Roma 9 - Porjanjian Boharu Torjomahan Baso Dilakng Soari-ari

Paulus salu' obai banya' urakng Yahudi co pocayo agatn Yesus

¹ Obai aku bosatu agatn Kristus, jadi pomandiran ku ni'in pasti bondar. Aku yakitn aku co bulah kotumbukan. Roh Allah mombulah hatiku yakitn mongona'i nantai jam.

² Ia'an obai aku kotakan salu'. Hatiku susah

³ obai banya' urakng Yahudi co honda' pocayo ko Kristus. Malahan aku rela tokutu', topisah doi' Kristus soandainyo hal nantai mombulah sia' monjadi solamant. Obai sia' nam boko somadikanku siku', sosamo banso Israel.

⁴ Sia' nam umant Allah. Sio mombulah sia' monjadi poana'an-Nyo. Sio monunju'an ko sia' obai Sio mulia. Sopanjakng sojarah sia', Sio mombulah boko pojanjian husus agatn sia'. Sio moonju' Hukupm Torat ko sia' huatan momadahannyo ko sia' caro sia' gola' monyombah Sio. Sio pan bulah banya' janji bukai agatn sia'.

⁵ Sia' nam koturutan Abrahapm, Ishak ongko Yakub, pombopaian angki-bayatn sia'. Pas Kristus monjadi monsio, Sio lahir sobagai koturutan urakng Israel jam. Sio bokuaso di pucu' la'apo pan. Sio nam Allah inyo cucu' dipuji somanahnyo. Amin!

Allah monunju'an bolas-kasihan ongko momilih urakng sosuai agatn kohonda'-Nyo siku'

⁶ Banya' urakng Israel kinyo disolamant'an. Apo nantai kinyo bondar obai Allah balakng momonuhi janji-Nyo ko sia'. Obai, kinyo somuo sia' ia'an bondar-bondar urakng Israel inyo dipilih Allah

⁷ Kinyo somuo koturutan Abrahapm ia'an boko poana'an Allah. Obai Allah bopandir ko Abrahapm, “ongkah koturutan Ishak mo inyo disobut koturutan kolai.”

⁸ Nantai boroti koturutan Abrahapm inyo monjadi poana'an Allah, ongkah sia' inyo lahir obai janji Allah huatan bukai somuo koturutannyo.

⁹ Obai janji Allah ia'an sama'an ni'in, “Pas watu inyo sama'an ni'in jam tohutn nono, Aku paca'an bobali' ongko Sarah paca'an boana'an siku' lolaki.”

¹⁰ Lobih jolas agi', Ishak, bopai angki-bayatn kito nantai, bisi ana' kombar, Yakub ongko Esau. Pas bininyo Ribka tongahan buntikan,

^11-12 Allah bopandir ko Ribka, “Ana' inyo kojula'an tajahan monjadi hulutn ana' inyo kobunsuan.” Allah momilih Yakub sobolupm koduo bobia' nantai dilahiran, sobolupm sia' molabuhan lapopan inyo boi' damo inyo jahat. Allah molabuhan nantai oca' jolas obai Sio momilih urakng bukai sosuai agatn porbuatan sia', apo sosuai agatn kohonda' Sio siku'.

¹³ Samo sama'an pomandiran Allah ni'in inyo totulis di Buku Suci: “Aku mongasihi Yakub apo bonci'an Esau.”

¹⁴ Aman ubo nian, la'apo inyo ulih kito padahan? Kata'an Allah kinyo adil bai? Pasti Allah adil!

¹⁵ Obai, Allah bohak momilih sopo ja' inyo Sio kohonda'i. Sama'an la'apo inyo Sio padahan ko Musa, “Aku tajahan monunju'an kasih-Ku ko urakng inyo kohonda' Ku monunju'an kasih. Aku tajahan monunju'an bolas-kasihan ko urakng inyo kohonda'Ku monunju'an bolas-kasihan.”

¹⁶ Jadi, Allah momilih urakng bukainyo obai urakng nantai honda', ongko bukainyo obai urakng nantai bousaha bulah koboi'an, apo Allah momilih urakng obai Sio honda' monunju'an bolas-kasihan ko urakng nantai.

¹⁷ Apo ingant cam pomandiran Allah ni'in ko rajo Mesir inyo totulis dalapm Buku Suci, “Ubo ninam alasan Ku moangkat kolai monjadi rajo, ia'an oca', ‘Aku ulih monunju'an kuaso-Ku dalapmla'apo pan inyo tajahan tojadi ko kolai, ongko oca' somuo urakng di soluruh bumi mongotohu'i damo-Ku.’ ”

¹⁸ Jadi, udah jolas obai Allah monunju'an bolas-kasihan ko urakng sosuai agatn kohonda'-Nyo. Apo Allah pan ulih bulah urakng korikng hati sosuai agatn kohonda'-Nyo, sama'an inyo tojadi agatn rajo Mesir nantai.

