Roma 8 - Porjanjian Boharu Torjomahan Baso Dilakng Soari-ari

Roh Allah monulukng kito mongalahan kuaso dosa

¹ Obai nianam, watu ni'in Allah kinyo mohukupm urakng inyo ado di dalapm Kristus Yesus.

² Obai, kuaso Roh Allah udah molopasan kaitn doi' kuaso dosa ongko hukupan mati nantai. Roh Allah moonji'i kaitn kohidupan inyo sobondarnyo di dalapm Kristus Yesus.

³ Hukupm Torat culih molopasan urakng doi' kuaso dosa obai monsio lomah ongko culihnyo monaati Hukupm Torat nantai. Apo hal nantai inyo co mungkitn dilabuhan Hukupm Torat, udah dilabuhan Allah. Sio moutus Ana'-Nyo datakng ko dunia ni'in. Tubuh Ana'-Nyo ado kohonda' pakai' bodosa samo sama'an monsio biaso, apo Sio kinyo bodosa. Jadi, Sio ulih monanggukng hukupan dosa monsio.

⁴ Allah molabuhan somuo nantai oca' kito ulih hidup agatn caro inyo dimasud dalapm Hukupm Torat, ia'an nantai kito inyo hidup agatn caro inyo bondar, co monuruti kohonda' monsio apo monuruti Roh Allah.

⁵ Boko urakng inyo hidup monuruti kohonda' monsio bayo bopikir mongona'i caronyo pakai' mongosihan kohonda'nyo. Apo boko urakng inyo hidup monuruti Roh Allah bayo bopikir mongona'i caronyo monyonangan Roh Allah.

⁶ Boko urakng inyo monuruti kohonda' Roh Allah hidup agatn sonang-nyamanam doi' Allah ongko mondapat'an kohidupan inyo bondar. Apo boko urakng inyo monuruti kohonda' monsio, hidup jouh doi' Allah. Sia' mondapat'an hukupan mati somanah-manahnyo

⁷ obai sia' bomusuhan agatn Allah. Sia' co monuruti boko porintah Allah. Malahan, sia' culihnyo monuruti boko porintah Allah.

⁸ Boko urakng sama'an nantai culih monyonangan Allah.

⁹ Apo kaitn kinyo hidup monuruti kohonda' monsio. Kaitn tajahan hidup monuruti Roh Allah, aman Roh Allah ado di dalapm diri kaitn. Aman Roh Kristus kinyo diapm di dalapm diri monsio, rotinyo urakng nian bukainyo umputn Kristus.

¹⁰ Memang tubuh kito tajahannyo mati obai dosa. Apo, aman Kristus diapm di dalapm diri kaitn, Roh-Nyo tajahan moonji'i kaitn kohidupan kokal obai kaitn monjadi bondar di hadapan Allah.

¹¹ Roh Allah udah bulah Yesus Kristus hidup agi' doi' komatian. Ongko nantaiam Roh inyo diapm di dalapm diri kaitn jam. Jadi, biar pan tubuh kaitn tajahan mati, Roh Allah tajahan bulah tubuh kaitn hidup agi'.

¹² Jadi, boko somadikan, kito gola' hidup monuruti Roh Allah, kinyo monuruti kohonda' monsio.

¹³ Obai, aman kaitn hidup monuruti kohonda' monsio, kaitn tajahan mati bosongkayo doi' Allah. Apo agatn potulukan doi' Roh Allah, kaitn gola' moninggalan boko porbuatan kaitn inyo jahat nantai. Aman kaitn molabuhan nantai, jadi kaitn tajahan mondapat'an kohidupan inyo kokal.

¹⁴ Somuo urakng inyo dibimbikng Roh Allah nianam poana'an Allah.

¹⁵ Komainyo, kaitn samo sama'an pacal inyo ponggola'an. Apo, Roh Allah inyo dionju' ko kaitn kinyo bulah kaitn monjadi samo sama'an nantai agi'. Roh Allah bulah kaitn monjadi poana'an Allah. Obai Roh-Nyo nantai, kito moningkau, “Oi Allah! Duatn Bopaiku!”

¹⁶ Roh Allah bosamo agatn roh kito monyatoan obai kito nam poana'an Allah.

¹⁷ Nah, aman kito ni'in poana'an-Nyo, jadi kito pan tajahan monorima' somuo borokat inyo Sio sodia'an pakai' poana'an-Nyo. Samo sama'an Kristus mondapat'an borokat doi' Allah, kito pan tajahan mondapat'an borokat. Masudnyo, aman kito mondorita' samo sama'an Kristus, kito tajahan monorima' kohidupan inyo mulia samo sama'an Sio jam.

Roh Allah monulukng kito di dalapm ajab sonsaro

¹⁸ Aku yakitn obai ajab sonsaro inyo kito alapi watu ni'in co gaha'an borat dibandikan agatn kohidupan inyo maho boi' inyo tajahan dionju' ko kito nononyo.

¹⁹ Sobondarnyo, la'apo pan inyo Allah pulah kotakan rindu watu Allah monunju'an boko poana'an-Nyo.

²⁰ Obai, komai somuo pulahan-Nyo udah dibiaran monjadi rusa', bukainyo obai kohonda'nyo siku' apo obai Allah mombiarannyo sama'an nian am.

