Roma 2 - Porjanjian Boharu Torjomahan Baso Dilakng Soari-ari

Allah mohakipi somuo urakng agatn adil (2:1-16)

¹ Jadi, kaitn inyo mohakipi urakng bukai pan bosalah. Kaitn kinyo ulih bopandir kaitn bondar. Obai, kaitn molabuhan boko hal inyo jahat samo sama'an urakng inyo kaitn hakipi. Jadi, agatn mohakipi urakng bukai, sobondarnyo kaitn pan mohakipi diri kaitn siku'.

² Kito somuo tohu obai Allah adil timpu Sio mohukupm urakng inyo molabuhan boko hal inyo jahat.

³ Jadi, aman kaitn mohakipi urakng bukai nantai apo kaitn jam molabuhan boko hal inyo samo, jangan bopikir Allah kinyo paca'an mohukupm kaitn!

⁴ Allah kotakan boi' huatan sabar ko kaitn. Sio kinyo lansukng mohukupm kaitn. Jangan moanggap koboi'an-Nyo nantai kinyo borogo? Kaitn gola' mongoroti obai Allah monunju'an koboi'an-Nyo ko kaitn obai Sio honda' oca' kaitn moninggalan boko dosa kaitn.

⁵ Apo kaitn tikakan. Hati kaitn kinyo honda' borubah. Obai nantaiam, kaitn siku' mombulah hukupan kaitn botambah lobih borat agi'. Nantai tojadi timpu ari Kiamant nononyo watu Allah monyatoan Sio kotakan godi tohadap dosa, ongko mohukupm urakng agatn adil.

⁶ Timpu nantai, Allah paca'an mombalas sotiap urakng sosuai agatn porbuatannyo.

⁷ Allah paca'an moonju' kohidupan kokal ko urakng inyo kinyo monyorah pakai' bulah koboi'an, ia'an urakng inyo bulah koboi'an obai moncari' komulia'an huatan hormat doi' Allah, huatan honda' dionji'i hidup kokal doi' Sio.

⁸ Apo Allah paca'an godi huatan mohukupm urakng inyo momontikan diri siku' huatan kinyo honda' monaati ajaran inyo bondar, apo honda' monuruti inyo jahat.

⁹ Somuo urakng inyo bulah kojahatan paca'an sonsaro huatan mondorita', potamo-tamo urakng Yahudi, huatan jam urakng bukai Yahudi.

¹⁰ Apo somuo urakng inyo bulah koboi'an paca'an bodapat komulia'an, hormat huatan sonang-asau, potamo-tamo urakng Yahudi, huatan pan urakng bukai Yahudi.

¹¹ Obai, Allah kinyo momihak boko urakng totontu.

¹² Obai somuo urakng inyo bodosa co bohukupm Torat paca'an bonaso agatn kinyo bohukupm Torat; agatn somuo urakng inyo bodosa di babah hukupm Torat paca'an di hakipi ulih hukupm Torat

¹³ Apo urakng monjadi bondar di hadapan Allah bukai obai mondinga' Hukupm Torat, apo obai monaati Hukupm Torat nantai.

¹⁴ Memang urakng inyo bukai Yahudi kinyo mondapat Hukupm Torat. Apo aman sia' ado kohonda' sia' siku' hidup sosuai agatn Hukupm Torat, jadi sia' monunju'an obai hati sia' sikuꞌ mombimbikng sia' samo sama'an Hukupm Torat mombimbikng urakng Yahudi.

¹⁵ Sia' udah mongoroti isi Hukupm Torat nantai dalapm hati sia' sikuꞌ. Jadi, pikiran dalapm hati sia' monyalahan sia' aman sia' bulah kojahatan, huatan mombela sia' aman sia' bulah koboi'an.

¹⁶ Nononyo hal nantai monjadi kotiat'an. Ia'an, timpu Allah molalu'i Kristus Yesus pakai' mohakipi somuo hal inyo tosimpatn dalapm hati monsio. Nantai sosuai agatn Kabar Boi' inyo aku boritoan.

Koadaan urakng Yahudi (2:17–3:8)

¹⁷ Sama'an apo agatn kaitn? Kaitn bangga monyobut diri kaitn urakng Yahudi. Kaitn bopikir kaitn paca'an disolamant'an obai kaitn mondapat Hukupm Torat. Kaitn momuji diri obai kaitn banso inyo dipilih Allah.

¹⁸ Kaitn diajar doi' Hukupm Torat sampai kaitn mongotohu'i kohonda' Allah huatan mongotohu'i la'apo inyo bondar huatan la'apo inyo salah.

¹⁹ Kaitn mooso yakitn obai kaitn mampu mombimbikng urakng buto huatan monoraki jalatn pakai' urakng dalapm golap.

²⁰ Kaitn mondidik boko urakng inyo kinyo sonunuh huatan mongajar boko urakng inyo budu. Kaitn yakitn obai di dalapm Hukupm Torat kaitn momuku'i somuo pongotohuan ongko ajaran inyo bondar.

²¹ Kaitn mongajar urakng bukai. Apo soharusnyo kaitn mongajar diri kaitn siku'! Kaitn mongajar urakng bukai, “Jangan mongolit!” Apo kaitn siku' mongolit!

²² Kaitn bopandir, “Jangan momporajoan!” Apo kaitn siku' momporajoan! Kaitn mombonci' lompatukng songiang-duato. Apo kaitn siku' morampok babatn borono doi' rumah tompat monyombah songiang-duato!

²³ Kaitn bangga obai kaitn mondapat Hukupm Torat. Apo kaitn siku' mohayam Allah agatn molanggar Hukupm Torat nantai!

²⁴ Sama'an inyo totulis dalapm Buku Suci, “Obai kaitn, jadi boko banso bukai mongutu' damo Allah.”

²⁵ Aman kaitn monaati Hukupm Torat, jadi sunant kaitn ado gunonyo. Apo aman kaitn molanggar Hukupm Torat, jadi sunant kaitn pocumo aja'am.

²⁶ Sama'an nian jam, aman ado urakng inyo kinyo disunant, apo io monaati Hukupm Torat, jadi Allah paca'an monorima' io samo sama'an urakng inyo disunant.

²⁷ Ado boko urakng inyo monaati Hukupm Torat, biar pan sia' kinyo disunant. Sia' paca'an mohakipi kaitn urakng Yahudi inyo disunant, ia'an kaitn inyo mondapat Hukupm Torat inyo totulis, apo kinyo monaatinyo.

²⁸ Obai urakng inyo bondar-bondar Yahudi bukainyo bayo aja' damonyo Yahudi; ongko urakng inyo bondar-bondar disunant bukainyo urakng inyo disunant socaro lahirnyo aja'.

²⁹ Sobali'nyo, urakng inyo bondar-bondar Yahudi ia'an urakng inyo hatinyo bojiwa Yahudi; huatan urakng inyo bondar-bondar disunant ia'an sunant di hati inyo dikorojoan ulih Roh Allah, bukainyo ditulis dalapm buku. Urakng sama'an nian monorima' pujian doi' Allah, bukainyo doi' monsio.