¹⁹ Aman ubo nian, tajahan ado di antaro kaitn inyo bopandir ko aku, “Aman conyiant ado urakng inyo ulih molawatn kohonda' Allah, mapo Allah ija' moanggap urakng bosalah?”

²⁰ Apo, porhatiancam! Kolai bayo monsio. Kolai culih monyalahan koputusan Allah inyo moncipta'an kolai. Roga' pasti culihnyo bopandir ko tukakng inyo mombulahnyo, “Mapo kolai bulah ku sama'an ni'in?!”

²¹ Pasti tukakng nantai bohak mombulah ubo lapo ja' kohonda'nyo. Doi' gumpalan tanah liat inyo samo, tukakng nantai bohak mombulahnyo sobuah roga' inyo boi' huatan sobuah roga' inyo bukainyo inyo biaso.

²² Ubo nian jam Allah bokuaso doi' somuo urakng inyo Sio pulah. Ado boko urakng inyo mombulah Allah godi. Sio udah siap mombonasoan sia'. Sio honda' monunju'an obai Sio godi ongko monunju'an kuaso-Nyo. Sio sabar agatn sia', jadi Sio kinyo lansukng mohukupm sia'

²³ pakai' monunju'an obai Sio kotakan mulia. Sio monunju'an nantai ko boko urakng inyo monorima' bolas-kasihan-Nyo. Allah udah siap moonji'i hidup inyo mulia ko boko urakng nantai,

²⁴ ia'an kito inyo udah ditingkau Allah pakai' monjadi umat-Nyo, bukainyo bayo urakng doi' banso Yahudi, apo urakng doi' boko banso inyo bukai jam.

²⁵ Samo sama'an di buku Nabi Hosea. Allah momandiran ni'in mongona'i boko urakng bukainyo urakng Yahudi: “Ko boko urakng inyo komai bukainyo umant-Ku, Aku tajahan bopandir, ‘Kaitn nam umant-Ku’ Ko boko urakng inyo komai kinyo Ku kasihi, Aku tajahan bopandir, ‘Aku mongasihi kaitn.’

²⁶ Huatan di tompat di mono komai Allah bopandir ko sia', ‘Kaitn bukainyo umant-Ku,’ di tompat nantai jam Allah inyo hidup tajahan bopandir, ‘Kaitn nam poana'an-Ku.’ ”

²⁷ Huatan nabi Yesaya bopandir mongona'i urakng Yahudi, “Jumlah urakng Israel kotakan banya' samo sama'an pasir di lout. Apo bayo sodikit mo inyo tajahan solamant.

²⁸ Obai, Tuhatn Allah tajahan molabuhan lapo inyo Sio pandiran, ia'an Sio tajahan copat mohakipi somuo urakng di dunia.”

²⁹ Sobolupm ponghakipan nantai, Yesaya pan bopandir, “Tuhatn Allah inyo kotakng Bokuaso monyolamant'an boboropo koturutan bagi kito. Soandainyo co ubo nian, jadi somuo kito bonaso samo sama'an inyo tojadi di kota Sodom ongko Gomora.”

Banya' urakng Yahudi kinyo disolamant'an obai sia' kinyo pocayo ko Yesus Kristus

³⁰ Aman ubo nian, la'apo inyo ulih kito padahan? Kito ulih monyimpulan ni'in: Boko urakng bukainyo urakng Yahudi kinyo bousaha monjadi bondar di hadapan Allah. Apo, sia' monjadi bondar obai sia' pocayoagatn Kristus.

³¹ Apo, boko urakng Israel bousaha monaati Hukupm Torat pakai' monjadi bondar di pohadapan Allah. Apo nantai kinyo bohasil.

³² Hibo? Obai sia' kinyo pocayo agatn Yesus apo bousaha monjadi bondar agatn porbuatan boi' sia'. Yesus samo sama'an batu inyo bulah sia' topanjur.

³³ Samo sama'an pomandiran Allah inyo ditulis di Buku Suci: “Porotiancam! Aku molota'an Batu di Sion. Batu nantai bulah urakng topanjur. Apo urakng inyo pocayo ko Sio, tajahannyo kinyo kalo monjadi malu obai io pocayo.”