Matius 26 - Porjanjian Boharu Torjomahan Baso Dilakng Soari-ari

Boko Pomimpitn urakng Yahudi bohajat honda' mombunuh Yesus

¹ Lopas Yesus jadi momandiran somuo pomandiran-Nyo nantai, Sio bopandir ko boko murid-Nyo.

² Kato-Nyo, “Kaitn tohu cadoai obai duo ari agi' paca'an ado Ari Rayo Paskah. Watu nian, boko urakng paca'an monangkap Ana' Monsio, sia' paca'an monyorahan-Nyo ko boko urakng oca' Sio dihukupm mati di kayu salib.”

³ Watu nian jam, boko imam kopala' huatan boko pomimpitn urakng Yahudi bokumpul di istana Imam Agukng, damonyo Kayafas.

⁴ Sia' mohoupan poroncana'an oca' ulih monangkap Yesus socaro diapm-diapm lalu mombunuh Sio.

⁵ Apo sia' bopandir, “Jangan kito cubo monangkap Yesus watu boko urakng morayaan Ari Rayo Paskah, obai nononyo paca'an bulah korusuhan di antaro rayat.”

Botina' inyo monuyung minya' harupm ko kopala' Yesus tandonyo morogo'i Sio

⁶ Di kota Betania, Yesus ado di rumah Simon komainyo boponyakit kulit inyo bogola'i.

⁷ Watu nian, ado siku' botina' datakng ko Yesus. Botina' nantai mombaba' sobotul pualam inyo bisi minya' harupm inyo mahal. Watu Yesus tongahan dudu' makatn, botina' nantai monuyung minya' nantai ko kopala' Yesus tando mohormati Sio.

⁸ Pas boko murid-Nyo moniant nantai, sia' godi. Kato sia', “Hibo minya' harupm nantai dipolobu'i ubo nantai?

⁹ Minya' harupm nian ulih dijual agatn rogo inyo mahal lalu duitnyo dionju' ko boko urakng jaro!”

¹⁰ Apo Yesus mongotohu'i pikiran sia' nantai. Kato-Nyo ko sia', “Jangan kaitn monyusahan botina' ni'in! Io molabuhan lou' inyo boi' ko aku.

¹¹ Kaitn hala ado kosompatan pakai' bulah koboi'an ko boko urakng jaro obai sia' hala ada'an di antaro kaitn. Apo Aku co paca'an hala bosamo-samo agatn kaitn.

¹² Agatn monuyung minya' harupm nantai ko kopala'-Ku, sobondarnyo botina' ni'in udah monyiap'an bukakng-Ku pakai' dipasar.

¹³ Pondinga'an! Di soluruh dunia, di mono ja' Kabar Boi' diboritoan, porbuatan botina' ni'in paca'an dikisahan jam sampai io kinyo tongkolupatn.”

Rasul Yudas bohajat monjual Yesus ko boko urakng inyo molawatn-Nyo

¹⁴ Lopas nian, Yudas Iskariot, salah siku' doi' koduo bolas rasul Yesus, io botula' ko boko imam kopala'.

¹⁵ Katonyo, “La'apo inyo paca'an kaitn onju' ko aku aman aku monyorahan Yesus ko kaitn?” Lalu sia' mombayar tigo puluh pingkai' duit pira' ko io.

¹⁶ Doi' watu nantai, Yudas mula'i bogoyap kosompatan inyo boi' pakai' monyorahan Yesus ko sia'.

Yesus morayaan Ari Rayo Paskah bosamo agatn boko murid-Nyo

¹⁷ Pas datakng watunyo mula'i morayaan Ari Rayo roti Kinyo Boragi. Jadi, watu ari potamo dalapm poraya'an nantai, boko murid Yesus datakng ko Sio. Kato sia', “Di mono inyo Duatn kohonda'i koi monyiap'an pomakatn pakai' poraya'an paskah pakai' Duatn?”

¹⁸ Timbas Yesus, “Mansu' ko kota Yerusalem ko urakng nantai inyo kito konal. Padahan ko io, ‘Guru ado posatn. Watu pakai' Sio hampir datakam. Sio honda' morayaan Paskah di dalapm rumah kolai bosamo-samo agatn boko murid-Nyo.’ ”

¹⁹ Lalu, boko murid Yesus molabuhan la'apo inyo disiuh ko sia'. Sia' botula' monyiap'an pomakatn nantai pakai' morayaan Paskah.

²⁰ Lopas ari udah malapm, Yesus dudu' makatn bosamo-samo agatn koduo bolas murid-Nyo.