²¹ Apo pulahan-Nyo ni'in ado harapan: Nononyo Allah tajahan molopasan pulahan-Nyo doi' kuaso inyo mohancurannyo bosamo agatn poana'an-Nyo. Allah pan tajahan bulah pulahan-Nyo maho boi' agi' bosamo agatn poana'an-Nyo.

²² Kito tohu obai sampai watu ni'in somuo pulahan-Nyo ija' monangis mondorita' kapikng morinduan harapan nantai samo sama'an siku' botina' inyo mohidap-porut monangis kompodihan kapikng morinduan kolahiran ana'nyo.

²³ Huatan bukainyo aja' somuo pulahan-Nyo jam inyo mondorita', kito siku' pan mondorita' di dalapm batitn kito. Kito udah monorima' Roh Allah sobagai poonju' Allah inyo potamo, apo kito totap jam monanti Allah molopasan diri kito somuonyo agatn monjadian kito boko poana'an-Nyo

²⁴ Doi' watu kito disolamant'an, kito yakitn moharap'an somuo inyo Allah janjian nantai. Conyiant urakng inyo ija' moharap'an la'apo pan inyo udah io onju'. Aman io udah monorima' nantai, jadi io co moharap'an nantai agi'.

²⁵ Apo kito totap yakitn moharap'an borokat inyo bolupm dionji'i. Jadi, kito ija' sabar monantiannyo.

²⁶ Roh Allah pan monulukng kito watu hati kito lomah. Aman kito co tohu ubo apo soharusnyo kito bodoa, Roh Allah siku' monyampaian isi hati kito inyo culih dijolasan agatn kato-kato.

²⁷ Allah inyo monyolidiki hati monsio, Sio tohu masud Roh-Nyo nantai. Sio tohu obai Roh-Nyo bodoa pakai' umant husus umputn-Nyo huatan obai Roh-Nyo bodoa sosuai agatn kohonda'-Nyo.

²⁸ Kito tohu obai Allah moatur somuo la'apo pan inyo tojadi oca' ado hasil inyo boi' pakai' kito inyo mongasihi Sio, ia'an kito inyo Sio tingkau pakai' monjadi poana'an-Nyo obai nantai roncana-Nyo.

²⁹ Doi' komai, Allah udah tohu sopo inyo tajahan dipilih Sio. Doi' komai, Sio pan udah momutusan oca' sia' monjadi sorupo agatn Ana'-Nyo, Yesus. Agatn ubo nantai, Yesus monjadi Ana'-Nyo inyo potamo di antaro banya' somadikan.

³⁰ Ubo nantaiam, Allah moningkau sia' inyo udah dipilih Sio doi' komai. Sia' nantai inyo Sio tingkau, Sio pan bulah sia' monjadi bondar di pohadapan-Nyo. Sia' nantai inyo monjadi bondar, Sio pan moonji'i kohidupan inyo mulia.

Biar pan kito sonsaro, Allah hala mongasihi kito

³¹ Aman kito bopikir mongona'i somuonyo nantai, la'apo inyo ulih kito pandiran? Aman Allah di pihak kito, conyiant ado la'apo pan inyo ulih mongalahan kito!

³² Allah mombiaran oca' Ana'-Nyo siku' sonsaro. Allah monyorahan Ana'-Nyo oca' Sio mati pakai' monanggukng hukupan dosa kito. Aman Allah udah molabuhan nantai pakai' kito, pasti Sio pan tajahan moonji'i kito somuo hal inyo bukai inyo Sio janjian.

³³ Kito umant pilihan Allah inyo udah Sio pulah monjadi bondar di hadapan-Nyo. Jadi, conyiant ado urakng inyo ulih monyalahan kito.

³⁴ Conyiant ado urakng inyo ulih mohukupm kito. Obai, Kristus Yesus udah dihukupm mati pakai' kito. Malahan lobih doi' nantai agi'! Kristus udah hidup agi' huatan dudu' di tompat inyo tohormat di sopia' kanan Allah. Sio nam inyo mombela kito!

³⁵ Conyiant ado la'apo pan inyo ulih monyongkayoan kito doi' kasih-Nyo. Aman kito mohadapi kosusahan damo ajab sonsaro, aman ado urakng inyo mondorako'i kito, aman kito conyiant pomakatn, conyiant ado pakai'an, aman kito mohadapi bohayo damo kito dibunuh, somuonyo nantai culih monyongkayoan kito doi' kasih Kristus.

³⁶ Ado inyo totulis dalapm Buku Suci: “Obai koi pocayo ko Duatn, jadi sotiap ari boko urakng honda' mombunuh koi. Koi samo sama'an boko domba inyo tajahan disombolih.”

³⁷ Apo, somuonyo nantai culih mongalahan kito obai Kristus inyo mongasihi kito bulah kito bondar-bondar monang.

³⁸ Obai, aku yakitn aman kito hidup damo mati, Allah totap mongasihi kito. Conyiant ado molekat, roh jahat damo kuaso bukai inyo ulih monyongkayoan kito doi' kasih Allah. Conyiant ado la'apo pan inyo tojadi watu ni'in damo nononyo,

³⁹ Conyiant ado la'apo pan di pucu' bumi damo di babah bumi, conyiant ado la'apo pan di sogolintaran alapm inyo ulih monyongkayoan kito doi' kasih Allah, ia'an kasih inyo Sio tunju'an ko kito dalapm Kristus Yesus, Tuhatn kito.