. Koi botorima' kasih ko Duatn. Obai Duatn momakai kuaso Duatn inyo bosar huatan udah mula'i momorintah.

¹⁸ Somuo banso udah godi. Apo ni'in ponggodi Duatn udah datakam. Watunyo udah datakng pakai' mohakipi boko urakng mati. Watunyo udah datakng pakai' moonji'i upah ko boko nabi inyo molayati Duatn, ko boko urakng pocayo, somuo sia' inyo mohormati Duatn, boko urakng inyo pontikng huatan co pontikng. Watunyo udah datakng pakai' mombonasoan boko urakng inyo mombonasoan bumi.”

¹⁹ Lalu, tobuka'am Rumah Allah di sorugo. Poti Pojanjian Allah ulih ditiat di dalapm Rumah Allah nantai. Lalu, ado solitar, saro guntur inyo borakng, gompa bumi huatan hujatn es inyo lobat.