Matius 8 - Porjanjian Boharu Torjomahan Baso Dilakng Soari-ari

Yesus monyamani siku' urakng inyo kona' ponyakit kulit inyo bogola'i

¹ Lopas Yesus turutn doi' bukit, banya' urakng tuyut Sio.

² Ado siku' urakng inyo boponyakit kulit inyo bogola'i datakng ko Yesus. Io tundu' monyungkapan ongko momuhun ko Yesus, “Habakng, tulukng nyamani aku. Aman Duatn honda', pasti Duatn ulih.”

³ Yesus mouluran jari-Nyo, moncama' urakng nantai. Kato-Nyo, “Aku honda'. Nyamancam!” Lansukng io nyamanam doi' ponyakit kulit nantai.

⁴ Ongko Yesus bopandir ko io, “Jangan mongisahan hal ni'in ko sopo pan. Apo, botula'cam ko imam holu'ai pakai' momastian kolai udah nyamanam. Lopas nian onju'cam posombahan sosuai agatn porintah Musa. Nianam monjadi buti ko urakng bukai, kolai bondar-bondar udah nyamanam.”

Yesus monyamani siku' hulutn urakng powira Romawi

⁵ Yesus botula' ko kota Kapernaum. Watu Sio mansu' ko kota nantai, ado siku' urakng powira Romawi inyo datakng minto tulukng ko Sio.

⁶ Kato powira nantai, “Habakng, aku ado siku' urakng hulutn inyo kotakng kompodihan. Io monggarikng di rumah huatan culih angkat.”

⁷ Kato Yesus, “Aku paca'an botula' monyamani io.”

⁸ Apo powira nantai monimbas, “Aku co cucu' monorima' Duatn dalapm rumahku. Apo porintahan doi' si'itn ja'am, pasti hulutnku paca'an nyamanam.

⁹ Aku tohu mo mongona'i kuaso obai aku siku' pan ado pomimpitn inyo gola' ku taat'i. Aku pan ado ana' buah ia'an boko projurit. Aman aku monyiuh salah siku' pakai' botula', ongko pasti io botula'. Aman aku monyiuh inyo bukainyo pakai' datakng, ongko pasti io datakng. Aman aku monyiuh hulutnku pakai' mongorojoan sosuatu, pasti io mongorojoannyo.”

¹⁰ Yesus hiratn mondinga' pomandiran powira nantai. Yesus bopandir ko sia' inyo tuyut Sio. Kato-Nyo, “Dinga'anbo, Aku bolupm kalo monomuan iman sobosar ni'in. Doi' banso-Ku urakng Israel, bolupm kalo ku tomu'i urakng inyo pocayo ko Allah samo sama'an powira Romawi ni'in.

¹¹ Dinga'anbo ni'in: Banya' urakng inyo bukainyo urakng Israel paca'an datakng doi' somuo ponjuru dunia. Sia' paca'an dudu' makatn bosamo agatn Abrahapm, Ishak ongko Yakub di dalapm Koraja'an Sorugo.

¹² Apo soharusnyo urakng inyo mansu' ko dalapm Koraja'an nantai paca'an dibuakan ko noraka. Di santai sia' paca'an monangis huatan gorit'an gigi obai kotakng ajab sonsaro.”

¹³ Ongko Yesus bopandir ko powira nantai, “Pulakngcam. Kolai udah pocayo Aku ulih monyamani hulutn kolai. Hal nantai paca'an tojadi.” Watu nantai jam hulutnnyo nantai nyamanam.

Yesus monyamani montuho botina' Simon huatan boko urakng bukai

¹⁴ Yesus botula' ko rumah Petrus. Di santai, montuho botina' Petrus hontapm gorikng. Jadi, io mangkakan di kotidu'annyo. Yesus moniant nantai,

¹⁵ ongko moncama' longannyo. Watu nantai jam, montuho botina' Petrus nyamanam. Io bodiritn ongko mula'i molayati Yesus.

¹⁶ Watu babahari, banya' urakng sakit dibaba' ko Yesus, tomansu' inyo korasu'an boko roh jahat. Agatn pomandiran-Nyo mo, Yesus monundukng boko roh jahat nantai. Sio pan monyamani somuo urakng inyo sakit di santai.

