Roma 3 - Porjanjian Boharu Torjomahan Baso Dilakng Soari-ari

¹ Aman sama'an nian caronyo urakng monjadi umant Allah, la'apo untukngnyo urakng Yahudi? Apobai sunant ado gunonyo?

² Memang urakng Yahudi ado banya' untukng dalapm somuo hal. Inyo kotakng pontikng obai pomandiran Allah dipocayoan ko urakng Yahudi.

³ Apo sama'an apo aman ado urakng Yahudi inyo kinyo sotia ko Allah? Apobai nantai paca'an mombulah Allah kinyo sotia monopat'i boko janji-Nyo ko sia'?

⁴ Samo sokali cado! Biar pan somuo urakng tumbukan, Allah hala bondar. Nantai samo sama'an inyo totulis dalapm Buku Suci: “Somuo pomandiran Duatn pasti bondar! Soandainyo, Duatn ulih diadili dalapm pongadilan, pasti Duatn inyo monang.”

⁵ Apo sama'an apo aman ado urakng inyo monggunoan pomikiran monsio, ongko bopandir sama'an ni'in, “Timpu kito jahat, hal nantai monunju'an obai Allah bondar. Jadi, aman Allah mohukupm kito, rotinyo Allah kinyo adil, pan?”

⁶ Samo sokali cado! Soandainyo Allah kinyo adil, nononyo co mungkitn Sio ulih mohakipi boko urakng di dunia ni'in?

⁷ Apo sama'an apo aman aku kinyo hidup agatn caro inyo bondar, ongko hal nantai mombulah kotakan jolas obai Allah bondar, sampai Allah dimuliaan? Mapo Allah ija' ulih monyalahan aku obai dosaku?

⁸ Hibo kito co bopandir aja', “Maracam kito bulah kojahatan oca' Allah kotakan dimuliaan.” Pasti ajaran nantai kotakan salah! (Memang ado urakng inyo monyebaran kisah tumbukan obai koi monyampaian ajaran inyo salah sama'an nantai. Nononyo pantas aja' Allah mohukupm boko urakng inyo tumbukan nantai.)

Koadaan somuo urakng kinyo cucu' di hadapan Allah (3:9-20)

⁹ Jadi, sama'an apo kosimpulannyo? Apobai kito urakng Yahudi lobih boi' di hadapan Allah daripado urakng bukai? Samo sokali cado! Koi udah monjolasan obai somuo urakng dikuaso'i ulih dosa, boi' urakng Yahudi honda' pan urakng bukai Yahudi.

¹⁰ Sama'an inyo totulis dalapm Buku Suci: “Conyiant siku' urakng pan inyo hidup bondar di hadapan Allah.

¹¹ Conyiant urakng inyo mongoroti lapo inyo bondar. Conyiant ado urakng inyo honda' mongonal Allah.

¹² Somuo urakng udah honda' hidup jouh doi' Allah. Somuo sia' co boguno pakai' Allah. Conyiant siku' urakng pan inyo bulah koboi'an.

¹³ Boko pomandiran inyo koluar doi' nyao sia' mouru'an urakng mansu' ko dalapm pasaran inyo tobuka'. Lidah sia' monipu urakng bukai. Pomandiran sia' monyakiti urakng bukai samo sama'an biso ular.

¹⁴ Agatn oso bonci' sia' mongutu' urakng bukai.

¹⁵ Sia' hala honda' mondorako'i huatan mombunuh urakng bukai.

¹⁶ Di mono aja' sia' botula', sia' molonyapan kohidupan urakng bukai. Sia' mombulah urakng bukai mondorita'.

¹⁷ Sia' kinyo tohu caronyo hidup damai agatn urakng bukai.

¹⁸ Sia' kinyo gola' agatn Allah.”

¹⁹ Kito tohu obai la'apo pan inyo totulis dalapm Hukupm Torat, tomansu' pomandiran nantai, pakai' urakng inyo mondapat'an Hukupm Torat nantai jam. Jadi, sopo pan conyiant alasan pakai' mombondaran diri. Somuo urakng di soluruh dunia gola' dihukupm Allah.

²⁰ Kinyo ado urakng inyo ulih monjadi bondar di hadapan Allah agatn caro monaati Hukupm Torat. Justru Hukupm Torat inyo mombulah urakng sadar obai sia' bodosa obai sia' kinyo ulih monaati soluruh Hukupm Torat nantai.

Urakng doi' somuo banso ulih monjadi bondar di hadapan Allah agatn pocayo ko Yesus

²¹ Apo watu ni'in Allah udah monunju'an caronyo monsio ulih monjadi bondar di hadapan-Nyo. Caronyo bukai agatn monaati Hukupm Torat. Apo buku Hukupm Torat huatan boko buku nabi-nabi momadahan mongona'i caro nantai.

²² Ia'an, urakng monjadi bondar di hadapan Allah agatn caro pocayo ko Yesus Kristus. Caronyo samo pakai' somuo urakng. Dalapm hal nantai, urakng Yahudi kinyo ado bedanyo doi' urakng bukai Yahudi.

²³ Obai, somuo urakng udah bodosa ongko udah kohilakan komulia'an Allah.

²⁴ Apo Allah udah monunju'an koboi'an-Nyo ko monsio. Sio mombulah caronyo oca' urakng ulih monjadi bondar di hadapan-Nyo, nyiant usaha doi' sia'. Kristus Yesus inyo mombayar pakai' mombebasan sia' doi' hukupan dosa.

²⁵ Sio mombayar agatn darah-Nyo siku' timpu Sio mati di kayu salib. Sio monjadi kurbatn oca' dosa urakng ulih diamputi, ia'an aman sia' pocayo ko Sio. Allah monyorahan Yesus sama'an nantai pakai' monunju'an obai Sio adil huatan mohukupm dosa. Komai, Allah sabar agatn monsio. Sio bolupm mohukupm somuo dosa sia'.

²⁶ Apo ni'inan, Allah monunju'an Sio adil obai Sio mohukupm dosa. Yesus inyo monobus hukupan dosa nantai. Allah monunju'an diri-Nyo bondar ongko monunju'an obai urakng inyo pocayo ko Yesus monjadi bondar di hadapan-Nyo.

²⁷ Aman sama'an nian, apobai monsio ulih moninggian diri obai io monjadi bondar di hadapan Allah obai porbuatannyo siku'? Samo sokali cado! Sobab, nantai tojadi bukai obai porbuatannyo siku', apo obai io pocayo ko Yesus.

²⁸ Koi yakitn obai monsio monjadi bondar di hadapan Allah bukainyo obai io monaati Hukupm Torat, apo obai io pocayo ko Yesus Kristus.

²⁹ Cubo bopikir: Apobai Allah ongkah Allah urakng Yahudi am? Samo sokali cado! Sio ia'an Allah boko banso bukai jam!

³⁰ Ongkah ado siku' Allah. Jadi, caronyo monjadi bondar di hadapan-Nyo ia'an caro inyo samo pakai' urakng Yahudi inyo bosunant huatan pakai' urakng bukai Yahudi inyo co bosunant. Caronyo ia'an pocayo ko Yesus.

³¹ Aman kito monjadi bondar obai kito pocayo, apobai nantai boroti kito bopikir obai Hukupm Torat kinyo ado gunonyo? Samo sokali cado! Sobali'nyo justru obai kito pocayo, jadi kito monuruti la'apo inyo Allah masud agatn moonju' Hukupm Torat.