Roma 11 - Porjanjian Boharu Torjomahan Baso Dilakng Soari-ari

Ija' ado sobagi'an urakng Israel inyo pocayo

¹ Aku botakutn: Kata'an Allah udah monula' umant-Nyo urakng Israel bai? Samo sokali cado! Obai aku urakng Israel huatan Allah kinyo monula' ku. Aku doi' koturutan Abrahapm, doi' suku Benyamin.

² Allah co monula' urakng inyo bondar-bondar umat-Nyo inyo udah Sio pilih doi' komaimo. Pasti kaitn ingant pomandiran nabi Elia inyo totulis dalapm Buku Suci. Timpu io mongaduan banso Israel ko Allah. Katonyo,

³ “Tuhatn, sia' udah mombunuh boko nabi Duatn ongko morusa'an boko mesbah Duatn. Bayo ija' siku' ku cam inyo ija' hidup. Ongko watu ni'in, sia' tongahan monggoyapi ku honda' mombunuh ku!”

⁴ Apo la'apo timbas Allah ko Elia? Allah bopandir, “Ija' ado tujuh ribu iku' urakng inyo Ku pilih monjadi husus umputn-Ku. Sia' kinyo kalo tundu' monyombah duato Baal.”

⁵ Ubo nantai jam, watu joman ni'in ado sojumlah monsio inyo Allah pilih obai koboi'an-Nyo,

⁶ bukainyo obai sia' bulah koboi'an. Soandainyo, Allah momilih monsio obai sia' bulah koboi'an, jadi nantai boroti Allah kinyo bondar-bondar monunju'an koboi'an-Nyo.

⁷ Jadi kosimpulannyo ubo ni'inan: Urakng Israel bousaha monjadi bondar di pohadapan Allah. Apo kobanya'an doi' sia' kinyo mondapat'annyo. Bayo sodikitmo inyo mondapat'annyo, ia'an nantai boko monsio inyo dipilih Allah. Somuo monsio bukai, Allah bulah hati sia' korikng hati.

⁸ Samo sama'an inyo totulis dalapm Buku Suci: “Allah mombulah sia' oca' co honda' mongoroti mongona'i caro hidup inyo bondar. Sampai ari ni'in pan, mato sia' kinyo bondar-bondar moniant. Kolindakan sia' kinyo bondar-bondar mondinga'.”

⁹ Rajo Daud bopandir: “Balas ja'am ongko hukupm ja'am porbuatan sia' inyo jahat. Biaram somuo borokat inyo ado disia' monjadi samo sama'an joyat bagi sia' sampai sia' colako.

¹⁰ Pulahcam sia' buto oca' sia' culihnyo moniant Pulahcam sia' ajab sonsaro samo sama'an bolikat sia' hala bungku' obai mohambi' inyo kotakan borat.”

Urakng bukainyo urakng Yahudi ado kosompatan monjadi umant Allah obai urakng Yahudi kinyo pocayo

¹¹ Jadi, banya' urakng Yahudi monjadi jouh doi' Allah. Apo aku botakutn: Apo bai nantai tojadi oca' sia' co mungkitn bobali' ko Allah? Samo sokali cado! Obai sia' bodosa monula' Yesus, jadi boko banso bukainyo dionji'i kosompatan pakai' monorima' Yesus ongko monjadi solamant. Nantai tojadi oca' urakng Yahudi monjadi hiri, honda' diborokati jam samo sama'an boko banso bukai nantai jam.

¹² Boko banso bukai di dunia diborokati obai urakng Yahudi bodosa, gagal monuruti kohonda' Allah. Aman ubo nantai, pasti borokat-Nyo tajahan lobih banya' agi' aman urakng Yahudi bobali' agi' pocayo ko Allah.

¹³ Ni'in, aku bopandir ko kaitn boko banso bukainyo banso Yahudi. Obai aku ninam rasul inyo molayati boko urakng bukainyo urakng Yahudi, jadi aku momuji polayatanku nantai.

¹⁴ Agatn ubo nian, aku mungkitn ulih bulah banso ku siku' monjadi tungi. Aku boharap agatn boboropo urakng doi' sia' honda' pocayo ko Yesus jam sampai sia' monjadi solamant.

¹⁵ Watu Allah monula' banso Yahudi, boko urakng bukai di dunia ado kosompatan pakai' monjadi damai agatn Allah. Jadi, watu Sio monorima' banso Yahudi bobali' agi', pasti nantai tajahan samo sama'an sia' mati apo monjadi bobali' hidup agi'.

Urakng bukainyo urakng Yahudi culih buhau

¹⁶ Aman bagian potamo doi' adonan roti monjadi husus umputn Allah, jadi soluruh roti nantai monjadi husus umputn Allah. Ubo nian jam agatn banso Yahudi. Boko urakng Yahudi inyo potamo samo sama'an urat kayu jaitun inyo dikobolo. Obai sia' monjadi urat inyo husus umputn Allah, jadi boko dahatn kayu nantai jam monjadi husus umputn Allah.