²¹ Pas sia' tongahan makatn, Sio bopandir, “Pondinga'anba Aku! Salah siku' doi' kaitn paca'an monjual Aku ko boko musuh-Ku.”

²² Hal nantai bulah hati sia' kotakan salu'. Sia' siku'-monyiku' bopandir ko Sio, “Pasti bukainyo aku, oi Tuhatn?”

²³ Timbas Yesus, “Urakng inyo moncolupan rotinyo ko dalapm mangku' bosamo Aku, io nanam inyo paca'an monjual Aku.

²⁴ Udah totulis dalapm Buku Suci mongona'i Ana' Monsio inyo paca'an dijual ko boko urakng inyo molawatn Sio. Sosuai agatn tulisan nantai, hal nantai paca'an tojadi ko Sio. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”

²⁵ Lalu, Yudas, urakng inyo paca'an monjual Yesus, io bopandir, “Pasti bukainyo aku, oi Guru?” Timbas Yesus, “Ubo nanam kato kolai.”

Pojamuan makatn pakai' moingant Yesus

²⁶ Pas sia' tongahan makatn, Yesus moncanggapm roti lalu moucap'an doa sukur. Sio momingkai'-mingkai' roti lalu moonju'nyo ko boko murid-Nyo. Kato-Nyo, “Kuti'cam, makatncam, ninam bukakng-Ku.”

²⁷ Lopas nantai, Yesus monguti' socangkir anggur. Sio moucap doa sukur agi' lalu moonju' anggur nantai ko sia'. Kato-Nyo, “Somuo kaitn, minumcam.

²⁸ Obai, ninam darah-Ku inyo paca'an ditumpahan pakai' urakng banya' watu Aku mati. Nantai paca'an tojadi oca' boko urakng ulih diamputi doi' boko dosa sia'. Nianam Pojanjian Allah inyo disahan agatn darah-Ku.

²⁹ Apo porotian ni'in: Aku co paca'an minum anggur agi' sampai Aku minum anggur inyo boharu bosamo-samo agatn kaitn dalapm Koraja'an Allah Bopai-Ku.”

Yesus momadahan obai Rasul Petrus paca'an monyangkal-Nyo

³⁰ Lalu, Yesus ongko boko murid-Nyo monyanyian lagu pujian ko Allah. Lopas nantai, sia' botula' ko bukit Jaitun.

³¹ Di santai, Yesus bopandir ko sia', “Watu malapm ni'in jam, kaitn somuo paca'an moninggalan Aku. Obai gola' tojadi sosuai agatn pomandiran Allah ni'in inyo totulis dalapm Buku Suci: ‘Aku paca'an mombunuh Gombala nantai, lalu boko domba-Nyo paca'an botomboburan.’

³² Apo lopas Allah bulah Aku hidup agi', Aku paca'an botula' mondoholu'i kaitn ko propinsi Galilea.”

³³ Petrus bopandir ko Yesus, “Mungkitn somuo kawal inyo bukai paca'an moninggalan Duatn, apo pasti aku cado!”

³⁴ Lalu Yesus bopandir ko io, “Porotian ja'am! Watu malapm ni'in jam kolai paca'an momandiran obai kolai co konal agatn Aku sampai tigo kali sobolupm manu' bokuku'.”

³⁵ Kato Petrus ko Sio, “Biar pan aku gola' mati bosamo agatn Duatn, aku co paca'an bopandir co mongonal Duatn.” Somuo murid inyo bukai bopandir ubo nantai jam.

Yesus bodoa di kobutn Getsemani

³⁶ Lopas nian, Yesus ongko boko murid-Nyo datakam ko tompat inyo bodamoan Getsemani. Di santai, Sio bopandir ko sia', “Kaitn dudu' di si'itn holu'ai, Aku botula' ko su'utn pakai' bodoa.”

³⁷ Sio mombaba' Petrus ongko koduo ana' Zebedeus bosamo agatn-Nyo. Watu nantai, Yesus mula'i mooso kotakan salu' ongko golisah.

³⁸ Sio bopandir ko sia', “Hati-Ku kotakan salu', osonyo ubo honda' mati. Kaitn tinggal di si'itan ongko bojojago agatn Aku.”

³⁹ Lopas nian, Yesus botula' lobih jouh sodikit. Sio tundu' sampai ko tanah lalu bodoa. Kato-Nyo, “Oi Bopai-Ku, aman ulih, bebasanbo Aku doi' pondorita'an inyo gola' Kualapi ni'in. Apo jangan monurut kohonda'-Ku, apo monurut kohonda' Bopai ja'am inyo jadi.”

