Roma 12 - Porjanjian Boharu Torjomahan Baso Dilakng Soari-ari

Caro hidup inyo monyonangan Allah

¹ Obai somuonyo nantai, boko somadikan, ni'in aku kotakan muhun ko kaitn: Obai Allah monunju'an kasih-Nyo ko kaitn, jadi kaitn gola' monyorahan diri kaitn ko Sio samo sama'an kurbatn posombahan inyo hidup. Kaitn gola' hidup agatn caro inyo borosih doi' dosa ongko monyonangan Sio. Nianam caro inyo bondar pakai' monyombah Sio.

² Jangannam kaitn tontuyutan kolaku'an boko urakng bukai di dunia ni'in. Apo biar Allah morubah pomikiran kaitn monjadi boharu. Agatn ubo nantai, kaitn ulih mongotohu'i la'apo inyo Allah kohonda'i, ia'an lapo inyo boi', la'apo inyo monyonangan Sio, huatan la'apo inyo sompurna.

³ Allah udah moonji'i kasih karunia-Nyo ko aku jadi aku bopandir ko kaitn somuo: jangan am kaitn moanggap diri kaitn lobih pontikng doi' inyo sobondarnyo. Honda'nyo kaitn monilai diri kaitn agatn rondah hati: masikng-masikng monilai dirinyo monurut komampuan inyo di onju' Allah ko io obai io pocayo ko Yesus.

⁴ Kito samo sama'an sobukakng agatn boko anggota bukakng inyo bukai. Kinyo somuo anggota nantai ado tugas inyo samo.

⁵ Ubo nian jam agatn kito. Kito banya' urakng, apo kito samo sama'an sobukakng dalapm Kristus. Masikng-masikng kito ado hubukan agatn anggota inyo bukai.

⁶ Allah monunju'an kasih-Nyo, moonji'i komampuan husus inyo bobeda ko kito masikng-masikng. Aman ado urakng inyo dionji'i komampuan husus pakai' monyampaian posatn doi' Allah, io gola' molabuhan nantai sosuai agatn kopocaya'annyo.

⁷ Aman ado urakng inyo dionji'i komampuan husus pakai' molayati urakng bukai, io gola' molayati. Aman ado urakng inyo dionji'i komampuan husus pakai' mongajar, io gola' mongajar.

⁸ Aman ado urakng inyo dionji'i komampuan husus pakai' moonji'i somangant ko urakng bukai, io gola' moonji'i somangant. Urakng inyo dionji'i komampuan husus pakai' mombagi umputnnyo ko urakng bukai, io gola' molabuhan nantai agatn boi' hati. Urakng inyo dionji'i komampuan husus pakai' momimpitn, io gola' molabuhan nantai agatn rajitn. Urakng inyo dionji'i komampuan husus pakai' monunju'an kasih ko urakng bukai, io gola' molabuhan nantai agatn sonang.

⁹ Kaitn somuo gola' bobondar mongasihi urakng bukai. Jangan bayo pompadah. Kaitn gola' bonci' agatn inyo jahat ongko molabuhan inyo boi'.

¹⁰ Kaitn gola' hala mongasihi ubo koluarga ongko gola' hala ndoholuan morogo'i siku'-monyiku'.

¹¹ Jangan losa' apo gola' hala bosomangant bokorojo molayati Tuhatn.

¹² Sonang-nyamancam obai kaitn yakitn boharap ko Tuhatn. Kaitn gola' botahatn mohadapi ajab sonsaro ongko hala bodoa.

¹³ Tulukngcam kopontikan boko urakng inyo pocayo ko Kristus. Kaitn gola' hala sonang hati monorima' urakng pocayo dalapm rumah kaitn.

¹⁴ Aman ado boko urakng inyo mondorako'i kolai, mintocam ko Allah oca' Sio momborokati sia'. Au, mintocam oca' Allah momborokati sia'. Jangan minto oca' Allah mohukupm sia'!

¹⁵ Aman urakng bukai sonang-nyamanam, kaitn gola' tuyut sonang jam. Aman sia' monangis, kaitn pan gola' jumpat salu' jam.

¹⁶ Hidupcam dalapm kosatuan. Jangan buhau apo bokawalcam agatn boko urakng inyo dianggap co pontikng. Jangannam bopikir kaitn udah mongotohu'i la'apo pan.

¹⁷ Aman ado boko urakng inyo bulah kojahatan agatn kaitn, jangannam kaitn mombalas agatn kojahatan ko sia'. Apo, bulah koboi'an cam agatn somuo urakng.

¹⁸ Sodapat-dapatnyo aman nantai bogantukng doi' diri kolai siku' bousahacam pakai' hidup damai agatn somuo urakng.

¹⁹ Boko somadikan inyo ku kasihi! Jangan kaitn siku' mombalas dondapm. Apo biar Allah inyo mohukupm boko urakng bukai. Obai ado inyo totulis dalapm Buku Suci: “Tuhatn bopandir, ‘Bayo Aku mo inyo bohak mombalas. Aku tajahan mohukupm sia'!’ ”

²⁰ Jadi, daripado kaitn mombalas, aman musuh kaitn kolaparan, onji'i io pomakatn. Aman io korahakan, onji'i io minum. Agatn caro ubo nantai, somadikan tajahan bulah io malu.

²¹ Aman kaitn bulah kojahatan obai urakng bukai bulah kojahatan ko kaitn, rotinyo kuaso jahat mongalahan kaitn. Jangan ubo nian, boko somadikan! Kaitn gola' mongalahan kuaso jahat agatn koboi'an.