Titus 2 - Porjanjian Boharu Torjomahan Baso Dilakng Soari-ari

Caro hidup inyo monyonangan Tuhatn

¹ Apo kolai gola' mongajar ajaran inyo bondar ko boko urakng inyo pocayo.

² Ajaricam boko lolaki inyo udah tuho oca'nyo ulih monahan diri sia'. Sia' gola' sopatn ongko pintar-corodi'. Sia' gola' totap pocayo ko Yesus, mongasihi Allah ongko urakng bukai, huatan botahatn dalapm mohadapi ajab sonsaro.

³ Ubo nian jam agatn boko botina' inyo udah tuho. Ajaricam sia' pakai' hidup agatn caro inyo mohormati Allah. Sia' culih bojaha'i urakng bukai. Sia' culih gala' minum sampai mabu'. Sia' gola' mongajar boko hal inyo boi'.

⁴ Agatn caro nantai boko botina' inyo udah tuho nantai ulih mondidik boko botina' inyo ija' muda' oca' sia' mongasihi laki sia' ongko boko poana'an sia',

⁵ oca' sia' mongondalian diri sia', oca' sia' kinyo bulah dosa, oca' sia' rajitn moatur rumah tanggo sia', oca' sia' boi' hati, ongko oca' sia' monuruti pimpitan lakinyo. Aman sia' molabuhan inyo ubo nian urakng bukai kinyo bopandir monjahai'an Pomandiran Allah.

⁶ Sama'an nian jam boko lolaki inyo ija' muda'. Padahicam ongko onji'i nosihat ko sia' oca' ulih monahan diri sia' dalapm hal la'apo pan.

⁷ Titus, kolai gola' bulah koboi'an oca' kolai monjadi contoh pakai' somuo sia'. Sotiap kali kolai mongajar, ajaricam agatn hati inyo bujur bondar. Ajaricam agatn caro inyo cucu' pakai' dihormati.

⁸ Ajaricam ajaran inyo bondar oca' urakng inyo molawatn kolai co ulih monyalahan ajaran nantai. Aman sia' co ulih mongatoan boko hal inyo jahat mongona'i kito, sia' paca'an monjadi malu.

⁹ Ajaricam boko hulutn inyo pocayo oca' sia' tundu' agatn habakng sia' dalapm somuo hal. Sia' gola' bokorojo pakai' monyonangan habakng sia'. Sia' co ulih monikaki habakng sia'.

¹⁰ Sia' co ulih mongolit'i boko kodampuan habakng sia'. Apo sia' gola' sotia huatan bujur bondar. Aman sia' hidup agatn caro nantai, urakng bukai paca'an moniantnyo huatan sonang agatn ajaran mongona'i Allah, Ponyolamant kito.

¹¹ Allah udah monunju'an koboi'an-Nyo inyo monyolamant'an somuo urakng. Biar pan kito kinyo cucu', Sio udah moonji'i jalatn oca' somuo urakng ulih disolamant'an.

¹² Agatn caro nantai, Allah mongajar kito oca' kito botongga' molabuhan boko hal inyo kinyo monyonangan Sio, ongko oca' kito botongga' jumpat kohonda' jahat dunia ni'in. Sio mongajar kito oca' kito mampu monahan diri kito, oca' kito hidup agatn caro inyo bondar di hadapan Sio, ongko oca' kito hidup sosuai agatn kohonda' Sio. Kito bolajar caro hidup sama'an nantai watu joman ni'in,

¹³ kapikng kito monantian ari kodatakan Allah inyo Maho Kuaso ongko Ponyolamant kito, Yesus Kristus, ia'an ari inyo kito harapan agatn rindakng-rigah,

¹⁴ Yesus monyorahan diri sampai mati. Agatn caro nantai, Sio mombebasan kito doi' boko kojahatan. Sio jam bulah kito borosih doi' boko dosa kito oca' kito monjadi boko urakng umputn Sio siku', ia'an boko urakng inyo bondar-bondar totap hala bulah koboi'an.

¹⁵ Ajaricam somuo ni'in ko boko urakng pocayo di pulau Kreta nantai. Padahicam ongko onji'i pomandiran ko sia' sama'an pomimpitn inyo pintar-corodi'. Jadi, jangan molongahan urakng bukai moanggap kolai co bopasal.