Matius 3 - Porjanjian Boharu Torjomahan Baso Dilakng Soari-ari

Polayatan Yohanes Pombaptis

¹ Timpu nantai Yohanes Pombaptis momula'i polayatannyo di padakng pasir di doerah Yudea. Io momboritoan,

² “Koraja'an Sorugo udah dampikam! Jadi, botongga'cam kaitn bulah dosa ongko kaitn monyonangan hati Allah.”

³ Yohanes ninam inyo joman komai nabi Yesaya padahan watu io bopandir: “Ado urakng inyo mondongkakng-mondorah di padakng pasir, ‘Sodia'ancam jalatn pakai' Tuhatn. Bujurancam jalatn pakai' Sio’ ”.

⁴ Yohanes momakai jubah inyo dipulah doi' bulu unta. Ikat pinggakngnyo dipulah doi' kulit bonatakng. Io ongkah bopua' bunta' agatn madu hutatn.

⁵ Banya' urakng datakng ko io doi' somuo doerah Yudea, tomansu' kota Yerusalem huatan somuo doerah sokitar sungai Yordan.

⁶ Sia' moaku'i boko dosa sia' huatan Yohanes mombaptis sia' di Sungai Yordan.

⁷ Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso! Jangan bopikir kaitn ulih morarian diri doi' hukupan Allah nononyo.

⁸ Kaitn gola' molabuhan porbuatan inyo bondar pakai' monunju'an obai kaitn bondar-bondar moninggalan dosa.

⁹ Jangan bopikir dalapm hati: Koi koturutan doi' Abrahapm. Pasti Allah kinyo paca'an mohukupm koi. Ingant: Doi' boko batu ni'in pan Allah ulih bulah koturutan Abrahapm!

¹⁰ Kapak pakai' monobakng kayu tuntukng ko akarnyo udah tosodia. Jadi tontanaman inyo kinyo mohasilan buah inyo boi', paca'an ditobakng ongko ditikapan ko api.

¹¹ Ado Urakng inyo paca'an datakng lopas aku. Sio lobih bokuaso daripadoku. Malahan monjadi hulutn-Nyo inyo palikng babah pan, aku kinyo cucu'. Aku mombaptis urakng agatn ara'i pakai' monunju'an obai sia' udah botongga' bulah dosa huatan monyonangan hati Allah. Apo Sio paca'an mombaptis urakng agatn Roh Allah ongko api.

¹² Sio udah monjujut capatn pakai' monyongkayoan bigi' gandupm doi' johumannyo. Bigi' gandupm paca'an dikumpulan ko dalapm jurukng. Apo somuo johuman inyo kinyo boguno paca'an dicucul di dalapm api inyo kinyo kalo buta'.”

Yesus dibaptis

¹³ Lopas nantai, Yesus datakng doi' doerah Galilea ko sungai Yordan oca' Sio ulih dibaptis Yohanes.

¹⁴ Apo Yohanes moncubo monula' Yesus. Yohanes bopandir ko Yesus, “Duatn kinyo pontikng datakng ko aku pakai' dibaptis! Sobondarnyo, aku inyo pontikng Duatn baptis!”

¹⁵ Apo Yesus monimbas, “Biaram kolai molabuhan nantai dalapm watu ni'in. Obai agatn ubo nanam kito momonuhi somuo hal inyo dikohonda'i Allah.” Jadi, Yohanes monuruti pomandiran Yesus nantai. Io mombaptis Yesus.

¹⁶ Lopas jadi dibaptis, Yesus hagar koluar doi' dalapm ara'i. Watu nantai jam, langit tobuka'. Yesus moniant Roh Allah turutn ko Io samo sama'an burukng daro.

¹⁷ Lalu todinga' saro Allah doi' sorugo mongatoan, “Ninam Ana'-Ku inyo Ku kasihi. Io monyonangan hati-Ku.”