¹⁷ Poristiwa nantai tojadi oca' pomandiran Allah monjadi nyata. Timpu joman komai Nabi Yesaya monulis pomandiran Allah nantai dinga' ni'innan bunyinyo: “Sio nanam monanggukng ajab sonsaro kito huatan monyamani ponyakit kito.”

Boko syarat pakai' monjadi murid Yesus

¹⁸ Timpu Yesus moniant urakng banya' inyo mongoliliki-Nyo nantai, ongko Sio monyiuh boko murid-Nyo oca' noi' porohu monyomboraki danau.

¹⁹ Sobolupm botula', ado guru agama Yahudi datakng. Katonyo ko Yesus, “Guru, aku paca'an hala tuyut Duatn, ko mono pan Duatn botula'.”

²⁰ Apo Yesus bopandir ko io, “Payau ado lubakngnyo. Burukng ado sayakngnyo. Apo biar pan Aku Inyo Diutus Allah Pakai' Monjadi Monsio, Aku co nyiant kodiapan.”

²¹ Siku' urakng inyo bukai, ia'an salah sikuꞌ urakng murid-Nyo, bopandir ko Sio, “Tuhatn, aku honda' tuyut Duatn. Apo aku ija' minto ijitn pakai' momasar bopaiku holu'ai.”

²² Apo Yesus bopandir ko io, “Hincapm tuyut Aku ninam. Biaram boko urakng mati momasar urakng mati sia'.”

Yesus monongga'an bonakau

²³ Lopas nantai, Yesus noi' ko dalapm porohu. Boko murid-Nyo tuyut Sio.

²⁴ Watu sia' tongahan bolayar, kali labuh ado bonakau mohontapm danau nantai, apo watu nantai Yesus tongahan tidu'. Golumbakng bosar mohontapm porohu sia' sampai honda' tonggolapm.

²⁵ Jadi, boko murid-Nyo mondataki-Nyo ongko monggagaian Sio. Kato sia', “Tuhatn! Tulukng! Kito paca'an bomatian!”

²⁶ Kato Yesus ko sia', “Kaitn inyo kurakng pocayo, kaitn jangan gola'.” Lalu Yesus bodiritn ongko monyiuh bonakau huatan danau nantai botongga'. Ongko, lansukng danau nantai monjadi diapm.

²⁷ Sia' hiratn. Kato sia', “Urakng ni'in kotakan luar biaso. Bonakau huatan danau pan taat agatn Sio.”

Yesus monyamani duo urakng inyo korasu'an boko roh jahat

²⁸ Lopas nian, Yesus bosamo boko murid-Nyo sampai di soborakng danau di doerah Gadara. Di santai, ado duo urakng inyo dirasu'i boko roh jahat inyo tinggal di boko gua tompat pasaran. Duo urakng nantai kotakng bobohayo sampai co nyiant urakng inyo borani molalu'i jalatn nantai. Duo urakng nantai datakng ko Yesus,

²⁹ ongko mondorah, “Oi Ana' Allah! La'apo urusan Duatn agatn koi? Apobai Duatn datakng honda' mohukupm koi sobolupm watunyo inyo ditontuan Allah?”

³⁰ Kinyo jouh doi' sia' ado banya' bondar babi tongahan bogoyap pomakatn di ririkng bukit.

³¹ Jadi, boko roh jahat nantai mominto ko Yesus, “Aman Duatn monundukng koi koluar doi' duo urakng ni'in, siuhcam koi momansu'i boko babi nian.”

³² Yesus bopandir ko boko roh jahat nantai, “Botula'cam!” Lansukng koluaram sia' ongko momansu'i boko babi nantai. Boko babi nantai rari molansakng doi' ririkng bukit inyo tinggi nantai ko dalapm danau, ongko mati lomas.

³³ Boko ponjago babi nantai moniant poristiwa nantai. Jadi, sia' rari ko kota. Di santai, sia' mongisahan somuo hal inyo tojadi, tomansu' la'apo inyo tojadi agatn koduo urakng nantai inyo komainyo korasu'an boko roh jahat.

³⁴ Ongko, soluruh pondudu' kota koluar pakai' monomu'i Yesus. Sia' momuhun oca' Sio moninggalan doerah sia'.