Roma 14 - Porjanjian Boharu Torjomahan Baso Dilakng Soari-ari

Jangan mohakipi urakng bukai inyo pocayo

¹ Ado boko somadikan inyo kurakng kuat pocayo ia'an sia' ija' gangga'-gua'an ulih molabuhan la'apo pan damo cado. Jangan botikakng mongona'i pondapat sia'. Apo, torima'cam sia' agatn sonang hati.

² Contohnyo: Ado urakng inyo bopikir io ulih makatn apo aja'. Apo ado urakng inyo kurakng kuat pocayo inyo bayo makatn sonsayuran mo.

³ Urakng inyo bopua' la'apo pan, jangannam io mohanyam urakng inyo bayo bopua' pomakatn inyo totontu nantai. Urakng inyo bayo bopua' pomakatn inyo totontu nantai, jangan io monyalahan urakng inyo bopua' la'apo pan, obai Allah udah monorima' urakng nantai.

⁴ Urakng nantai ia'an polayatn umputn Tuhatn, bukainyo umputn kolai. Jadi, kolai conyiant ado hak pakai' mohakipi io. Aman io jatu' damo bodiritn, nantai urusan Tuhatn inyo bokuaso doi' io. Apo pasti io tajahan totap bodiritn togap obai Tuhatn bokuaso mombulah io bodiritn togap.

⁵ Ado urakng inyo bopikir ado ari totontu inyo lobih pontikng daripado ari inyo bukai. Apo, ado jam urakng inyo bopikir somuo ari samo ja'. Sotiap urakng gola' yakitn dalapm hatinyo siku' obai io molabuhan la'apo inyo bondar di hadapan Tuhatn.

⁶ Urakng inyo bopikir ado ari totontu inyo lobih pontikng, io molabuhan nantai pakai' mohormati Tuhatn. Urakng inyo bopua' la'apo ja', io molabuhan nantai pakai' mohormati Tuhatn obai io bosukur ko Allah. Urakng inyo bayo bopua' pomakatn inyo totontu, io molabuhan nantai pakai' mohormati Tuhatn. Io pan bosukur ko Allah.

⁷ Conyiant ado urakng di antaro kito inyo hidup pakai' dirinyo siku'. Conyiant ado urakng inyo mati pakai' dirinyo siku'.

⁸ Apo, aman kito hidup, kito hidup pakai' Tuhatn. Aman kito mati, kito mati pakai' Tuhatn. Jadi, aman kito hidup damo mati, kito ia'an umputn Tuhatn.

⁹ Nanam sobabnyo Kristus udah mati ongko hidup agi', ia'an oca' Sio monjadi Tuhatn inyo bokuaso doi' urakng inyo udah mati ongko urakng inyo ija' hidup.

¹⁰ Jadi, jangannam kolai mohakipi somadikan kolai! Jangannam kolai mohanyam somadikan kolai! Obai, nononyo kito somuo gola' mohadap tahta Allah. Sio tajahan monontuan sopo inyo bondar ongko sopo inyo salah.

¹¹ Ado inyo totulis dalapm Buku Suci: “Tuhatn bopandir, ‘Doi' diri-Ku siku' sobagai Allah inyo hidup, Aku bopandir, somuo urakng tajahan tundu' monyungkapan di hadapan-Ku. Somuo urakng tajahan mongaku' obai Akunam Allah.’ ”

¹² Jadi, sotiap kito gola' mompotanggukng-jawaban somuo porbuatan kito ko Allah.

Jangan molabuhan la'apo pan inyo mombulah urakng bukai bodosa

¹³ Obai nantai, jangannam kito hala mohakipi agi'! Apo, kito gola' bousaha oca' kito co molabuhan la'apo pan inyo ulih mombulah urakng bukai tojorumus ko dalapm dosa.

¹⁴ Obai aku bosatu agatn Tuhatn Yesus, jadi aku tohu obai conyiant ado la'apo pan inyo pomali. Aku yakitn mongona'i nantai. Apo, aman ado urakng inyo bopikir obai ado sosuatu inyo campah, memang bagi io hal nantai pomali.

¹⁵ Aman kolai bopua' sosuatu inyo somadikan kolai bopikir campah, jadi kolai monyakiti hati io. Rotinyo, kolai co hidup agatn caro inyo mongasihi urakng bukai. Kristus udah mati pakai' monyolamant'an somadikan kolai nantaiam. Jadi, jangannam kolai mombulah io bonaso obai mosalah lapo inyo kolai pua'i.

¹⁶ Jangan mombulah lou' inyo boi' bagi kaitn monjadi lou' inyo dihanyam urakng bukai.

¹⁷ Obai, Koraja'an Allah bukainyo soal poraturan pomakatn ongko minuman, apo soal hidup inyo bondar, hidup agatn damai, ongko hidup agatn sonang-nyamanam. Somuo nantai doi' Roh Allah.

¹⁸ Urakng inyo molayati Kristus agatn caro hidup ubo nantai, io monyonangan Allah ongko dihormati monsio.

¹⁹ Obai nantai, kito gola' bousaha oca' porbuatan kito mombulah somuo kito hidup agatn damai. Kito gola' bousaha monulukng urakng bukai pakai' lobih kuat pocayo ko Yesus.

²⁰ Jangannam kolai morusa' lapo inyo dikorojoan Allah bayo obai mosalah pomakatn. Conyiant ado pomakatn inyo campah. Apo, aman kolai bopua' sosuatu inyo somadikan kolai bopikir nantai campah, lalu hal nantai bulah io jatu' dalapm dosa, rotinyo kolai bosalah.

²¹ Aman bopua' dagikng damo minum anggur damo porbuatan lapo ja' bulah somadikan kolai jatu' dalapm dosa, lobih boi' kolai jangan molabuhan nantai.

²² Kopocaya'an kolai mongona'i poraturan ubo nantai ia'an urusan kolai siku' agatn Allah. Diborokaticam urakng inyo molabuhan lapo inyo io pikir bondar, ongko co monyalahan dirinyo siku'.

²³ Apo, aman ado urakng inyo gangga'-gua'an ongko io totap bopua' lapo inyo io pikir nantai campah, jadi io salah di hadapan Allah. Obai, porbuatannyo bolawatan agatn kopocaya'annyo. Somuo hal inyo urakng labuhan, aman io co pocayo obai nantai bondar, jadi nantai am dosa.