Wahyu 10 - Porjanjian Boharu Torjomahan Baso Dilakng Soari-ari

Molekat agatn gulukan buku inyo kocit

¹ Lopas nian, aku moniant sikuꞌ molekat bukai inyo kuat. Io turutn doi' sorugo di tutupi awatn. Ado siandakng di pucu' kopala'nyo. Mato-muhonyo bosinar sama'an matoari. Kakinyo sama'an tihakng api.

² Sio monjujut sobuah gulukan buku kocit di jarinyo. Gulukan buku nantai udah tobuka'. Watu molekat nantai turutn, io mononja'an kaki kanannyo di pucu' lout, kaki kiba'nyo di pucu' bumi.

³ Sio mondorah agatn saro borakng samo sama'an singa inyo mondorah. Lopas nantai, kotujuh guntur bopandir agatn saronyo.

⁴ Pas kotujuh guntur nantai bopandir, aku siap monulis pomandirannyo. Apo watu nantai, aku mondinga' ado bunyi saro doi' sorugo. Kato-nyo, “Jangan monulisan pomandiran kotujuh guntur nantai. Jangan monyatoan hal nantai!”

⁵ Lopas nantai, molekat nantai inyo aku tiat bodiritn di pucu' lout huatan di pucu' bumi nantai, io moangkat longan kanannyo ko langit,

⁶ bosumpah atas damo Sio inyo hidup somanah-manahnyo, Sio inyo mombulah langit huatan somuo isinyo, bumi huatan somuo isinyo, lout huatan somuo isinyo. Kato molekat nantai, “Watunyo co paca'an ditunda' agi'!

⁷ Molekat inyo kotujuh paca'an moniup trompetnyo. Watu nantai, hajat Allah paca'an oca' diponuhi. Somuo hal inyo paca'an tojadi samo sama'an Allah udah boritoan ko boko nabi inyo molayati Sio.”

⁸ Lopas nantai, aku mondinga' agi' saro nantai doi' sorugo. Kato-nyo ko aku, “Hingkascam ko molekat nantai inyo bodiritn di pucu' lout huatan di pucu' bumi. Kuti'cam gulukan buku inyo tobuka' nantai, inyo ado di jarinyo.”

⁹ Jadi aku botula' ko molekat nantai, lalu minto oca' sio moonji'i gulukan buku kocit nantai ko aku. Molekat nantai bopandir ko aku, “Kuti'cam ni'in huatan pua'icam! Nantai paca'an mombulah porut kolai monjadi pohit. Apo nantai paca'an tooso manis sama'an madu di nyao kolai.”

¹⁰ Jadi, aku monguti' buku nantai doi' jari molekat nantai. Aku momua'inyo. Nantai tooso manis sama'an madu di nyaoku. Apo nantai mombulah porutku monjadi pohit.

¹¹ Sio bopandir ko aku, “Kolai gola' monyampaian posatn doi' Allah agi' ko banya' banso, negara, baso huatan rajo.”