Roma 7 - Porjanjian Boharu Torjomahan Baso Dilakng Soari-ari

Kito co toposo monuruti Hukupm Torat obai Yesus mombebasan kito pakai' monuruti Roh Allah

¹ Boko somadikan, kaitn somuo mongoroti mongona'i hukupm socaro umum. Jadi, kaitn tontu tohu obai urakng monaati hukupm somanahan io hidup, apo kinyo pas-udah io mati.

² Contohnyo: Ado hukupm inyo mongobatan siku' urakng bini ko lakinyo. Somanahan lakinyo ija' hidup, bininyo dikobat'an ko hukupm nantai. Apo, aman lakinyo mati, jadi bininyo lopas doi' hukupm nantai.

³ Aman botina' nantai monjadi bini lolaki inyo bukai timpu lakinyo ija' hidup, jadi hukupm monyatoan io bomporajoan. Apo aman botina' nantai monjadi bini lolaki inyo bukai pas-udah lakinyo udah mati, jadi io kinyo bomporajoan.

⁴ Sama'an nian jam agatn kaitn, boko somadikanku! Caro hidup kaitn inyo manah udah mati obai bukakng Kristus mati pakai' kaitn. Jadi, hubukan kaitn agatn Hukupm Torat udah toputus. Watu ni'in, kaitn ado hubukan agatn Kristus, ia'an Sio inyo udah bobali' hidup doi' komatian. Somuo nantai tojadi oca' kito ulih monjadi boguno pakai' Allah.

⁵ Komai, kito ija' hidup sosuai agatn boko kohonda' kito sobagai monsio. Hukupm Torat morarakng kito bodosa, apo justru nantai inyo mombulah boko kohonda' nantai lobih kuat agi'. Jadi, boko anggota bukakng kito monjumpati boko kohonda' jahat nantai sampai kito bodosa. Akibatnyo, kito soharusnyo dihukupm mati topisah doi' Allah.

⁶ Apo watu ni'in, kito dibebasan. Kito kinyo tokobat agi' ko Hukupm Torat obai caro hidup kito inyo manah nantai udah mati. Watu ni'in, kito hidup agatn caro inyo boharu. Kito molayati Allah bukainyo agatn caro hidup inyo monuruti Hukupm Torat inyo totulis apo agatn caro hidup inyo monuruti Roh Allah.

Kuaso dosa morusa' tujuan inyo boi' doi' Hukupm Torat

⁷ Aman sama'an nian, apo inyo ulih kito pandiran? Apobai Hukupm Torat nantai jahat? Samo sokali cado! Sobali'nyo, justru Hukupm Torat mongajar aku mongona'i dosa. Contohnyo: Ado porintah ni'in dalapm Hukupm Torat: “Jangan mohonda'i umputn urakng bukai!” Doi' nantai, aku tohu kohonda' sama'an nantai ia'an dosa.

⁸ Apo pas-udah aku tohu porintah nantai, kuaso dosa monguti' kosompatan pakai' bokorojo dalapm hatiku sampai boko kohonda' nantai botambah kuat agi' dalapm hatiku. Obai aman hukupm Torat conyiant jadi dosa pan mati.

⁹ Komainyo aku hidup kinyo bohukupm Torat. Apo, pas-udah aku tohu porintah nantai, kuaso dosa ulih bokorojo mombulah aku somongkitn molawatn Allah samo halnyo kuaso dosa nantai mula'i hidup

¹⁰ huatan aku mati. Jadi, tujuan porintah nantai ia'an mombulah urakng hidup, apo nyatonyo aku molanggar porintah nantai sampai aku gola' dihukupm mati topisah doi' Allah.

¹¹ Obai, pas-udah aku tohu porintah nantai, kuaso dosa monguti' kosompatan nantai pakai' monipu hati aku. Daripado mondapat'an hidup, aku gola' dihukupm mati topisah doi' Allah.

Kohonda' pakai' bodosa kotakng kuat, apo Yesus ulih mombebasan kito doi' kuaso dosa nantai

¹² Jadi, Hukupm Torat boasal doi' Allah huatan somuo porintah-Nyo nantai suci, bondar huatan boi'.

¹³ Aman sama'an nian, apobai porintah inyo boi' nantai mombulah aku gola' dihukupm mati topisah doi' Allah? Samo sokali cado! Kuaso dosa inyo molabuhan nantai! Kuaso dosa monggunoan porintah inyo boi' pakai' mombulah aku gola' dihukupm mati topisah doi' Allah. Nantai tojadi oca' jolas apo nantai dosa. Porintah inyo boi' digunoan oca' lobih jolas agi' dosa memang kotakan jahat.

¹⁴ Kito tohu obai Hukupm Torat boasal doi' Roh Allah. Apo, aku ia'an monsio lomah. Aku culih molawatn kohonda'ku pakai' bodosa.

¹⁵ Aku kinyo tohu mapo aku molabuhan nantai. Aku co molabuhan boko porbuatan boi' inyo aku honda' labuhan. Apo aku molabuhan boko porbuatan jahat inyo aku bonci'.

¹⁶ Aku bulah kojahatan biar pan aku co honda' molabuhannyo. Apo, obai aku kinyo honda' bulah kojahatan, jadi nantai monunju'an aku sotuju obai Hukupm Torat nantai boi'.

¹⁷ Aku bulah kojahatan bukainyo obai aku honda' molabuhannyo, apo obai dosa ado di dalapm diriku.

¹⁸ Aku tohu kinyo ado inyo boi' dalapm diriku, ia'an aku ni'innam monsio agatn kohonda' pakai' bodosa. Biar pan aku ado kohonda' pakai' bulah koboi'an jam, apo aku co mampu molabuhannyo.

¹⁹ Jadi, aku kinyo molabuhan boko porbuatan boi' inyo aku honda' labuhan. Sobali'nyo, aku molabuhan boko porbuatan jahat inyo aku kinyo honda' labuhan.

²⁰ Aman aku bulah kojahatan, apo aku kinyo honda' bulah kojahatan nantai, rotinyo aku bulah kojahatan nantai obai ado dosa di dalapm diriku, bukainyo obai aku sikuꞌ honda' bulah kojahatan.

²¹ Kosimpulannyo, ado kobiasa'an ni'in inyo tojadi dalapm hidupku: Aku honda' bulah koboi'an, apo justru kojahatan inyo aku pulah.

²² Dalapm diriku, aku honda' somuo porintah huatan poraturan Allah dalapm Hukupm Torat.

²³ Biar pan aku bopikir somuo hukupm nantai boi', aku kinyo mampu molabuhannyo, obai ado hukupm bukai dalapm diriku inyo molawatn poraturan Allah nantai, ia'an kuaso dosa. Kuaso dosa bokorojo dalapm boko anggota bukakngku sampai aku monjadi hulutn dosa.

^24-26 Aku bopikir Hukupm Torat boi' huatan aku honda' monuruti Allah. Apo, bukakngku monuruti kohonda' pakai' bodosa sampai aku paca'an mondapat'an hukupan mati somanah-manahnyo! Colakoam aku ni'in! Sopo paca'an monyolamant'an aku doi' koadaan ni'in? Bosukurcam ko Allah obai Sio udah mongiripm Tuhatn kito, Yesus Kristus, pakai' molabuhan nantai.