⁴⁰ Lopas nantai, Sio bobali' agi' ko kotigo murid-Nyo nantai. Sio monomu'i sia' tongahan toidu'. Kato-Nyo ko Petrus, “Tonyato sojapm ja' co kaitn tahatn bojojago agatn-Ku!

⁴¹ Bojojago cam ongko bodoacam oca' kaitn totap pocayo watu dicubo'i. Memang hati kaitn honda' botahatn mohadapi coba'an, apo tobiat monsio kaitn lomah.”

⁴² Lopas nian, Yesus botula' bodoa pakai' koduo kalinyo. Kato-Nyo, “Oi, Bopai-Ku. Aman Aku gola' moalapi pondorita'an ni'in, culih disangkal, lalu tojadicam sosuai agatn kohonda' Duatn!”

⁴³ Lopas nian, Yesus bobali' agi' ko boko murid-Nyo. Sio monomu'i sia' tongahan tidu' agi' obai sia' kotakan mongantu'.

⁴⁴ Yesus moninggalan sia' lalu botula' bodoa kotigo kalinyo. Sio bodoa agi' pakai' hal inyo samo.

⁴⁵ Lalu, Sio bobali' agi' ko boko murid-Nyo. Kato-Nyo, “Kaitn ija' tidu' ongko botongga', bai? Tiatbo, watunyo datakam pakai' Ana' Monsio disorahan ko boko urakng inyo bodosa.

⁴⁶ Huas cam! Hincapm kito botula'am ko sia'. Io inyo monjual Ku udah datakam.”

Yesus ditangkap

⁴⁷ Watu Yesus ija' bopandir, Yudas datakng. Io ia'an salah siku' doi' koduo bolas rasul. Bosamo agatn io, sorombokan urakng datakam mombaba' podakng ongko pompangkukng. Sia' disiuh boko imam kopala' ongko boko pomimpitn banso Yahudi.

⁴⁸ (Nah, sobolupmnyo, Yudas nantai udah bulah hajat pakai' monjual Yesus ko rombokan inyo molawatn Yesus nantai. Io moonji'i tando ni'in ko sia'. Katonyo, “Urakng inyo aku ciupm, nianam urakngnyo. Tangkapcam Sio!”)

⁴⁹ Jadi, pas rombokannyo datakam, Yudas lansukng mondataki Yesus. Katonyo, “Salapm, Guru!” Lalu, Yudas monciupm Sio.

⁵⁰ Kato Yesus, “Uai kawal, labuhan ja' la'apo inyo monjadi hajat kulo.” Copat rombokan nantai maju, monangkap Yesus.

⁵¹ Salah siku' inyo bosamo Yesus moncabut podakng, lansukng monyorakng siku' hulutn doi' Imam Agukng. Io monota' kolindakan hulutn nantai sampai pogat.

⁵² Apo Yesus bopandir ko io, “Sarukan agi' podakng nian ko dalapm sarukngnyo. Obai somuo urakng inyo monggunoan podakng paca'an mati tobunuh obai podakng jam.

⁵³ Pasti aman Aku minto ko Bopai-Ku, Sio paca'an hagarmo mongiripan lobih doi' duo bolas pasukan tontara molekat pakai' monulukng Aku.

⁵⁴ Apo aman Aku molabuhan nantai, lalu tulisan di dalapm Buku Suci mongona'i Aku kinyo paca'an digonapi. Tulisan nantai momandiran obai somuonyo gola' tojadi sama'an inyo tojadi watu ni'in.”

⁵⁵ Watu nantai, Yesus bopandir ko urakng banya' nantai, “Kata'an Aku ni'in ponjahat bai, kaitn sampai datakng agatn mombaba' podakng ongko pompangkukng pakai' monangkap Aku? Padohal, sotiap ari Aku dudu' mongajar di tongah lamanan Rumah Allah. Apo watu nantai kaitn co monangkap Aku.

⁵⁶ Apo, somuonyo ni'in tojadi oca' pomandiran mongona'i Aku inyo ditulis boko nabi digonapi.” Lalu somuo murid Yesus morarian diri moninggalan Sio.

Yesus di pohadapan Majelis agama Yahudi

⁵⁷ Timpu nantai, boko guru agama Yahudi ongko boko pomimpitn banso Yahudi udah bokumpul di rumah Kayafas, ia'an Imam Agukng; inyo kotakan tinggi jabatannyo. Boko urakng inyo monangkap Yesus mombaba'-Nyo ko rumah nantai.

