Roma 1 - Porjanjian Boharu Torjomahan Baso Dilakng Soari-ari

Salapm doi' Paulus

¹ Surat ni'in doi' aku, Paulus, urakng inyo molayati Kristus Yesus. Aku ditingkau pakai' monjadi rasul, huatan dihususan pakai' momboritoan Kabar Boi' doi' Allah.

² Timpu joman komai, Allah udah bojanji mongona'i Kabar Boi' nantai molalu'i boko nabi-Nyo ongko udah totulis di dalapm Buku Suci.

^3-4 Kabar Boi' nantai mongona'i Ana'-Nyo, ia'an Yesus Kristus, Tuhatn inyo bokuaso dipucu' kito. Yesus dilahiran socaro monsio sobagai koturutan Rajo Daud. Apo, Yesus jam ia'an Urakng Inyo Kudus doi' Allah. Obai, timpu watu Sio bobali' hidup doi' komatian, Allah monunju'an obai Yesus ia'an Ana'-Nyo inyo bokuaso.

⁵ Allah jam monunju'an koboi'an-Nyo ko aku. Ia'an Yesus momilih aku pakai' monjadi rasul inyo mowakili Sio. Sio moonji'i tugas ko aku pakai' mombimbikng boko urakng doi' somuo banso oca' sia' pocayo huatan taat ko Sio.

^6-7 Kaitn inyo bodiapm di kota Roma pan sama'an sia'. Kaitn ditingkau pakai' monjadi urakng inyo husus umputn Yesus Kristus. Surat ni'in ko somuo kaitn di kota Roma inyo dikasihi Allah. Aku bodoa oca' Allah Bopai huatan Yesus Kristus, Tuhatn inyo bokuaso dipucu' kito monunju'an koboi'an-Nyo ko kaitn. Aku bodoa oca' Allah huatan Yesus, jam moonji'i sonang-asau ko kaitn.

Paulus honda' ko kota Roma

⁸ Potamo-tamo, aku moucap sukur ko Allah molalu'i Yesus Kristus pakai' kaitn somuo. Obai, urakng di mono-mono di soluruh dunia mondinga' obai kaitn pocayo ko Yesus.

⁹ Allah ia'an sasiku obai aku hala moingant kaitn dalapm doaku. Sionam Allah inyo aku layati agatn soponuh hati pakai' momboritoan Kabar Boi' mongona'i Ana'-Nyo.

¹⁰ Aku pan bodoa kironyo Allah mombuka' jalatn oca' ahirnyo watu ni'in aku ulih mondataki kaitn, aman nantai sosuai agatn kohonda'-Nyo.

¹¹ Obai aku honda' bondar botomu agatn kaitn pakai' bobagi komampuan husus doi' Roh Allah oca' kaitn dikuatan.

¹² Masudku, watu aku bosamo kaitn, kito samo-samo ulih dikuatan. Ia'an, hati aku paca'an dikuatan obai moniant kaitn bondar-bondar pocayo ko Yesus. Sama'an nian jam, hati kaitn paca'an dikuatan obai kopocaya'anku.

¹³ Boko somadikan, aku honda' oca' kaitn tohu obai aku udah opat bohajat pakai' mondataki kaitn, apo sampai watu ni'in hala ado halakan. Aku honda' datakng oca' nononyo polayatanku di antaro kaitn ulih bohasil samo sama'an inyo tojadi di antaro boko urakng inyo bukai Yahudi di boko tompat inyo bukai jam.

¹⁴ Aku mooso wajib molayati somuo urakng, ia'an urakng Yunani damo urakng doi' boko banso inyo bukainyo Yunani, urakng inyo bopondidikan damo urakng inyo co bopondidikan.

¹⁵ Nantaiam sobabnyo aku honda' momboritoan Kabar Boi' ko kaitn inyo bodiapm di Roma.

Kabar Boi' ado kuaso pakai' monyolamant'an urakng

¹⁶ Aku co malu momboritoan Kabar Boi' nantai obai Kabar Boi' ia'an kuaso Allah pakai' monyolamant'an somuo urakng inyo pocayo, potamo-tamo urakng Yahudi, apo jam urakng bukainyo Yahudi.

¹⁷ Obai, dalapm Kabar Boi' nantai, Allah monunju'an caronyo monsio dapat monjadi bondar di pohadapan-Nyo, ia'an agatn pocayo ko Yesus, huatan torus pocayo sampai ahirnyo. Sama'an pomandiran ni'in inyo totulis di Buku Suci: “Boko urakng inyo pocayo paca'an monjadi bondar di pohadapan Allah, jadi sia' paca'an bodapat hidup inyo sobondar-bondarnyo.”

