Roma 10 - Porjanjian Boharu Torjomahan Baso Dilakng Soari-ari

¹ Boko somadikan, hatiku morinduan oca' bansoku urakng Yahudi disolamant'an. Nianam doaku ko Allah.

² Obai, aku tohu sia' bobondar bousaha monaati Allah, apo sia' kinyo bobondar mongoroti.

³ Sia' co mongoroti caronyo Allah mombulah monsio monjadi bondar di hadapan-Nyo, ongko sia' moncubo monjumpati caro sia' siku'. Jadi, sia' co honda' monorima' caro inyo ditontuan Allah nantai.

⁴ Kristus ia'an ponggonapan doi' Hukupm Torat. Jadi, somuo monsio inyo pocayo ko Sio monjadi bondar di pohadapan Allah.

Sopo inyo pocayo ko Yesus disolamant'an

⁵ Musa monulis mongona'i monjadi bondar agatn caro monuruti Hukupm Torat. Katonyo, “Boko urakng inyo monopat'i Hukupm Torat tajahan hidup obai Hukupm nantai.”

⁶ Apo mongona'i caro urakng bokomboi'an agatn Allah agatn pocayo ko Allah, Buku Suci momandiran dinga'an ni'in, “Jangan kolai katoan di dalapm hati kolai, ‘Sopo bai inyo paca'an noi' ko Sorugo?’ (rotinyo mombaba' Kristus turutn),

⁷ kata'an ‘Sopo am inyo paca'an turutn ko dunia urakng mati?’ (rotinyo moangkat Kristus noi' doi' komatian).”

⁸ Masudnyo ia'an sama'an ni'in. “Pomandiran Allah nantai dampikng bondar agatn kolai. Di nyao huatan di dalapm hati kolai.” Nantai am pomandiran Allah inyo koi boritoan ia'an obai urakng gola' pocayo.

⁹ Obai, aman kolai mongaku' agatn mulut obai “Yesus nam Tuhatn” inyo bokuaso ongko pocayo dalapm hati kolai obai Allah mombulah Sio hidup agi' doi' komatian, jadi kolai tajahan disolamant'an.

¹⁰ Obai agatn hatinyo urakng pocayo, lalu io monjadi bondar di pohadapan Allah. Urakng mongaku'i agatn mulutnyo lalu io disolamant'an.

¹¹ Samo sama'an pomandiran ni'in inyo totulis di Buku Suci: “Somuo urakng inyo pocayo ko Sio, kinyo kalo monjadi malu obai sia' pocayo.”

¹² Urakng Yahudi ongko urakng bukainyo urakng Yahudi disolamant'an agatn caro inyo samo. Conyiant pobedaan obai ongkah ado siku' Tuhatn inyo bokuaso di pucu' somuo monsio ongko Sio momborokati somuo monsio inyo minto tulukng ko Sio.

¹³ Samo sama'an pandir ni'in inyo totulis di Buku Suci: “Sopo ja' inyo bodoa ko Tuhatn tajahan disolamant'an.”

Banya' urakng Yahudi mondinga' Kabar Boi' mongona'i Yesus apo kinyo honda' pocayo

¹⁴ Apo co mungkitn monsio ulih minto tulukng ko Sio aman sia' bolupm pocayo ko Sio. Co mungkitn sia' ulih pocayo ko Sio aman sia' bolupm kalo mondinga' mongona'i Sio. Co mungkitn sia' mondinga' mongona'i Sio aman conyiant ado urakng inyo momboritoan mongona'i Sio.

¹⁵ Ongko co mungkitn monsio ulih momboritoan mongona'i Sio aman monsio nantai kinyo diutus pakai' momboritoan. Samo sama'an pomandiran ni'in inyo totulis di Buku Suci: “Kotakan monyonangan kodatakan urakng inyo mombaba' kabar boi'!”

¹⁶ Apo, kinyo somuo monsio monuruti Kabar Boi' nantai. Samo sama'an pomandiran nabi Yesaya: “Tuhatn, sopo inyo pocayo ko kabar koi?”

¹⁷ Jadi, kosimpulannyo, monsio monjadi pocayo obai sia' mondinga' Kabar Boi'. Ongko sia' mondinga' kabar nantai obai ado monsio inyo momboritoan mongona'i Kristus.

¹⁸ Apo ubo apo agatn urakng Yahudi? Kata'an sia' bolupm kalo mondinga' Kabar Boi' nantai ai? Pasti sia' udah mondinga'am nantai! Samo sama'an pomandiran ni'in inyo totulis di Buku Suci: “Boko monsio udah momboritoan ko soluruh dunia. Pomandiran sia' udah tosebar ko soluruh dunia.”

¹⁹ Apo, aku botakutn: Apobai urakng Israel kinyo mongoroti kabar nantai? Pasti sia' ulih mongoroti! Mulonyo ado pomandiran Allah ni'in inyo disampaian Musa ko banso Israel: “Aku tajahan bulah kaitn monjadi hiri agatn boko banso bukai inyo co mongonal Aku. Ongko Aku mombulah kolai godi agatn banso inyo kinyo mongoroti la'apo pan.”

²⁰ Solaitn nantai pan, nabi Yesaya borani momadahan pomandiran Allah ni'in, “Aku mombulah oca' boko urakng inyo kinyo monggoyapi Aku udah mongonal Aku. Boko monsio inyo kinyo botakutn mongona'i sopo Aku, Aku udah moniant'an diri-Ku ko sia'.”

²¹ Apo mongona'i banso Israel, nabi Yesaya momadahan pomandiran Allah ni'in: “Siakng-malapm Aku udah mombaba' banso nantai pakai' bobali' monyonangan hati-Ku. Apo sia' co taat ongko ongkah molawatn Aku am.”