Roma 5 - Porjanjian Boharu Torjomahan Baso Dilakng Soari-ari

Borokat pakai' urakng inyo monjadi bondar di hadapan Allah

¹ Watu ni'in, kito udah monjadi bondar obai kito pocayo ko Yesus. Jadi, kito ado damai agatn Allah. Nantai tojadi obai apo inyo Tuhatn Yesus Kristus labuhan pakai' kito.

² Obai kito pocayo ko Yesus, jadi kito jam ulih moalapi koboi'an inyo Allah torus-monorus ditunju'an ko kito. Nantaiam koadaan hubukan kito agatn Allah watu ni'in. Apo kito jam sonang-nyamanam obai kito yakitn moharapan obai nono kito paca'an mondapat'an hidup inyo mulia bosamo Allah di sorugo.

³ Bukainyo ongkah nantai saja'! Kito pan sonang-nyamanam pas watu kito mohadapi ajab sonsaro. Obai, kito mongotohu'i obai ajab sonsaro nantai mombulah kito somongkitn botahatn mohadapi ajab sonsaro.

⁴ Aman kito botahatn mohadapi ajab sonsaro, jadi kito lobih kuat boharap ko Allah.

⁵ Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

⁶ Kito kinyo ulih monjadi bondar agatn kokuatan kito siku'. Apo pas timpu inyo ditontuan Allah, Kristus mati pakai' kito. Sio molabuhan nantai biar pan timpu kito kinyo pocayo ko Allah.

⁷ Biasonyo kinyo ado urakng inyo honda' mati pakai' urakng bukai. Soandainyo ado urakng inyo mombulah inyo bondar, kotakng uyuh bondar jam urakng honda' mati pakai' io. Mungkitn ado urakng inyo borani mati pakai' urakng inyo boi'.

⁸ Apo, Allah monunju'an kasih-Nyo ko kito agatn caro ni'in: Timpu kito ija' urakng bodosa, Kristus mati pakai' kito.

⁹ Ni'inan kito udah dibondaran molalu'i komatian Kristus; obai nantai am kito pasti paca'an disolamant'an jam doi' ponggodi Allah molalu'i Kristus.

¹⁰ Komai, kito molawatn Allah. Apo kito bobali' bohubukan boi' agatn Sio obai Ana'-Nyo mati pakai' kito. Obai Yesus udah molabuhan nantai, pasti Sio jam paca'an monyolamant'an kito inyo udah bobali' bohubukan boi' agatn Allah. Obai Yesus hidup, jadi kito paca'an mondapat'an hidup kokal jam.

¹¹ Bukainyo ongkah nantai saja'! Kito pan sonang-nyamanam obai koboi'an Allah, ia'an watu ni'in kito bobali' bohubukan boi' agatn Sio obai porbuatan Yesus Kristus, Tuhatn kito.

Akibat doi' porbuatan Adapm huatan hasil doi' porbuatan Yesus

¹² Dosa mula'i ado di dunia ni'in obai siku' urakng, ia'an Adapm. Obai io bodosa, jadi io mati. Samo sama'an nantai, somuo urakng paca'an mati obai somuo urakng bodosa.

¹³ Boko urakng di dunia udah bulah dosa sobolupm Hukupm Torat. Obai bolupm ado Hukupm Torat, jadi dosa nantai kinyo dianggap samo agatn kosalahan molanggar porintah Allah.

¹⁴ Apo, sia' totap mati obai dosa nantai. Doi' joman Adapm sampai joman Musa, somuo urakng mati obai dosa biar pan sia' kinyo bodosa molanggar porintah Allah, sama'an inyo dipulah Adapm. Ado kosama'an di antaro Adapm huatan Yesus inyo paca'an bobali' datakng nononyo.

¹⁵ Apo ado pobedaan jam. Adapm ia'an siku' urakng. Obai io bodosa, jadi somuo urakng paca'an mati. Sama'an Yesus Kristus ia'an siku' urakng. Obai porbuatan-Nyo, jadi somuo urakng ulih monorima' koboi'an inyo Allah onju' ko sia'. Koboi'an Allah nantai ado akibat inyo jouh lobih bosar doi' dosa Adapm.

¹⁶ Akibat doi' dosa Adapm kinyo samo agatn akibat doi' koboi'an Allah nantai. Sobuti' dosa Adapm mombulah somuo urakng monjadi salah di hadapan Allah. Akibatnyo, somuo urakng gola' dihukupm. Apo, koboi'an Allah mombulah oca' dosa banya' urakng ulih diamputi. Akibatnyo, sia' monjadi bondar di hadapan Allah.

¹⁷ Obai dosa siku' urakng, jadi somuo urakng gola' mati. Apo, kotakng lobih bosar agi' akibat doi' apo inyo dilabuhan ulih siku' urakng inyo bukai, ia'an Yesus Kristus. Nantai am koboi'an inyo Allah onju' ko monsio, ia'an Sio mombulah caronyo oca' urakng ulih monjadi bondar di hadapan-Nyo. Ongko sia' nantai paca'an bokuaso di dunia ni'in molalu'i Kristus.

¹⁸ Jadi, sobuti' dosa ulih Adapm mombulah somuo urakng monjadi salah di hadapan Allah. Sama'an nian jam, sobuti' porbuatan bondar ulih Yesus mombulah somuo urakng monjadi bondar di hadapan Allah, sampai sia' mondapat kohidupan inyo sobondarnyo.

¹⁹ Obai, siku' urakng kinyo monaati porintah Allah, jadi somuo urakng bodosa. Sama'an nian jam, obai siku' urakng monuruti kohonda' Allah, jadi somuo urakng monjadi bondar di hadapan Allah.

²⁰ Jadi, dosa udah ado, lopas nian Hukupm Torat koluar. Akibatnyo, ado somongkitn banya' dosa. Biar pan dosa urakng botambah banya', lobih banya' agi' koboi'an inyo Allah onju' ko sia'.

²¹ Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.