Roma 6 - Porjanjian Boharu Torjomahan Baso Dilakng Soari-ari

Urakng inyo hidup bosatu agatn Kristus, kinyo hidup di babah kuaso dosa

¹ Aman sama'an nian, apo inyo ulih kito pandiran? Apobai kito ulih hala mombulah dosa oca' Allah mongkitn monunju'an koboi'an-Nyo ko kito?

² Samo sokali cado! Kito udah moninggalan caro hidup inyo manah, samo sama'an kito mati tohadap dosa. Jadi, jangannam kito ija' hidup agatn hala mombulah dosa!

³ Jangan kolupatn ni'in: Timpu kito dibaptis dalapm Kristus Yesus, rotinyo samo sama'an kito udah mati bosamo Sio.

⁴ Dalapm baptisan nantai, kito mati huatan dipasar bosamo Kristus oca' kito pan mondapat'an kohidupan boharu, samo sama'an Allah Bopai mombulah Kristus bobali' hidup doi' komatian ulih kuaso-Nyo inyo mulia.

⁵ Kito udah ado hubukan agatn Kristus obai kito udah mati bosamo Sio. Jadi, nononyo kito paca'an ado hubukan agatn Sio jam obai kito paca'an bobali' hidup samo sama'an Sio.

⁶ Kito tohu obai caro hidup kito inyo manah udah mati samo sama'an dibunuh di kayu salib bosamo Kristus. Nantai tojadi oca' kuaso dosa dalapm diri kito ulih dihancuran. Agatn sama'an nian, kito kinyo agi' monjadi hulutn dosa.

⁷ Obai, dosa kinyo ulih monguaso'i urakng inyo udah mati.

⁸ Jadi, obai kito udah mati bosamo Kristus, jadi kito pocayo obai kito paca'an hidup bosamo Sio jam.

⁹ Obai, kito tohu Kristus udah bobali' hidup huatan Sio kinyo paca'an mati agi'. Komatian kinyo bokuaso agi' dipucu' Sio.

¹⁰ Sio mati sokali aja' oca' kuaso dosa dikalahan pakai' somanah-manahnyo. Watu ni'in, Sio udah bobali' hidup huatan Sio hala hidup pakai' monyonangan Allah.

¹¹ Kaitn gola' moniant diri kaitn sama'an nantai jam. Kaitn udah mati tohadap dosa huatan kaitn hidup pakai' monyonangan Allah obai kaitn ado hubukan agatn Kristus Yesus.

¹² Obai nantai, jangan agi' mombiaran dosa monguaso'i hidup kaitn di dunia ni'in inyo ongkah sobontar aja'. Jangan agi' monuruti kohonda' pakai' bodosa.

¹³ Jangan tundu' ko kuaso dosa huatan mombiaran dosa momakai boko anggota bukakng kaitn sama'an alat pakai' bulah kojahatan. Hidup kaitn inyo manah nantai udah mati. Watu ni'in, kaitn dionji'i hidup boharu. Jadi, tundu' ko kuaso Allah huatan mombiaran Sio momakai boko anggota bukakng kaitn sama'an alat pakai' bulah inyo bondar.

¹⁴ Dosa kinyo monguaso'i kaitn agi'. Sobab, kaitn kinyo hidup dibabah kuaso Hukupm Torat, apo kaitn hidup dibabahkuaso Allah inyo hala monunju'an koboi'an-Nyo ko kaitn.

Jangan agi' menjadi hulutn dosa apo monjadi hulutn Allah inyo solalu bousaha monyonangan Sio

¹⁵ Jadi sama'an apo? Aku momandiran obai kito co hidup dibabah kuaso Hukupm Torat, apo kito hidup dibabah kuaso Allah inyo torus-monorus monunju'an koboi'an-Nyo ko kito. Apobai nantai boroti kito suba' mo mombulah dosa? Samo sokali cado!

¹⁶ Kaitn tontu tohu ni'in: aman kaitn monyorahan diri kaitn ko siku' urakng huatan monaati io, boroti kaitn ia'an hulutn urakng nantai. Kaitn ulih monjadi hulutn dosa ongko akibatnyo kaitn paca'an mati socaro rohani. Damo kaitn ulih monaati Allah agatn akibatnyo kaitn paca'an bulah inyo bondar.

¹⁷ Memang komai kaitn ia'an hulutn dosa. Apo, bosukurcam ko Allah, obai watu ni'in kaitn bondar-bondar udah monaati ajaran bondar inyo udah disampaian ko kaitn.

¹⁸ Kaitn udah dilopasan huatan bukainyo hulutn dosa agi'. Kaitn udah monjadi hulutn Allah inyo bulah kobondaran.

¹⁹ (Aku tohu kaitn ija' manah mongoroti boko hal rohani. Jadi, aku momakai contoh ni'in mongona'i hulutn oca' kaitn lobih mudah mongoroti.) Komai kaitn monyorahan diri kaitn monjadi hulutn dosa. Boko anggota bukakng kaitn digunoan pakai' bulah boko hal inyo kotor huatan jahat. Apo watu ni'in kaitn gola' monyorahan diri kaitn monjadi hulutn Allah oca' boko anggota bukakng-tubuh kaitn ulih digunoan pakai' bulah boko hal inyo bondar huatan borosih doi' dosa.

²⁰ Timpu kaitn hulutn dosa, kaitn bebas huatan kinyo bulah inyo bondar.

²¹ Caro hidup kaitn inyo manah nantai mohasilan lapo? Watu ni'in, kaitn malu mongona'i somuo porbuatan nantai obai caro hidup nantai ongkah mombulah kaitn mati, topisah doi' Allah.

²² Apo watu ni'in, kaitn udah bebas doi' kuaso dosa. Kaitn monjadi hulutn Allah. Kaitn ulih hidup borosih doi' dosa. Caro hidup nantai ado hasil, ia'an kaitn mondapat'an hidup inyo kokal.

²³ Upah doi' dosa ia'an kito gola' mati topisah doi' Allah. Apo Allah monunju'an koboi'an-Nyo ko kito. Sio moonji'i hidup kokal ko kito obai kito bosatu agatn Kristus Yesus, Tuhatn inyo bokuaso dipucu' kito.