Roma 15 - Porjanjian Boharu Torjomahan Baso Dilakng Soari-ari

Bousaha monulukng urakng bukai pakai' lobih kuat pocayo ko Yesus

^1-2 Kito inyo kuat gola' monulukng urakng inyo kurakng kuat. Kito gola' momporhatian lapo inyo boi' pakai' monulukng urakng bukai monjadi lobih kuat pocayo. Kito gola' bousaha monyonangan siku'-monyiku'. Jangan kito bayo monyonangan diri kito siku'.

³ Obai, Kristus pan kinyo bayo monyonangan diri-Nyo siku'. Samo sama'an inyo totulis dalapm Buku Suci: “Kato inyo sia' gunoan pakai' mohayam Duatn, au Allah, sia' gunoan pakai' mohayam aku.”

⁴ La'apo pan inyo ditulis komai dalapm Buku Suci, ditulis pakai' moajari kito. Boko ajaran nantai monguat'an hati kito ongko bulah kito botahatn mohadapi ajab sonsaro. Agatn ubo nantai, kito diajari oca' kito boharap ko Allah.

⁵ Sio nam Allah inyo monguat'an hati kito ongko bulah kito botahatn mohadapi ajab sonsaro. Aku bodoa oca' Sio bulah kaitn hidup dalapm kosatuan sosuai agatn kohonda' Kristus Yesus.

⁶ Lalu, agatn satu hati ongko satu saro, kaitn bosamo-samo ulih momuji Allah, Bopai doi' Yesus Kristus, Tuhatn inyo bokuaso dipucu' kito.

⁷ Obai somuo nantai, kaitn gola' hala monorima' inyo bukai samo sama'an Kristus udah monorima' kaitn. Labuhancam nantai oca' Allah dipuji.

⁸ Masud ku ubo ni'inan: watu Kristus datakng, Sio molayati banso Yahudi pakai' monunju'an obai Allah sotia monopat'i boko janji-Nyo ko angki-bayatn sia'.

⁹ Kristus jam bulah boko banso bukai momuji Allah obai kasih-Nyo. Samo sama'an inyo totulis dalapm Buku Suci: “Obai nantai, watu aku ado di tongah-tongah urakng bukainyo urakng Yahudi, aku tajahan momuji Duatn, au Allah. Aku tajahan bonyanyi pakai' momuji damo Duatn.”

¹⁰ Ado jam inyo ditulis dinga' ni'inan: “Oi boko banso bukainyo banso Yahudi! Sonang-nyamancam bosamo agatn umant Allah, banso Yahudi.”

¹¹ Huatan ni'in jam: “Oi boko banso bukainyo banso Yahudi! Pujicam Tuhatn! Kohonda'nyo somuo banso momuji Sio.”

¹² Solaitn nantai jam, joman komai nabi Yesaya bopandir: “Ado Urakng doi' koturutan Isai inyo tajahan datakng. Sio tajahan momorintah boko banso bukainyo banso Yahudi. Sia' tajahan boharap ko Sio.”

¹³ Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Paulus monjolasan alasan io monulis surat ni'in

¹⁴ Boko somadikanku, aku kotakng yakitn obai kaitn kotakan boi' ongko mongotohu'i somuo inyo dipontikan. Jadi, kaitn ulih momadahi siku'-monyiku'.

¹⁵ Apo, aku totap borani monulis agatn torus-torakng pakai' moingant'an mongona'i boboropo hal. Aku borani monulis somuo nantai obai Allah udah monunju'an kasih-Nyo ko aku,

¹⁶ ia'an nantai Sio moutus aku monjadi urakng inyo molayati Kristus Yesus di antaro boko banso bukainyo banso Yahudi. Aku samo sama'an imam inyo moonju' posombahan ko Allah. Obai, aku momboritoan Kabar Boi' doi' Allah ko sia' oca' sia' ulih ditorima' Allah obai Roh Allah bulah sia' monjadi borosih doi' dosa.

¹⁷ Obai nantai, aku bangga mongona'i polayatan inyo Kristus Yesus kona'an ko aku pakai' Allah.

