Wahyu 1 - Porjanjian Boharu Torjomahan Baso Dilakng Soari-ari

Ponjolasan mongona'i isi buku ni'in

¹ Yesus Kristus monyatoan mongona'i boko kojadian inyo paca'an tojadi. Allah momboritoan ko Yesus pakai' monyatoannyo ko boko urakng inyo molayati Sio. Yesus Kristus moutus molekat-Nyo pakai' monyatoan ko Yohanes, hulutn-Nyo.

² Dalapm buku ni'in Yohanes monulis mongona'i Pomandiran Allah huatan mongona'i boko hal inyo Yesus Kristus nyatoan ko io, ia'an boko la'apo inyo Yohanes tiat dalapm poniant'an nantai.

³ Diborokati urakng inyo mombaco huatan inyo mondinga'an boko posatn doi' Allah ni'in. Diborokati somuo urakng inyo monuruti boko hal inyo ditulis di dalapmnyo. Obai, watunyo co manah agi' somuonyo ni'in paca'an tojadi.

Salapm ko kotujuh jomaat

⁴ Ko kotujuh jomaat di doerah Asia. Doi' aku, Yohanes. Aku bodoa oca' kaitn monorima' koboi'an ongko sonang-asau doi' Allah, inyo ado watu ni'in, inyo udah ado doi' joman komai, huatan inyo ado sotorusnyo. Ongko doi' kotujuh roh inyo ado di hadapan tahta-Nyo.

⁵ Ongko doi' Yesus Kristus, inyo monyatoan kobondaran Allah agatn sotia. Hoyu' Sio nam urakng inyo hidup agi' doi' komatian. Sionam Rajo inyo bokuaso doi' somuo rajo di dunia. Topuji am Yesus inyo mongasihi kito. Sio mombebasan kito doi' dosa kito, obai Sio mombayar agatn darah-Nyo siku' timpu Sio mati di kayu salib.

⁶ Sio bulah kito monjadi sobuah banso, boko imam inyo molayati Allah, Bopai-Nyo. Yesusnam inyo mulia ongko bokuaso somanah-manahnyo. Amin!

⁷ Porotiancam! Sio datakng di antaro boko awatn! Somuo urakng paca'an moniant Sio, tomansu' sia' inyo udah monuhu' Sio. Somuo banso di bumi paca'an monangis obai Sio. Au, pasti ni'in tajahan tojadi! Amin!

⁸ “Akunam inyo Potamo ongko inyo Toahir,” kato Tuhatn Allah, inyo Maho Kuaso, inyo ado watu ni'in, inyo udah ado doi' joman komai, huatan inyo ado sotorusnyo.

Yesus monyiuh Yohanes oca' monulis mongona'i poniantnyo

⁹ Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

¹⁰ Watu ari Tuhatn, aku dikuaso'i ulih Roh Allah. Timpu nantai, aku mondinga' saro inyo kotakan borakng samo sama'an bunyi trompet.

¹¹ Saro nantai bopandir, “Kolai gola' monulis somuo hal inyo paca'an ditiatan ko kolai. Lalu, kolai gola' mongiripm buku nantai ko kotujuh jomaat ni'inan: Efesus, Smirna, Pergamus, Tiatira, Sardis, Filadelfia, ongko Laodikia.”

¹² Aku mongilikng pakai' moniant saro inyo bopandir ko aku. Lalu, aku moniant tujuh tihakng tompat molota'an pompolitoan. Kotujuh tihakng pompolitoan nantai dipulah doi' omas.

¹³ Di tongah-tongah boko tihakng pompolitoan nantai, ado siku' urakng inyo kotiat'annyo ubo ‘Ana' Monsio’. Sio momakai jubah inyo panjakngnyo sampai ko kaki. Huatan di dado-Nyo ado pongobat punggukng doi' omas.

¹⁴ Rambut di kopala'-Nyo putih sama'an bulu domba, putih samo sama'an kombakng kodombo. Mato-Nyo sama'an api bonyalo-nyalo.

¹⁵ Kaki-Nyo mongkilat samo sama'an tombago inyo tongahan dimurnian dalapm api. Saro-Nyo samo sama'an guruh golumbakng lout.

¹⁶ Longan kanan-Nyo monjujut tujuh bintakng. Sobilah podakng tajapm inyo bomato duo koluar doi' nyao-Nyo. Mato-muho-Nyo bosinar samo sama'an matoari watu tongahari.

¹⁷ Pas aku moniant-Nyo, aku lansukng tokosungkapm di hadapan kaki-Nyo sama'an urakng mati. Apo Sio molota'an longan kanan-Nyo ko aku. Kato-Nyo, “Jangan gola'! Aku ninam inyo Potamo ongko inyo toahir,

¹⁸ Aku ninam inyo Hidup. Aku udah mati, apo porotiancam, Aku hidup pakai' somanah-manahnyo. Aku monjujut kunci huatan bokuaso tohadap komatian ongko dunia urakng mati

¹⁹ Obai nantaiam, tuliscam somuo hal inyo ditiatan ko kolai, ia'an boko hal inyo tojadi watu ni'in ongko boko hal inyo tajahan tojadi nononyo.

²⁰ Dalapm poniant'an tontai kolai moniant tujuh tihakng tompat molota'an pompolitoan inyo dipulah doi' omas. Kolai pan moniant jam tujuh bintakng di longan kanan-Ku. Nianam rotinyo: Kotujuh tihakng tompat molota'an pompolitoan nantai monggambaran kotujuh jomaat. Kotujuh bintakng nantai monggambaran kotujuh molekat inyo monjago boko jomaat nantai.”