Somuo urakng bodosa huatan patut monorima' hukupan doi' Allah Koadaan urakng bukainyo Yahudi (1:18-32)

¹⁸ Apo doi' sorugo Allah monunju'an ponggodi-Nyo pakai' somuo urakng inyo bodosa huatan bulah kojahatan. Obai, kojahatan nantai mohalaki monsio mongonal ajaran inyo bondar.

¹⁹ Sobondarnyo, Allah udah monunju'an ko monsio boko hal inyo ulih dikotohu'i mongona'i Sio sampai soharusnyo sia' tohu,

²⁰ Ia'an obai Sio Allah huatan Sio bokuaso pakai' somanah-manahnyo. Boko sipat-Nyo nantai kinyo ulih ditiat agatn mato, apo tangga'i dunia ni'in dipulah, monsio ulih momahami nantai molalu'i la'apo pan inyo Sio pulah. Jadi, monsio conyiant alasan pakai' co mongonal boko sipat Allah nantai.

²¹ Sia' mongotohu'i mongona'i Allah, apo sia' kinyo momuliaan Sio sobagai Allah. Sia' pan co moucap sukur ko Sio. Sobali'nyo, pomikiran sia' monjadi pocumo. Hati sia' inyo budu monjadi potakng sampai kinyo ulih mongoroti mongona'i Allah.

²² Sia' bopikir diri sia' ponuh hikmat, apo sobondarnyo sia' budu.

²³ Sia' kinyo monyombah Allah inyo hidup kokal, apo monyombah boko lompatukng inyo dipulah dalapm bontu' mahluk inyo ulih mati, sama'an monsio, burukng, bonatakng inyo bokaki ompat, huatan bonatakng inyo morayap.

²⁴ Obai nantaiam, Allah mombiaran sia' dikuaso'i boko kohonda' hati sia' pakai' molabuhan inyo kotor. Jadi, sia' hala molabuhan boko hal inyo momaluan agatn bukakng sia'.

²⁵ Daripado pocayo Allah inyo bondar, sia' pocayo boko hal inyo kinyo bondar. Sia' monyombah huatan molayati boko hal inyo dipulah daripado monyombah Allah inyo mombulah la'apo pan nantai. Ongkah Sionam inyo soharusnyo dipuji somanah-manahnyo. Amin!

²⁶ Obai nantai, Allah mombiaran sia' dikuaso'i ulih boko kohonda' bukakng sia' inyo momaluan. Sia' inyo botina' kinyo bosotubuh agatn lolaki sama'an inyo wajar, apo sia' bosotubuh agatn botina' bukai.

²⁷ Sama'an nian jam, sia' inyo lolaki kinyo bosotubuh agatn botina' sama'an inyo wajar, apo sia' bokohonda'an agatn sosamo lolaki. Lolaki molabuhan porbuatan inyo momaluan agatn sosamo lolaki. Jadi, Allah mombalas sia' agatn hukupan sosuai agatn boko porbuatan jahat sia' nantai.

²⁸ Obai sia' co mooso pontikng mongonal Allah, jadi Allah mombiaran pikiran sia' monjadi rusa'. Jadi, sia' molabuhan boko hal inyo soharusnyo kinyo pantas sia' labuhan.

²⁹ Sia' kinyo hidup bondar di hadapan Allah. Hati sia' jahat huatan tama'. Sia' mombonci' huatan mooso tungi agatn urakng bukai. Sia' hala honda' botikakng ongko mombunuh urakng bukai. Sia' monipu huatan mondondapm.

³⁰ Sia' mongisahan kisah tumbukan huatan mohayam urakng bukai. Sia' mombonci' Allah. Sia' congkit, congkak, huatan buhau. Sia' pandai moncari' caro boharu pakai' bulah kojahatan. Sia' kinyo taat ko urakng tuho,

³¹ kinyo boakal, huatan culih dipocayo. Sia' kinyo bokoncucu'an huatan bobolas kasihan ko urakng bukai.

³² Monurut porintah Allah, somuo urakng inyo hidup sama'an nantai paca'an dihukupm mati. Biar pan sia' udah mongotohu'i nantai, sia' totap molabuhan boko hal inyo jahat nantai. Kinyo haja' ongkah nantai apo sia' jam sotuju aman urakng bukai molabuhannyo.