Roma 16 - Porjanjian Boharu Torjomahan Baso Dilakng Soari-ari

Pandir toahir Paulus di dalapm suratnyo

¹ Aku honda' mongonalan somadikanku Febe ko kaitn. Io molayati jomaat di Kengkrea.

² Honda' ku padahan ko kaitn nantai oca' kaitn monyambut io agatn caro inyo pantas pakai' urakng inyo pocayo. Sambutcam io dalapm Tuhatn ongko tulukngcam io agatn kopontikannyo. Obai, io udah monulukng urakng banya', tomansu' aku.

³ Padahan salapm ko Priskila ongko Akwila. Sia' bokorojosamo agatn aku pakai' molayati Kristus Yesus.

⁴ Sia' kalo hampir mati obai honda' monyolamant'an hidupku. Aku botorima' kasih ko sia'. Malahan, somuo jomaat urakng bukainyo urakng Yahudi botorima' kasih ko sia'.

⁵ Sampaian salapm jam ko jomaat inyo bokumpul di rumah sia'. Salapm ko Epenetus, somadikan inyo ku kasihi. Io nam urakng inyo potamo di doerah Asia inyo monjadi pocayo ko Kristus.

⁶ Salapm ko Maria inyo udah bokorojo koras pakai' kaitn.

⁷ Salapm ko Andronikus ongko Yunias, boko somadikan doi' banso Yahudi samo sama'an aku. Sia' kalo ditamoan ko dalapm ponjara bosamo agatn aku. Sia' pocayo ko Kristus sobolupm aku, ongko sia' tokonal di antaro boko rasul.

⁸ Salapm ko Ampliatus inyo ku kasihi dalapm Tuhatn.

⁹ Salapm ko Urbanus inyo bokorojosamo agatn koi pakai' molayati Kristus. Salapm ko Stakhis inyo ku kasihi.

¹⁰ Salapm ko Apeles. Io kalo diuji ongko monunju'an obai io totap sotia ko Kristus. Salapm ko koluarga Aristobulus ongko somuo urakng inyo diapm di rumahnyo.

¹¹ Salapm ko Herodion, somadikan doi' banso Yahudi samo sama'an aku. Salapm ko koluarga Narkisus ongko somuo urakng inyo pocayo ko Tuhatn inyo diapm di rumahnyo.

¹² Salapm ko Trifena ongko Trifosa inyo bokorojo koras molayati Tuhatn. Salapm ko Persis inyo ku kasihi inyo pan bokorojo koras molayati Tuhatn.

¹³ Salapm ko Rufus inyo dipilih Tuhatn socaro husus. Salapm ko indai Rufus jam inyo udah monjadi samo sama'an indai ku siku'.

¹⁴ Salapm ko Asinkritus, Flegon, Hermes, Patrobas, Hermas ongko boko somadikan bukai inyo bosamo-samo agatn sia'.

¹⁵ Salapm ko Filologus ongko Yulia; ko Nereus ongko somadikan botina'nyo; ko Olimpas ongko ko somuo urakng pocayo inyo bosamo-samo agatn sia'.

¹⁶ Onju'cam salapm inyo ponuh kasih ko inyo bukai. Salapm ko kaitn doi' somuo jomaat Kristus.

¹⁷ Boko somadikan. Aku kotakng muhun ko kaitn oca' kaitn boboi'cam agatn boko urakng inyo honda' bulah popocahan di antaro kaitn. Sia' honda' oca' kaitn monjadi sosat. Ajaran sia' bolawatan agatn ajaran inyo udah ditorima' kaitn. Jangan tuyut sia'!

¹⁸ Obai, boko urakng inyo molabuhan ubo nantai sobondarnyo co bokorojo molayati Kristus, Tuhatn kito. Sia' bayo honda' mongosihan kohonda' sia' siku'. Sia' momuji-muji agatn pomandiran inyo manis pakai' monipu urakng inyo co tohu tujuan sia' inyo jahat.

¹⁹ Somuo urakng udah mondinga' obai kaitn monaati Tuhatn. Jadi aku kotakng sonang obai kaitn! Apo aku honda' oca' kaitn pintar-corodi' mongotohu'i lapo inyo boi' ongko co bulah kojahatan.

²⁰ Allah inyo moonji'i sonang-nyamanam tajahan copat molonyapan kuaso Rajo Sitatn inyo molawatn kaitn. Aku bodoa oca' Yesus, Tuhatn kito, hala monunju'an kasih-Nyo ko kaitn.

²¹ Salapm ko kaitn doi' Timotius inyo bokorojo molayati bosamoku. Salapm jam doi' Lukius, Yason, ongko Sosipater, boko somadikan doi' banso Yahudi samo sama'an aku.

²² Salapm dalapm Tuhatn ko kaitn doi' Tertius, ia'an aku inyo monulis pomandiran Paulus dalapm surat ni'in.

²³ Salapm ko kaitn doi' Gayus, inyo monorima'ku bodiapm di rumahnyo. Io pan monorima' somuo jomaat di rumahnyo. Salapm ko kaitn doi' Erastus, bendahara kota. Salapm jam doi' Kwartus, urakng inyo pocayo samo sama'an kito. [

²⁴ Aku bodoa oca' Yesus Kristus, Tuhatn kito, hala monunju'an kasih-Nyo ko kaitn somuo. Amin!

²⁵ Topujicam Allah! Io inyo bokuaso bulah kaitn kuat pocayo sosuai agatn Kabar Boi' mongona'i Yesus Kristus inyo ku boritoan. Kabar Boi' nantai momadahan mongona'i hajat Allah pakai' somuo banso. Somanah boabad-abad, conyiant monsio inyo mongotohu'i hajat Allah nantai.

²⁶ Apo watu ni'in Allah inyo hidup kokal udah monyiuh oca' roncana-Nyo dipadahan, ia'an roncana-Nyo inyo udah ditulis dalapm boko buku nabi. Agatn ubo nantai, hajat Allah diboritoan ko somuo banso oca' sia' pocayo ongko monaati-Nyo.

²⁷ Sionam Allah. Sio pintar-corodi' dalapm somuo la'apo pan. Topujicam Sio molalu'i Yesus Kristus pakai' somanah-manahnyo. Amin!]