Roma 13 - Porjanjian Boharu Torjomahan Baso Dilakng Soari-ari

Taat agatn pomorintah

¹ Somuo urakng gola' monaati pomorintah obai Allah inyo moonji'i kuaso ko sia' pakai' momorintah. Allah monotap'an somuo pomorintah inyo ado.

² Jadi, sotiap urakng inyo molawatn pomorintah sobondarnyo molawatn la'apo inyo udah ditotapan Allah. Urakng inyo molabuhan nantai pasti tajahan dihukupm.

³ Apo, urakng inyo bulah koboi'an jangan gola'am dihukupm pomorintah. Bayo urakng inyo bulah kojahatan harus gola'. Kata'an kolai honda' hidup co gola' agatn pomorintah bai? Bulah koboi'an, lalu pomorintah tajahan momuji kolai.

⁴ Obai Allah momakai pomorintah pakai' monulukng kolai. Apo, aman kolai bulah kojahatan, kolai gola' monjadi gola' ko pomorintah. Obai sia' ado kuaso pakai' mohukupm kolai. Allah momakai pomorintah pakai' mohukupm urakng inyo bulah kojahatan.

⁵ Nantaiam sobabnyo kolai gola' monaati pomorintah, bukainyo obai kolai gola' dihukupm ulih Allah, apo obai hati kolai tohu nian boi'.

⁶ Nianam alasan kaitn gola' mombayar pajak. Obai, Allah momakai pomorintah pakai' mourus somuo hal nantai.

⁷ Jadi, kaitn gola' mombayar somuo urakng inyo patut kaitn bayar. Bayarcam pajak ko urakng inyo bohak monorima' pajak huatan cukai ko urakng inyo monorima' cukai. Rogo'icam somuo urakng inyo patut kaitn rogo'i. Hormaticam somuo urakng inyo patut kaitn hormati.

Agatn caro mongasihi urakng bukai, kito momonuhi somuo Hukupm Torat

⁸ Janganam kaitn bohutakng la'apo pan ko sopo pan. Apo kaitn gola' hala mongasihi. Obai, urakng inyo mongasihi urakng bukai udah momonuhi somuo Hukupm Torat.

⁹ Dalapm Hukupm Torat ado boko porintah ni'in: “Jangan bomporajoan, jangan mombunuh, jangan mongolit, jangan honda'an la'apo pan umputn urakng bukai,” ongko boko porintah bukai. Somuonyo samo agatn sobuti' porintah ni'in: “Kasihicam sosamo kaitn samo sama'an kolai mongasihi diri kaitn siku'.”

¹⁰ Aman urakng mongasihi boko urakng bukai, jadi io co tajahan bulah kojahatan ko sia'. Rotinyo, urakng inyo mongasihi boko urakng bukai udah momonuhi somuo porintah dalapm Hukupm Torat.

Hidup agatn caro inyo monyonangan Allah obai kinyo manaham Yesus tajahan datakng agi'

¹¹ Kaitn gola' molabuhan somuo nantai obai kaitn mongotohu'i joman ni'in ninam boko ari toahir. Ari pakai' kito disolamant'an udah mongkitn dampikam. Jadi, kaitn gola' siap huatan bulah koboi'an samo sama'an urakng inyo huas tidu'.

¹² Malapm udah hampir laluam ongko sobontar agi' matoari tajahan moncara'. Jadi, kito gola' botongga' bulah kojahatan ongko kito gola' bulah koboi'an pakai' molawatn kuaso golap. Samo sama'an kito molongkapi diri kito agatn sonjato inyo dipakai pakai' boparakng bagi torakng.

¹³ Kito gola' hidup agatn caro inyo sopatn sama'an urakng inyo hidup dalapm torakng. Jangannam kito ruah-runsakan ongko hala komabu'an. Jangannam kito bulah dosa kojahatan ongko tuyut kohonda' bukakng inyo jahat. Janganam kito tungi ongko hala bokolohi.

¹⁴ Apo, kito gola' monjadi samo sama'an Tuhatn Yesus Kristus ongko hala monuruti Sio. Jangannam kito bopikir agi' mongona'i caronyo pakai' mongosihan kohonda' monsio.