¹⁸ Aku co borani bopandir momuji diriku mongona'i lapo ja' inyo bukai, bayo mongona'i lapo inyo Kristus kona'an ko aku pakai' molabuhannyo. Ia'an nantai, Sio momakai aku pakai' mombimbikng boko urakng inyo bukainyo urakng Yahudi oca' sia' monjadi taat ko Allah. Sio momakai pomandiranku ongko porbuatanku pakai' molabuhan nantai.

¹⁹ Sio pan momakai bomacapm mujisat ongko kuaso Roh Allah. Ubo nianam caronyo aku momboritoan soluruh Kabar Boi' mongona'i Kristus doi' kota Yerusalem sampai ko doerah Ilirikum.

²⁰ Aku hala honda' momboritoan di boko tompat inyo bolupm kalo urakng konal agatn damo Kristus. Obai, aku co honda' monorusan polayatan inyo udah dimula'i urakng bukai.

²¹ Apo, aku honda' oca' pomandiran ni'in inyo ditulis dalapm Buku Suci monjadi nyata: “Boko urakng inyo bolupm kalo mondinga' borito mongona'i Sio, sia' tajahan mongotohu'i sopo Sio. Boko urakng inyo bolupm kalo mondinga' kabar mongona'i Sio, sia' tajahan mongoroti.”

Hajat Paulus honda' monjongu' sia' di kota Roma

²² Obai polayatanku nantai, lalu hala ado halakan sampai culihku monjongu' kaitn.

²³ Apo, watu ni'in pokoroja'an ku di boko doerah nantai udah jadiam ongko udah botohutn-tohutn manahnyo aku honda' monjongu' kaitn.

²⁴ Obai nantai, aku boharap ulih monjongu' kaitn dalapm pojalatanku ko tanah Spanyol. Lopas aku ulih monikmati kunjukanku bosamo agatn kaitn pakai' boboropo manahnyo, ku harap kaitn tajahan monulukng ku molajuan pojalatanku ko su'utan.

²⁵ Apo, ni'in aku tajahan botula' ko Yerusalem pakai' moonju'an bantu'an inyo dionju' pakai' monulukng boko urakng inyo pocayo di su'utan.

²⁶ Obai, boko jomaat di doerah Makedonia ongko Akhaya udah mombulah koputusan pakai' moonji'i sumbakan nantai pakai' monulukng urakng pocayo inyo jaro di Yerusalem.

²⁷ Agatn sonang hati, urakng bukainyo urakng Yahudi nantai bulah koputusan pakai' monulukng urakng Yahudi. Memang sia' wajib molabuhan nantai obai ubonyo sia' bohutakng ko urakng Yahudi. Masudku, urakng Yahudi ado hubukan agatn Allah ongko sia' mombagian borokat nantai agatn urakng bukainyo urakng Yahudi. Obai nantai, urakng bukainyo urakng Yahudi wajib mombagian borokat doi' dunia ni'in pakai' monulukng urakng Yahudi.

²⁸ Jadi, aku tajahan monjadi'i pogota'an nantai. Aku tajahan moonju' ko sia' di Yerusalem sumbakan nantai inyo udah dikumpulan boko urakng pocayo bukai. Lopas nantai, aku tajahan botula' ko Spanyol ongko singgah ko kota kaitn.

²⁹ Aku tohu timpu aku datakng monjongu' kaitn, aku tajahan mombaba' banya' borokat doi' Kristus pakai' kaitn.

³⁰ Boko somadikan, obai kito bosatu dalapm Yesus Kristus, Tuhatn kito, ongko obai Roh Allah mombulah kito hala mongasihi, aku kotakng muhun ko kaitn pakai' bodoa ko Allah bosamo-samo agatn aku. Tulukng bodoa pakai' aku

³¹ oca' Tuhatn molinduki aku doi' boko urakng inyo kinyo pocayo di doerah Yudea inyo honda' monyakitiku. Tulukng bodoa jam oca' polayatanku pakai' Yerusalem ditorima' agatn boi' boko urakng inyo pocayo di siatn.

³² Agatn ubo nantai, aman Allah moijitan, aku tajahan datakng ko kaitn agatn sonang hati. Timpu aku bosamo kaitn, bukakng ongko hati ku dapat dikuatan agi'.

³³ Aku bodoa oca' Allah hala ado bosamo agatn kaitn somuo, ia'an nantai Allah inyo moonji'i sonang-nyamanam. Amin.