¹⁷ Apo ado boboropo urakng Yahudi inyo kinyo pocayo ko Yesus. Sia' samo sama'an boko dahatn inyo udah dipatahan doi' kayu nantai. Apo kaitn urakng bukainyo urakng Yahudi inyo pocayo samo sama'an tunas doi' batakng jaitun inyo liar inyo gonti boko dahatn nantai. Samo sama'an tunas dicangkokan ongko ulih hidup doi' gotah urat kayu jaitun nantai, ubo nian jam kaitn monjadi umant Allah ongko mondapat borokat doi' somuo inyo dijanjian ko boko urakng Yahudi inyo potamo.

¹⁸ Obai nantai, jangan kaitn monjadi buhau ongko moremehan boko dahatn inyo dipatahan nantai. Jangan tongkolupatn! Kaitn bayo dahatn mo. Dahatn kinyo mohidupi urat, apo urat inyo mohidupi dahatn.

¹⁹ Apo mungkitn kaitn urakng bukainyo urakng Yahudi tajahan bopandir, “Boko dahatn nantai dipatahan oca' koi ulih monggonti'i sia'!”

²⁰ Memang nantai bondar. Apo ingant obai sia' dipatahan obai sia' kinyo pocayo ko Yesus. Allah monorima' kaitn obai kaitn pocayo. Jadi, jangannam buhau obai kaitn monggonti'i sia'. Apo gola'cam agatn Allah!

²¹ Obai, sia' nam boko dahatn aslinyo, apo Allah totap momatahan sia'. Jangan bopikir Allah kinyo paca'an molabuhan nantai ko kaitn.

²² Jadi, kito ulih moniant obai Allah boi' hati apo Sio pan koras aman monsio gola' dihukupm. Sio botindak koras agatn boko urakng Yahudi nantai inyo kinyo pocayo. Apo Sio boi' hati agatn kaitn, asal kaitn totap hidup di dalapm koboi'an Allah nantai. Aman cado, kaitn tajahan dipatahan jam.

²³ Apo aman sia' pocayo agatn Yesus, lalu sia' pan tajahan dicangkok agi'. Obai, Allah bokuaso pakai' molabuhan nantai.

²⁴ Kaitn nam boko dahatn kayu jaitun liar. Apo kaitn dicangkok ko batakng jaitun inyo asli. Biar pan hal nantai aneh, Allah totap molabuhan nantai. Jadi, pasti lobih mudah agi', aman boko dahatn asli nantai dicangkok agi' ko batakng jaitun sia' siku'.

Ahirnyo banya' urakng Yahudi tajahan disolamant'an

²⁵ Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

²⁶ Agatn ubo nantai, soluruh banso Israel tajahan disolamant'an. Samo sama'an pomandiran Allah ni'in inyo totulis dalapm Buku Suci: “Ado Ponyolamant inyo tajahan datakng doi' bukit Sion. Sio tajahan mohapus somuo kojahatan doi' koturutan Yakub.

²⁷ Nianam pojanjian-Ku agatn sia': Timpu Aku moamputi dosa sia'.”

²⁸ Watu ni'in, banya' urakng Yahudi monjadi musuh Allah obai sia' kinyo honda' pocayo Kabar Boi'. Agatn ubo nantai, kaitn urakng bukainyo urakng Yahudi ulih diborokati. Apo, Allah ija' mongasihi boko urakng Yahudi nantai obai sia' doi' banso inyo dipilih-Nyo. Nantai sosuai agatn pojanjian inyo Sio pulah agatn angki-bayatn sia'.

²⁹ Obai, aman Allah bojanji pakai' momilih ongko momborokati monsio, Sio co mombalakan pojanjian nantai.

³⁰ Komai, kaitn kinyo taat agatn Allah. Apo obai sia' co taat, jadi Allah monunju'an bolas-kasihan ko kaitn.

³¹ Ubo nantai jam tajahan tojadi agatn boko urakng Yahudi. Ni'in sia' kinyo taat. Apo agatn sia' moniant Allah monunju'an bolas-kasihan ko kaitn, jadi sia' tajahan honda' borubah oca' Allah monunju'an bolas-kasihan ko sia' jam.

³² Allah bulah oca' sotiap banso ado watu inyo sia' kinyo taat ko Sio. Apo Sio molabuhan nantai oca' Sio ulih monunju'an bolas-kasihan ko sia' somuo.

Pujian ko Allah obai roncana-Nyo luar biaso

³³ O, kotakan luar biaso borokat doi' Allah! Kobijaksana'an-Nyo kotakan dalapm! Sio mongotohu'i la'apo pan! Conyiant ado monsio inyo ulih monyolidiki boko koputusan-Nyo! Conyiant ado monsio inyo ulih mongoroti boko roncana-Nyo!

³⁴ “Conyiant ado monsio inyo ulih mongotohu'i pikiran Tuhatn! Conyiant ado monsio inyo ulih momadahi-Nyo!”

³⁵ “Conyiant ado urakng inyo kalo moonji'i la'apo pan ko Sio, sampai Sio gola' mombayar agi'!”

³⁶ Obai, boko la'apo pan dipulah Allah. Somuonyo boasal doi' Allah ongko pakai' Allah. Topujicam Sio somanah-manahnyo! Amin.