Titus 3 - Porjanjian Boharu Torjomahan Baso Dilakng Soari-ari

Nosihat Paulus inyo toahir

¹ Padahan ko boko urakng pocayo oca' sia' mohormati somuo pomimpitn pomorintah ongko somuo pomimpitn laman. Sia' gola' monaati somuo pomimpitn. Ingant'ancam somuo urakng pocayo oca' sia' siap pakai' mongorojoan la'apo aja' inyo boi'.

² Ingant'ancam ko sia' oca' jangan monjahai'an damo urakng bukai huatan jangan botikakng. Apo sia' gola' bondar-bondar coraca'an ongko lomah-lombut agatn somuo urakng, tomansu' agatn boko urakng inyo bolupm pocayo ko Yesus.

³ Komai sobolupm kito pocayo kito co tohu jam caro hidup inyo boi' sama'an sia'. Kito co taat jam agatn Allah. Kito dikotumbuki boko hal inyo jahat. Kohonda' ongko kosonangan di dunia ni'in monguaso'i kito. Kito hala bulah kojahatan ongko hala tungi agatn urakng bukai. Kito bonci' agatn urakng bukai ongko urakng bukai pan bonci' agatn kito.

⁴ Apo timpu Allah monunju'an koboi'an huatan kasih-Nyo, Sio monyolamant'an kito.

^5-6 Nantai tojadi bukainyo obai boko porbuatan boi' kito, apo obai kasih sayang-Nyo ko kito. Allah molabuhan nantai molalu'i Yesus Kristus, Ponyolamant kito. Yesus moonji'i Roh Allah inyo monulukng kito oca' kito hidup agatn caro inyo boharu.

⁷ Agatn ubo nian, kito inyo dipulah bondar obai koboi'an Allah, bohak monorima' hidup somanah-manahnyo inyo kito harapan.

⁸ Somuo inyo udah ku pandiran nantai bondar ongko ulih dipocayo. Aku honda' oca' kolai moajaran somuo nantai agatn togas. Ajaricam somuo nantai ko boko urakng inyo pocayo ko Allah oca' sia' moutamoan pakai' bulah koboi'an. Somuo nantai boi' huatan boguno pakai' boko urakng banya'.

⁹ Jangan sonjumpat'an boko pomandiran conyiant onsu'annyo, botikakng mongona'i koturutan, botikakng mongona'i Hukupm Torat. Somuo nantai kinyo mountukan.

^10-11 Aman ado urakng inyo bulah poporapan di antaro boko urakng pocayo, kolai gola' moolikan io. Aman io kinyo botongga', olikan io sokali agi'. Aman io kinyo botongga' jam lopas jadi diolikan duo kali, kolai tohu io kinyo honda' tuyut ajaran inyo bondar agi'. Boko dosanyo mombutian obai inyo salah di hadapan Allah. Jangan bohubukan agi' agatn urakng sama'an nian.

Paulus moahiri suratnyo

¹² Aku paca'an moutus Artemas damo Tikhikus ko kolai pakai' molayati di pulau Kreta di su'utn. Pas salah siku' doi' sia' datakng, kohonda'ku kolai copat datakng ko aku di kota Nikopolis. Aku udah momutusan pakai' bodiapm di su'utn somanah musipm dingin ni'in.

¹³ Ado Zenas, urakng ahli hukupm, ongko Apolos. Tulukngcam sia' dalapm pojalatan. Onji'i la'apo inyo sia' pontikan.

¹⁴ Bukainyo bayo nantai, apo somuo urakng inyo pocayo di pulau Kreta nantai gola' bolajar bulah koboi'an. Sia' gola' bousaha pakai' molabuhan nantai oca' sia' ulih monulukng urakng bukai inyo ado kopontikannyo. Aman sia' molabuhan nantai, hidup sia' paca'an boguno.

¹⁵ Somuo urakng inyo bosamo agatn aku di Nikopolis ni'in monyampaian salapm ko kolai. Sampaian jam salapmku ko boko urakng pocayo di su'utn inyo mongasihi koi. Aku bodoa oca' Tuhatn monunju'an koboi'an-Nyo ko kaitn somuo.