Titus 1 - Porjanjian Boharu Torjomahan Baso Dilakng Soari-ari

Paulus monyampaian salapm ko Titus

^1-4 Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

Boko syarat pakai' monjadi boko ponotua'

⁵ Aku udah moninggalan kolai di pulau Kreta oca' kolai ulih monjadi'i pokoroja'an inyo ija' pontikng dikorojoan. Kolai gola' momilih boko ponotua' pakai' momimpitn sotiap jomaat di boko kota di pulau Kreta. Kolai gola' momilih ponotua' sosuai agatn boko potunju' ni'in inyo udah ku onju' ko kolai:

⁶ Siku' urakng ponotua' gola' hidup kinyo rusa'. Io culih bobini lobih doi' siku'. Poana'annyo pan gola' pocayo ko Yesus ongko gola' hidup agatn caro inyo boi'. Jangan sampai urakng bukai ulih monyalahan sia' obai sia' hidup kinyo toatur damo obai sia' hidup kinyo taat.

⁷ Siku' urakng pongawas jomaat bokorojo moatur Rumah Allah. Obai niannam, io gola' hidup bujur bondar. Io culih buhau. Io culih copat godi damo urakng inyo pomabu'. Io culih gala' bokolohi damo gala' ngontumbuki urakng oca' mondapat'an untukng.

⁸ Apo, io agatn coraca'an ulih moonji'i tumpakan ongko gala' bulah koboi'an. Io gola' pintar-corodi', hidup bondar di hadapan Allah, co bulah dosa, ongko ulih mongondalian dirinyo.

⁹ Io pan gola' bobondar pocayo Kabar Boi' inyo kito ajaran ko io, ia'an ajaran inyo bondar huatan ulih dipocayo. Io gola' bobondar pocayo tohadap ajaran nantai oca' io mampu momadahi ongko moonji'i somangant ko urakng bukai pakai' monaati ajaran inyo bondar nantai. Io gola' bobondar pocayo oca' io pan ulih monunju'an ko urakng inyo molawatn ajaran nantai, obai sia' salah.

¹⁰ Aku momadahan nantai obai ado banya' urakng Kreta inyo kinyo honda' monaati boko ponotua', hususnyo sia' inyo tontainyo sobolupmnyo boagama Yahudi. Sia' bopandir mongona'i boko hal inyo kinyo boguno. Sia' moncubo monipu urakng bukai.

¹¹ Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

¹² Sipat boko urakng Kreta nantai kalo dikatoan ulih nabi urakng Kreta siku'. Kato nabi nantai, “Somuo pondudu' pulau Kreta hala bulah kotumbukan. Sia' sama'an bonatakng ganas. Sia' pocalan, ongkah honda' makatn am.”

¹³ Pomandiran nabi nantai memang bondar! Jadi, boko urakng Kreta inyo udah dikotumbuki gola' diolikan. Olikanbo sia' agatn togas oca' kopocaya'an sia' sosuai agatn ajaran inyo bondar.

¹⁴ Olikanbo sia' nan oca' sia' monula' boko kisah modas doi' boko urakng Yahudi. Olikancam sia' nian oca' sia' kinyo sonjumpat'an urakng inyo molawatn ajaran inyo bondar. Boko urakng nantai mongajar obai kito gola' monaati soluruh Hukupm Torat.

¹⁵ La'apo pan ia'an suci bagi boko urakng suci. Apo bagi boko urakng inyo pikirannyo jahat huatan kinyo pocayo, co nyiant inyo suci, obai pikiran huatan hati sia' udah jahat.

¹⁶ Sia' mongatoan obai sia' mongonal Allah. Apo porbuatan sia' monunju'an obai sia' kinyo mongonal Allah. Allah campah agatn sia'. Sia' kinyo taat ko Sio. Sia' kinyo mampu molabuhan la'apo pan inyo boi'.