⁵⁸ Petrus mombodapan Sio doi' jouh. Sampai ko rumah nantai, Petrus mansu' ko tongah lamanan lalu dudu' bosamo agatn boko ponjago, oca' ulih mongotohu'i la'apo inyo paca'an tojadi agatn Yesus.

⁵⁹ Boko imam kopala' ongko somuo Majelis agama Yahudi, sia' bousaha goyap buti oca' Yesus ulih dihukupm mati. Jadi, sia' bogoyap boko urakng inyo paca'an moonji'i kosasian inyo kinyo bondar molawatn Yesus.

⁶⁰ Boko urakng maju, apo boko pomimpitn nantai kinyo bohasil mondapat'an buti la'apo pan. Apo, kali-labuh ado duo urakng inyo maju pakai' bosasi.

⁶¹ Kato sia' duo, “Urakng ni'in kalo bopandir obai Io ulih morobahan Rumah Allah lalu mombangunnyo agi' dalapm tigo ari.”

⁶² Lalu Imam Agukng nantai bodiritn. Katonyo ko Yesus, “Hibo Duatn co monimbas tuduhan nantai inyo dituduhan ko Duatn?”

⁶³ Apo Yesus bodiapm mo. Lalu Imam Agukng nantai botakutn agi', “Demi Allah inyo hidup, aku monyiuh Duatn pakai' monimbas koi. Kata'an Duatn Rajo inyo Dijanjian Allah inyo kito sobut ‘Mesias’? Kata'an Duatn Ana' Allah ai?”

⁶⁴ Timbas Yesus, “Ubo kato kaitn nam. Apo porotian ja' ni'in! Mula'i doi' watu ni'in, kaitn paca'an moniant Ana' Monsio, dudu' di tompat inyo tohormat disopia' kanan Allah Inyo Kotakan Bokuaso. Kaitn paca'an moniant-Nyo datakng doi' sorugo di pucu' boko awatn.”

⁶⁵ Mondinga' nantai, Imam Agukng nantai mombirat-birat pakai'annyo. Katonyo ko boko pomimpitn inyo bukai di santai, “Io mohayam Allah! Co pontikng bogoyap sasi pakai' mongatoan kosalahan-Nyo! Kaitn udah mondinga' Sio mohayam Allah.

⁶⁶ Jadi, ubo la'apo pondapat kaitn?” Timbas sia', “Io gola' dihukupm mati!”

⁶⁷ Lalu sia' moigahi mato-muho Yesus ongko monompilikng-Nyo. Boko urakng bukainyo boduda'an Sio.

⁶⁸ Kato sia', “Butianbo aman Duatn bondar-bondar Rajo Inyo Dijanjian Allah inyo kito sobut Mesias. Padahancam, sopo inyo boduda'an Duatn?”

Rasul Petrus monyangkal Yesus

⁶⁹ Timpu nantai, Petrus dudu' di tongah lamanan rumah nantai. Siku' urakng hulutn botina' mondampiki io. Kato hulutn nantai, “Kolai ninam hala bosamo-samo agatn Yesus, urakng doi' doerah Galilea nantai!”

⁷⁰ Apo Petrus monyangkal di pohadapan boko urakng nantai. Katonyo, “Tou'an aku cuku tohu la'apo inyo kolai pandiran.”

⁷¹ Lalu, io bojalatn ko pintu gerbakng tongah lamanan nantai. Siku' hulutn botina' inyo bukai moniantnyo. Kato hulutn nantai ko boko urakng inyo ado di santai, “Urakng ninam bosamo-samo agatn Yesus, urakng doi' Nazaret nantai.”

⁷² Apo Petrus monyangkal agi' sampai bosumpah. Katonyo, “Aku bondar-bondar co mongonal urakng nantai!”

⁷³ Co manah lopas nantai, boko urakng inyo ado di santai mohampiki Petrus. Kato sia', “Pasti kolai ni'in salah siku' urakng doi' sia', boko murid Urakng nantai doi' Galilea. Nantai nyata doi' logat baso kolai.”

⁷⁴ Lalu Petrus mula'i bosumpah ongko bopandir, “Aku bondar-bondar co konal agatn urakng nantai!” Watu nantai jam, manu' bokuku'.

⁷⁵ Petrus toingant agatn pomandiran Yesus ko io, “Sobolupm manu' bokuku', kolai paca'an monyangkal Aku tigo kali.” Lopas nantai, Petrus koluar doi' tongahlamanan rumah nantai, lalu monangis obai kotakan salu'.