Matius 7 - Porjanjian Boharu Torjomahan Baso Dilakng Soari-ari

Jangan mohakipi urakng bukai

¹ “Jangan mohakipi urakng bukai. Aman kaitn molabuhan nantai, ongko kaitn paca'an dihakipi Allah.

² Obai sama'an apo kaitn mohakipi urakng bukai, ubo nian jam Allah paca'an mohakipi kaitn. Ukuran inyo kaitn pakai pakai' moukur urakng bukai, Allah paca'an momakai ukuran inyo sama'an nantai jam pakai' moukur kaitn.

³ Boko urakng inyo moniant kosimaian kayu di mato urakng bukai apo balok di mato sia' sikuꞌ kinyo kotiat'an.

⁴ Ongko io bopandir, ‘kosi'itn, Somadikan, oca' ku tulukng mohilakan kosimaian di mato kolai.’ Apo balok di matonyo sikuꞌ, io co moniant.

⁵ Urakng sama'an nantai urakng inyo pompadah boi' apo sobondarnyo hatinyo jahat. Hilakan holu'ai balok doi' mato kolai, hoyu' ulih moniant agatn jolas oca' ulih mohilakan kosimaian doi' mato somadikan kolai.”

Ajaran Yesus gola' dihormati

⁶ “Jangan dionju' ko boko kudu' sosuatu inyo husus pakai' umant Allah. Aman kaitn molabuhan nantai, boko kudu' nantai paca'an bobali' ongko moraso kaitn. Jangan onju' mutiara ko boko babi. Aman kaitn molabuhan nantai, boko babi nantai bayo paca'an mononja'-nonja' mutiara nantai.”

Hala bodoa

⁷ “Mintocam ko Allah, ongko Sio paca'an moonji'inyo ko kaitn. Goyapcam, ongko kaitn paca'an mondapat. Ketokcam, ongko lawakng paca'an dibuka'an pakai' kaitn.

⁸ Obai sotiap urakng inyo mominto paca'an monorima'; sotiap urakng inyo bogoyap paca'an mondapat; huatan lawakng paca'an dibuka'an pakai' sotiap urakng inyo mongetok.

⁹ Umpamonyo ado siku' urakng Bopai di antaro kaitn inyo ana'nyo minto roti. Pasti kaitn kinyo moonji'i batu ko io.

¹⁰ Aman ana' kaitn minto ikatn pakai' lou', pasti kaitn kinyo moonji'i ular ko io!

¹¹ Sodakan kaitn urakng jahat tohu moonji'i inyo boi' ko ana' kaitn. Apotolagi' Allah Bopai di sorugo! Sio paca'an moonji'i inyo boi' ko sia' inyo mominto ko Sio.”

Caro hidup inyo bondar

¹² “Bulahcam koboi'an ko urakng bukai, samo sama'an kaitn kohonda'i urakng bukai molabuhannyo ko kaitn. Nantaiam isi doi' somuo porintah huatan poraturan Allah inyo ditulis dalapm Hukupm Torat huatan buku boko nabi.

^13-14 Lawakng noraka luar. Caro hidup inyo monuju ko su'utn mudah mo. Banya' urakng inyo jumpat caro hidup nantai. Apo caro hidup inyo monuju ko Koraja'an Sorugo uyuh. Obai nantai, kaitn gola' mansu' Koraja'an Sorugo molalu'i lawakng inyo songka'! Obai lawakngnyo songka', bayo sodikit urakng inyo monomuannyo.”

Boboi'cam tohadap boko urakng inyo pompadah boi' apo ajarannyo salah

¹⁵ “Boboi'cam tohadap boko nabi palsu. Sia' pompadah boi' apo tujuan sia' jahat. Sia' samo sama'an payau ganas inyo datakng monyamar sama'an domba.

¹⁶ Apo kaitn paca'an mongotohu'i sopo sia' samo sama'an sotiap tontanaman dikonal doi' buahnyo. Co mungkitn mongopil buah anggur doi' rampuan duri. Co mungkitn mongopil buah ara doi' rampuan duri.

¹⁷ Sama'an nantaiam, sotiap tontanaman inyo boi' mohasilan buah inyo boi'. Apo sotiap tontanaman inyo kinyo boi' mohasilan buah inyo kinyo boi' jam.

¹⁸ Co mungkitn tontanaman inyo boi' mohasilan buah inyo kinyo boi'. Co mungkitn tontanaman inyo kinyo boi' mohasilan buah inyo boi'.

¹⁹ Sotiap tontanaman inyo kinyo mohasilan buah inyo boi', pasti ditobakng ongko dibuakan ko api.

²⁰ Jadi, kaitn paca'an mongotohu'i aman boko nabi boi' damo jahat agatn moniant caro hidup sia'.

²¹ Kinyo somuo urakng inyo moningkau Aku, ‘Tuhatn, Tuhatn,’ paca'an mansu' ko dalapm Koraja'an Sorugo. Apo bayo boko urakng inyo molabuhan kohonda' Bopai-Ku di sorugo inyo mansu' ko dalapm Koraja'an Sorugo.

²² Timpu ari toahir, banya' urakng paca'an mondorah ko Aku, ‘Tuhatn, Tuhatn, koi udah monyampaian posatn Allah. Koi udah monundukng boko roh jahat. Koi udah molabuhan banya' mujisat. Koi molabuhan somuonyo nantai momakai kuaso Duatn jam.’

²³ Watu nantaiam Aku paca'an mohukupm sia'. Aku paca'an bopandir agatn torus-torakng ko sia', ‘Sobondarnyo somuo kaitn urakng jahat. Aku co kalo konal agatn kaitn. Botula'cam doi' pohadapan-Ku!’ ”

Boko urakng gola' molabuhan ajaran Yesus bukainyo bayo bondinga'annyo

²⁴ “Jadi, ado urakng inyo paca'an mondinga' pomandiran-Ku ongko molabuhannyo jam. Io samo sama'an urakng inyo pintar-corodi' inyo bulah rumahnyo agatn pondasi di pucu' batu.

²⁵ Timpu hujatn doras, ongko pasakng huatan bonakau mohontapm rumah nantai. Apo rumah nantai kinyo robah obai dipulah di pucu' batu.

²⁶ Ado jam urakng inyo paca'an mondinga' pomandiran-Ku apo kinyo molabuhannyo jam. Io samo sama'an urakng inyo budu inyo bulah rumahnyo di pucu' pasir.

²⁷ Timpu hujatn doras, ongko pasakng huatan bonakau mohontapm rumah nantai. Rumah nantai robah huatan kotakng ropu'-lolo.”

Doi' ajaran Yesus, urakng mongotohu'i Yesus bokuaso

²⁸ Lopas Yesus jadi mongajar somuonyo nantai, urakng banya' inyo mondinga'an pomandiran-Nyo mooso hiratn.

²⁹ Obai, Sio mongajar kinyo sama'an boko guru agama sia'. Sio mongajar sobagai urakng inyo pintar-corodi'.